買三送三

12月30日

今日終於去左換買三件送三件既西餅,即係12元有6件,好抵呀.
啱晒我呢d c奶仔.等我得閒多d留意下有咩著數先.
慳得一蚊得一蚊.

一啖飯

12月29日

由於柏宇昨晚咳得好勁,今日唯有又俾返d藥佢食,可能食得藥多,完全無胃口食野,氹極都係食得一啖飯.
好在佢仲肯食飽飽,唉...病一次瘦一次.肉都赤埋.

爸爸放屁屁呀

12月28日

今日daddy休息,我地去左行街街,突然柏宇大聲話daddy放屁屁呀.
daddy就話無呀,我就同daddy講,係就認左佢啦,否則柏宇會不停講架.
而且大人唔應該講大話,會教壤小朋友架.結果daddy好監介甘認左,
柏宇仲要好大聲話好臭架.真係好瘀呀.
但佢又真係無做錯喎,唯有教佢下次細聲同我講啦.

大茶飯

12月27日


婆婆早2日去左macau,贏左少少.於是今晚請我地食大茶飯,好耐都無食過甘飽啦.真係好滿足呀,希望婆婆長赌都勝.不過最好儲埋佢.以備不時之需呀.
婆婆昨日去左長州買左d魚蛋,今日俾我地全部清晒囉.我地仲約左1月1日去添.
期待魚蛋粉...

增強手部感覺既波波

12月26日

今日去左深水步搵d外表好似箭豬既波波俾柏宇玩.因為老師話可以刺激佢既手部觸覺神經.原來真係好難搵架.
行左成條街先有.希望有幫助啦.等放完假返去問下老師仲有無咩玩具可以刺激到佢,或者有無需要去讀d咩課程啦.早d觲決對佢日後既發展都會好d.唔知就無得講,知既就儘力去做,唔好錯過治療既黃金時期.

聖誕節

12月25日

由於昨晚甘夜瞓,今早我地11點先起身,之後整左個有朱古力釘圍邊既芝士蛋榚,差唔多5點先入到去大伯屋企.
今日柏言哥哥一見柏宇就叫佢做monday.真係唔明佢咩意思.同埋哥哥淨係識推柏宇既頭,好在柏宇今日唔多喊姐.不過伯娘就要成日睇住哥哥,驚佢整親弟弟麻.因為佢都幾大力.同埋一味推人.邊個有損傷都唔好啦.
今晚我地食pizza hut既星之凡立貝批,都幾好味,柏宇都食左唔少.我地今晚8點就走啦,因為daddy由入去到走都話好攰.唉...佢次次都係甘架.甘不如下次唔好去啦.

睇聖誕燈飾

12月24日

今日係平安夜,我地約左朋友係附近食飯,師傅仲買左一包薯片,一包糖,一盒百力滋俾柏宇,開心到佢大笑,不停話好開心呀.呢個小朋友真係大情大性.之後我地一家去左尖沙咀睇燈飾,好多人呀.柏宇一去到見到外牆既大燈飾,已經話好大好靚呀.之後我仲買左杯朱古力雪榚一齊食添.daddy又買左2枝發光棒棒俾柏宇,佢開心到嘩嘩叫.我地行左一陣就走啦.因為又多人又夜,返到屋企都近12點.同柏宇玩多一陣波波,睇埋聖誕倒數既節目,差唔多2點先瞓.難得甘開心,夜d都無所謂啦.

學校聖誕聯歡會

12月23日

今日柏宇學校聖誕聯歡會,我之前揀左放半日,12點半就放學,今日除左有高班同學表演,仲有禮物同大食會.
我諗柏宇好開心姐.今日亦係慧雅係呢間學校讀埋最後一日,我整左d蛋榚仔俾佢,當係小小心意啦.
放學仲陪佢地去巴士站.希望佢地日後過得好啦.如果有機會搬返出來呢邊就好啦.

大食會:蒜蓉雞脾肉,西蘭花烚小甘荀,粟米肉粒飯,大菜榚.

面試

12月22日

今日去左面試課餘託管導師既課程,等左半個鐘先話面試既導師唔黎,叫我地自行做份卷就走得,晒左唔少時間,
之後我仲要趕返去幫人做清潔,再趕返去做個蛋榚俾朋友.時間十分充實.好在今日上去奶奶家食晚飯,否則我諗都無時間煮飯.希望快d知道收唔收我讀呢個課程啦.
今晚食完飯,走時柏字突然話第時大個囝飲啤酒呀,爸爸一齊飲呀.我地2公婆聽完都覺得佢好搞笑.
呢個小朋友果真諗到咩就講咩.

今日午餐:粉絲魚肉煮紹菜,甘荀粟米煮牛肉,白飯+木瓜
茶點:腐竹雞蛋糖水,餅乾

手凍口唇紫

12月21日

今日我要一早返工,個囝昨晚又無咩食野,今早只食左少少餅及水,著左6件衫,對手都好冰,個咀唇有少少紫,
我好擔人,即時叫老師今日幫我睇住佢,同埋即打俾醫生,因為佢要食4種藥水,每支5ml,甘細個食既份量好似太多啦.我驚佢個腎負荷唔到.醫生覆我份量跟返年齡去開,無問題,叫我放學帶佢睇多次.甘到診所,唔駛我排隊,直入見醫生,check完後話佢仲有少少口及鼻發炎紅腫.keep住食藥即可.唔駛收錢就走得.甘我都安心d.

今日早餐:白菜瘦肉湯什菜粉
午餐:甘荀絲,蛋絲煮牛肉,合掌瓜瘦肉生薏米蜜棗生薑湯,紅米飯+火龍果
茶點:雪梨水,提子麥飽

奶奶做冬

12月20日

今日到奶奶家做冬,奶奶一早叫定我幫佢炒一個餸,甘我就整多個南瓜西米露做飯後甜品.
點知一早同亞囝睇完醫生,佢扭計要我抱住瞓,我咩都做唔到,於是我口講,交由daddy去煮,so far出來既味道好好.而奶奶叫我炒蜜豆帶子,其實無難度,都唔明點解奶奶話佢煮得唔好食,我煮個碟餸食晒呀.
由於大嫂要就柏言瞓覺,所以6點幾就開飯啦.7點就食完走人.唉...奶奶忙左一日,食一個鐘,都話唔好搞架啦.
次次食完都話下次唔再煮,出街食.咪又係次次都煮,講都晒氣.大佬又太緊張個囝,成日鬧奶奶,好無意思.
搞到我都唔想返去食飯,又邊次唔鬧人架.2公婆+工人都睇唔到個囝咩.甘寶貝真係唔好帶佢出街啦.
費事俾人整親啦.

婆婆做冬,細舅父生日,聖誕party

12月19日

今日婆婆做冬,細舅父生日,聖誕party,一次過食飯慶祝.
今日小朋友就開心啦.收甘多份禮物,婆婆,姨媽,daddy,大細舅父,姑姑每人都有一份,大豐收.
不過柏宇就太膽小,成日喊,又痴身.都幾頭痛.
今日婆婆整左雞酒,好好味呀,可能無咩機會可以食得到啦.我食左2碗呀.
我仲口頭約左佢地2月6日晚來我家幫柏宇開生日會,今年仲請左太嫲,希望攪得成啦.

感覺統合差

12月18日

今日放學,吳老師(佢係專睇有問題既小朋友)話我知,今日午睡時,柏宇瞓唔著,不停用手巾捽面,
甘老師過去輕輕掃下佢塊面同摸下佢個頭,佢笑得好甜,老師問佢係咪好舒服,佢話係呀,好舒服呀.
甘老師就話俾我知,覺得柏宇感統好似有d差,借左本書俾我回家睇,睇下有咩可以幫柏宇改善好d,
等佢可以健康全面發展,因為佢米學校之前有個case同柏宇差唔多,之後要去做test,再做治療.
小朋友0-6歲係黃金時期,及早發現,可幫助佢地開發大腦既優點,修正缺點.
感覺統合包括視覺,嗅覺,味覺,聽覺,前庭覺,動覺,觸覺,一定要全部統合,才會自然出現協調既動作反應.從而產生自信心,亦樂於跟人互動,身心體驗舒暢與愉快,成就有組織,有計劃既行為,對環境能適應,輕鬆融入環境.
本書我就未睇睇,只知如果感統唔協調,會影響到佢既情緒,要多d同佢做按摩.其他既就要再睇書,睇下有咩吻合既地方再作相應既動作啦.

今日午餐:免治牛肉粟米粒紅椒粒炒蛋,木瓜瘦肉雪耳湯,紅米飯+火龍果
茶點:雞蓉芝士薯蓉,清水

返醫院覆診

12月17日

今日返左QE覆診,今日好凍,著左件大褸去磅重都係得11.6KG,87.5CM高,醫生話佢唔達標,仲要約左半年後返去再跟進.出年3月就去照超聲波,我順便叫醫生CHECK埋佢行路,醫生話佢OK喎.仲話柏宇好聰明,應該係超班寶寶,
仲教左D方法去令柏宇食多D野添.例如一齊同枱食飯,我地食時要扮到d野食好好味,誇張表情...
不過呢d我本身都有做開,唯有再試下啦.

禍不單行

12月16日

今日放學時,柏宇執玩具放學,有個女仔走埋去搶玩具,佢唔俾,個女仔推佢,柏宇就還手推返佢,點知個女仔好大力一手推左柏未落地,剛巧2個老師都睇唔到,我即時通知佢地去幫手啦.老師事後叫佢地互相道歉,柏宇好聽話,佢即時道歉,個女仔就c都唔肯講,於是老師就捉住女仔隻手幫柏宇摔下個頭,之後我地放學走啦.沿途柏宇己跌左一次,好在我捉實佢隻手,佢只係跪左係地下.
點知轉頭又再跌過,今次我仲拖唔實佢隻手,佢今次成個向前跌,跪左係地下,仲要失重心向左邊碌,成個額頭撞落地下,即時多左隻小雞蛋,瘀晒.唔駛講都知喊都七彩.
今晚我第一次整煎蒼魚,因為佢2仔爺都對蒸魚麻麻地.出奇地2個都爭食,到最後亞囝仲想食埋個魚頭同魚尾添.
好捧場,我好開心有人賞面掃清光,等我下次再整過先.

今日午餐:椰菜絲甘荀絲芽菜瘦肉蛋絲炒上海粗麵,粟米生菜雞絲粥+木瓜
茶點:芝士醬三文治,熱牛奶

good good good

12月15日

今早要返工,又係8點送柏宇返學,今日好叻,無喊無扭計,仲識同我拜拜,甘我返工都返得安心d
所以放學帶左士多啤梨味百力滋俾佢,獎勵下佢甘叻仔囉.
我地今晚仲2個食晒一排朱古力添.好耐無試過食得甘癲啦.

今日早餐:白菜雞絲菠菜麵
午餐:南瓜煮瘦肉,牛肉蕃茄洋蔥湯,紅米飯+梨
茶點:朱古力蛋榚,熱牛奶

好開始

12月14日

今日開始,我早上唔再同柏宇提返學及催佢快d,等佢無甘趕,佢今日返學都無扭計及喊,仲識同我拜拜,
唔通佢同我一樣,唔鐘意俾人催,等我試多幾日就知啦.
另外今日同柏宇join左麥樂會,甘食野都抵d啦.生日又會有野送俾佢,30蚊年費都ok既.

今日午餐:節瓜甘荀炆雞排,菠菜煮瘦肉,白飯+蘋果
茶點:喳咋,餅乾

成功係痰罐便便啦

12月12日

今日柏宇成功係痰罐痾左便便,因為都大個囝啦,唔可以仲係痾係片片架啦.
我就獎左佢食一條士多啤梨巨型百力滋.佢食得好開心呀.
今晚得我同柏宇2個食飯,我都煮左蒜蓉磨菇火腿意粉,焗粟米芝士薯蓉,焗雞翼.
唔知係真係好味,定係囝囝鐘意食西餐,佢食左好多仲話好肚餓,不停食,好捧場.
我見佢食得甘開心,我都好開心呀.

唔知係咪有心激我呢

12月11日

今日去左零食物語買左盒七色彩虹巨型百力滋,內有7種味道,各有1支,賣成33蚊,好貴呀.不過好得意既.
等我留返下星期六拎返去同昊昊及昊云一齊食先.
今晚係嫲嫲家由將椅上跌落地,因為曳曳豬不停上上落落.之後俾我罰佢坐定唔准落地.
無耐就話要去大便,甘我即時拖實佢落地行去廁所,行左幾步,佢同我講,"媽咪,落地唔打腳呀"
都唔知佢係驚我打佢,定係串我無打佢,當堂俾佢吹脹.
今晚我地食左好多零食,食完黑芝麻糯米滋,又食豆沙角,再食粟米條,最後食埋芝士飽先瞓,好滿足呀.

今日早餐:白菜牛肉湯米粉
午餐:瘦肉蒸雞蛋,蕃茄豆腐煮魚肉,白飯+提子
茶點:熱牛奶,果醬麥飽

成功既蠔餅

12月10日

今日成功整左蠔餅及粟米餅,都幾似出街食個d架.亞囝仲食晒成碟粟米餅去送飯添呀.
對於自己整出黎既餸布人欣賞,真係好有滿足感呀.

今日午餐:椰菜花小甘荀雞翼,節瓜蛋絲煮瘦肉,白飯+梨
茶點:菜心瘦肉湯通心粉

心情好好

12月9日

呀大少今日心情幾好,返學唔喊啦.甘我就整定個cake接佢放學食啦.
當係一個獎勵,有獎有罰先得既.

今日午餐:紫椰菜白椰菜蛋絲燴雞柳,蓮藕紅綠豆排骨湯,紅米飯+蘋果
茶點:熱牛奶,甜粟米

又out of control啦

12月8日

今日9點要去到凱旋門清潔,7點多就要叫醒柏未起身,佢一起身就喊啦,
甘樣真係好討厭架.返學時都好地地,一放低佢又大喊,當時都係8:05am.得3個小朋友
我又好趕時間,於是咪發火大聲鬧佢囉,成個癲婆甘,佢當然越喊越大聲啦.
我就喝佢唔准再喊,否則唔湊佢放學.
之後交俾老師就走啦.因為連等車去到要成45min,今日都係剛剛好咋.
顧主係日本太太,又話佢識講中文,原來唔識架.只能用簡單英文溝通,好快做完4個鐘,袋袋平安.
事後我都檢討返自己,每次我返工趕時間,佢就會扭計,我就會發佢脾氣.
點解佢會扭呢,可能佢都知我要返工,會離開佢,唔捨得,咪扭我計囉.
平時我唔發脾氣,係因為我有時間去氹佢或者陪多佢一陣.甘撞正我要返工,唔夠時間,一急咪會發脾氣囉
之後我都同老師講過呢個問題,唯有下次唔理佢,唔駛鬧佢,放低佢就走.咩都唔駛講.
反正佢都係喊一陣,我走左無耐佢就會收聲架啦.老師會搞得掂架啦.
甘樣可能會喊少d添.
另外今年學校既親子聖誕聯歡會,校長突然決定唔預家長,有點失望,等我仲好期待添.

今日早餐:什菜雞絲湯螺絲粉
午餐:冬菇馬蹄蒸豬肉,烚西蘭花,紅米飯+木瓜
茶點:熱牛奶,蒸蛋榚

2歲10個月大(34個月)

12月7日

今日柏宇2歲10個月大(34個月)啦.依然返學都扭計.無佢辦法
今日提早拎晒d聖誕禮物返去婆婆家先.點知婆婆又整定晒d野俾我拎走.
好在我有自備環保袋.滿載而歸.
今日同老師講開,原來學校既書本有一頁係教中文字"媽媽",甘要求貼一張媽媽同囝囝既相,
我就抱住柏宇,柏宇抱住atm機影相啦.影左2張,俾囝囝自己揀鐘意既貼上去.甘又可以親子啦.

p/s:柏宇好鐘意飲婆婆煲既湯,話好甜呀.

今日午餐: 茄汁蕃茄雞絲青豆燴意粉,甘荀薯仔椰菜蕃茄牛尾湯+火龍果
茶點:蘋果南北杏蜜棗水,甜餐飽

討價還價

12月6日

今日柏宇自己係紙晝左眼耳口鼻既位置,好叻仔呀.
另外daddy叫佢教唱歌,佢竟然要求daddy買玩具才教,真係激c.我咪話daddy囉,之前成日甘樣同個囝交換條件,依家佢咪學到十足囉.睇下以後仲敢唔敢嗱.

好遠既playgroup

12月5日

pg由今月開始搬左去大角咀,坐車都要1小時,今日遲到上得25分鐘咋.真係好遠.
不過柏宇返得開心都無計啦.之後去左買左棵2呎既聖誕樹+少少裝飾,加埋都係18元咋,好抵玩.
今日終於收到之前係大陸買既野啦.大致上都好好.d鞋好靚呀.唔知著得我靚唔靚呢?

公公生日

12月4日

今日係公公生日,我約左去黃大仙飲茶,同行仲有太嫲同拉叔一家,我送左囝囝返學後就去,由10點坐到2點先走.之後送埋太嫲返家再同姑姑傾多陣才去接囝,時間剛剛好.今晚我地好早食飯,因為放學去買左上海菜回家就即食,6點就食完啦.早d搞掂早d瞓,yeah.

今日早餐:熱牛奶,果醬三文治
午餐:雞絲鮮冬菇椰菜絲炒蛋絲,大豆芽菜蕃茄煮瘦肉,紅米飯+蘋果
茶點:南瓜蓉,牛肉粥+餅乾

去視察環境

12月3日

由於下星期要去凱旋門做清潔,所以今早送左囝囝返學,就坐車去睇下環境,計下要幾耐車程,
甘我因住唔好遲到麻.之後約左同學去飲茶吹水,今晚又唔駛煮,去嫲嫲家食飯.
放學終於買到柏宇愛吃既奄春蛋,佢食過一次之後就成日叫我下次再食呀.
但要凍既時候先有得買.所以都幾難搵架.唔知佢等陣見到會唔會好開心呢.
另外今早學校走火警,d小朋友嚇到喊,因為實在太大聲啦.晚上柏宇扭計時,竟然用頭去撞我鼻樑,
痛到想c.個囝真係好臭脾氣呀.

今日午餐:粟米燴豬排,甘荀蕃茄椰菜瘦肉湯,小餐飽+梨
茶點:熱牛奶,粟米片

蛋榚王

12月2日

今日早上返學已經買左芝士飽俾柏宇一路行一路食,回校又食多次早餐,放學話想食西餅,甘好啦,10元3件,就買3件啦.回來佢揀左一件,甘我又食一件,食食下佢要我俾佢食一啖我個件,無幾耐又要咬多啖,
但佢個件就唔俾我食,食晒唔夠仲想食埋第3件.人仔細細甘食得.等陣食唔落晚飯就打patpat先得.
好在最後都食得ok.係夜左少少瞓.總括今日都好乖架啦.

今日早餐:粟米雞肉粥,餅乾
午餐:西蘭花魚塊,南瓜栗子炆瘦肉,白飯+提子
茶點:熱牛奶,雞蛋全麥三文治

婆婆帶返學

12月1日

無錯呀,今日婆婆好早出來一齊帶柏宇返學,8點幾就到啦.婆婆仲拎左c樂冰bb出來添
我地仲帶柏宇去左麥當勞食早餐,可惜遲左少少,所以學校就唔建議婆婆一齊入去啦,只能係門口等.
之後我地去左佐敦飲茶,再行街街,好耐無試過甘開心甘遊閒啦.
我都買左條裙留返新年著呢.差唔多就各自坐車回家啦.

今日午餐:粉絲魚肉煮紹菜,甘荀粟米煮牛肉,白飯+木瓜
茶點:腐竹雞蛋糖水+餅乾

好耐無開工啦

11月30日

今日一早8:20am就返左學校,因為我有份清潔要9點做,甘早老師都未返到,由嬸嬸睇住先.
今早由另一個師姐帶住做,由9點做到2點,$75/鐘,都好開心.要搵多少少錢過年呀.
今日收工都攰到返來瞓左15分鐘,扎醒就去接囝放學,真係要努力搵錢.加油...

今日早餐:白菜瘦肉湯什菜粉
午餐:甘荀絲蛋絲煮牛肉,合掌瓜瘦肉生薏米蜜棗生薑湯,紅米飯+火龍果
茶點:雪梨水+提子麥飽

開放日

11月28日

今日係柏宇學校既開放日,叫左daddy一齊去聽講座,今日學校係唔會有老師代照顧小朋友,
因為佢地要接待出年入讀既新童家長.我地剛好坐係校長隔離,講座開始左一陣,柏宇扭計話要去老師度,
校長為免我地聽唔到,於是都安排左老師陪佢入房玩.之後仲去班房參觀柏宇做既蝴蝶勞作,真係幾靚架.
校長都話柏宇一見到我地就會好扭計,平時係學校係唔會甘樣架.真係無佢辦法.
之後全部家長走晒,老師佢地大合照,柏宇都要等到老師影完相,say埋goodbye才肯走.
之後去左公園玩左一陣就走啦.因為佢daddy話太多人,好易撞親喎.

同我say bye bye

11月27日

今早一路行返學一路要我唱歌俾佢聽,我抱住佢唱歌,真係索晒氣架.
返到去,自己行入課室,唔喊,仲主動同我say bye bye,之後坐低食早餐,我好開心同安慰,
因為佢習慣左學校既生活啦.無再扭話唔返學唔著校服,入課室前亦無扭要巾仔及紙巾,又唔駛我抱入房.
臨走前仲回應返飛吻俾我添.真係一路打字都一路笑.


今早早餐: 熱牛奶,果醬麥飽
午餐:免治牛肉粟米粒紅椒粒炒蛋,木瓜瘦肉雪耳湯,紅米飯+火龍果
茶點:雞蓉芝士薯蓉,清水

愛心早餐

11月26日

昨晚接左公司電話,叫我今日唔駛返啦.無所謂啦,甘今早就同柏宇係家食愛心早餐
今早整左火腿蛋三文治+維他奶,柏宇食得好開心
之後柏宇話要著片片,我話唔好啦,醜怪呀.之後佢話肚痛,甘我問佢係咪想去便便,佢話係,
之後真係痾左好多呀.原來佢唔係扭計,真係有需要既.不過佢都好叻,識同我講佢肚痛要著片.
但今日就遲大到啦.返到學校放低佢就走啦,
放學老師話佢今日好叻,獎左個大熊仔貼紙俾佢,因為佢今早喊左一陣好快收聲,
而且成日都無扭過要紙巾.好大進步.我聽到都好開心.
佢又開始慢慢適應緊啦.加油!

今日午餐: 魚肉蒸豆腐,瘦肉草菇煮節瓜,白飯+提子
茶點: 熱牛奶,蒸蛋榚

提早收工接放學

11月25日

昨晚同老闆講左今日開始要收3:30pm,甘我可以準時接走囝囝,又可以早d買餸煮飯,唔駛晚晚搞到甘夜瞓.
今日柏宇都仲有喊,不過無甘勁啦.放學接佢時都幾開心.不過之前喊得勁,所以又開始咳啦.
唯有食返上次剩低既藥水啦.
今晚daddy唔返來食,我整左囝囝最愛既冬菇粟米雞肉飯,佢食左1.5碗呀.仲話要食,不過佢既肚仔已經好脹啦.
真係唔知飽架.

今日早餐: 什菜牛肉湯什菜粉
午餐: 椰菜絲甘荀絲芽菜瘦肉蛋絲炒上海粗麵,粟米生菜雞絲粥+木瓜
茶點: 芝士醬三文治,熱牛奶

一齊正常

11月24日

自從昨晚俾晒手巾及紙巾柏宇,佢就無再扭計啦.
今早喊係因為佢唔捨得我,之後老師都話佢好快無事啦.
今日按校長要求,我拎左一卷廁紙及6條手巾仔放係學校,
等校長得閒時就同柏宇做test,為期一個月,睇下佢有咩問題,今日暫時就唔覺佢扭得太緊要.
甘唯有大家一齊努力住先啦.
我今日都同公司老闆更改以後要提早半小時收工,因為放4點,返到去接柏宇都5點,仲要買餸煮飯,
越整越夜,變左亞囝又要夜瞓,又要早起身,寧願搵少d,早d搞掂屋企,早d瞓好過啦.

今日早餐:白菜雞絲菠菜麵
午餐:南瓜煮瘦肉,牛肉蕃茄洋葱湯,紅米飯+梨
茶點:朱古力蛋榚,熱牛奶

第一日返pt

11月23日

今日第一日返part-time,由於要一個鐘車程,我7:45am就要叫柏宇起身,8:20am出門,8:45am返到去食早餐,
我要趕9點鐘既車,本來今早好地地,點知返到去又喊,已經俾左1條手巾1張紙巾佢,都仲要扭多條,唔俾就喊,
我唔理佢,去放好晒d書包,佢就係大堂越喊越大聲,結果我忍唔住大聲鬧佢,話唔去湊佢啦,送佢去寄宿啦.之後就趕住返工,放工又趕去接佢,本想約校長傾下柏宇既問題,但校長忙星期六既開放日,要到12月2日才有時間同我傾.點知放學時見到我,問我情況,見我都好無助,於是佢都即時抽時間同我傾下囝囝既問題.
我覺得柏宇好似成個人都變左甘,講任何野都say no,永唔會聽你講,而且又改左唔要手巾要紙巾,唔俾就喊,不停重覆又重覆甘要求,務求你俾佢為止,無論我好言相向對佢講道理,或係大聲鬧佢唔理佢,佢都自言自語.真係除左瞓覺之外,佢就全天候疲勞轟炸緊我,又不停挑戰我地,校長都覺得佢係學校同屋企係有好大分別,
學校係好乖好聽話,唔會扭要紙巾,手巾都唔係成日要拎住,但一離開學校就會好扭計,不停要求多多.
總結只知柏宇係要人成日留意佢,鐘意人讚佢,佢自專心係好強,樣樣都要話事.為人好固執,好記仇.
暫時校長建議試下俾紙巾佢,去test下佢會否好似手巾甘,滿足左佢之後就唔要呢.定還是佢只係心癮,
另外都帶少量紙巾及手巾回校俾校長去test柏宇係唔同環境見到熟識既手巾及紙巾,會否同樣反應,
再試下從中搵下問題所有.另外校長話佢唔排除係語言及IQ俾別人高,所以成日鐘意挑戰人,不過要等5歲才可去TEST是否資優生.呢種小朋友,下下要同佢鬥智鬥力,大家要打持久戰,邊個捱得耐最後就會贏.
叫我暫時忍耐下,儘量唔好鬧佢,要心平氣和同佢講道理,睇下幫唔幫到佢.亦希望可以改善同柏宇既關係.
唔知要同柏宇鬥智鬥力到幾時呢?

今日午餐: 節瓜甘荀炆雞排,菠菜煮瘦肉,白飯+蘋果
茶點:喳咋,餅乾

超級對抗

11月22日

今早起身,亞囝已扭計要紙巾,又喊,我氹佢講道理足足50分鐘,真係好攰,又唔夠瞓,又俾佢轟炸我.
今日去左德福睇熊仔裝飾,點知去到又發脾氣叫走,話唔影相,總之我話去東,佢就去西,
全部say no.唔會聽你講野既,c未,俾佢激到吐血.
成日為左紙巾手巾喊好耐.你唔俾咩,佢除左喊,仲好似念經甘不停講,不停重覆去哦你煩你,
務求令你滿足佢,無論我講咩,佢都唔理,自顧自講,佢要係咬牙切齒甘講,真係好學唔學,學晒我之前對佢既語氣表情聲線,問你服未,真係困佢係床都唔驚,喊左一陣就唔喊,又不停去重覆要求點點點......
點有小朋友甘固執架.我都無佢辦法啦.聽日又要求救校長啦.好想快d解決問題呀.大家都好過呀.
佢又唔駛成日喊,發脾氣去表達自己,我地又唔駛甘勞氣.

再返playgroup

11月21日

好耐無返playgroup啦,今日同柏宇返去玩下,無返3個月,都仲係甘曳曳豬周圍走,唔肯坐定,影響埋其他小朋友.一如以往唱唱跳跳,好快過左45分鐘落堂啦.之後去左買校服,因為老師話柏宇日日都整濕2條褲,甘我地之前買得3套,根本乾唔切,學校借俾柏宇既又太大條啦.一路行一路跌.所以都係買多2條替換.
今晚daddy心血來潮,話去附近既8度海逸酒店食buffut,估唔到即晚訂都有位,仲可以由6點食到10點半,每位都係$298,不過野食唔太多,有魚生壽司,即煮湯粉,牛腩,燒牛肉,熱食10款,中西湯各1款,燒味,凍海鮮(長腳蟹,螺,生蠔,蝦),雪榚,日式麵飽,什果刨冰,朱古力噴泉,蛋榚,生果,凍小食,沙律,咖哩及迷你甜品.
味道ok,最好係佢refill野食係好密,亞囝都食左好多蛋榚同麵飽,因為真係好好味,我最尾好飽都仲要食多個飽,實在太軟熟啦.我地食左2個鐘,9點就走啦.真係好少buffut可以食4.5小時架.
下次有機會同家人來食多次先.不過記得自備小朋友既餐具,佢無得提供架.

同校長詳談,獲益良多

11月20日

今早返學前,本來可以同柏字去食麥記早餐,但佢又為左紙巾係大堂喊左20分鐘,
氹同鬧都無用,最後只可以買個飽一路行一路食.返到學校,校長都就以上事件同我傾左半個鐘,
因為佢都覺得柏宇有點倚賴手巾仔及紙巾.以佢讀過兒童心理學黎講,佢話柏宇有可能將手巾當做玩具,
叫我試下每日俾佢自己揀5條,講明當日只係有5條可用,如果跌左或整污穢,都無架啦.
跟住叫我將佢玩手巾仔既時候拍低,俾佢日後分析研究下.睇下佢係有戀物癖還是佢覺得巾仔得意想研究.
同埋睇下俾左佢之後,佢既脾氣有無改善.
結果係佢一拎到d手巾,就同我講好多flower花花,好靚星星,有紅色red,藍色green,有yellow,跟住將條巾仔整成一個晴天雨天公仔甘樣,放係鼻邊聞.之後去邊都拎住個埋手巾,成晚都無咩發脾氣,都叫做ok既.

今日午餐:瘦肉蒸雞蛋,蕃茄豆腐煮魚肉,白飯+提子
茶點:熱牛奶,果醬麥飽

好多野食呀

11月19日

今日返學都仲有少少喊,放學就買左豆花俾佢食.
今晚我地打邊爐,甘凍第一次係屋企打,柏宇一見到甘多野,就做左個好誇張既表情話"好多野食呀"
佢今晚亦真係食左成碗滿既腸同丸,好勁.
由於食完都成10點,仲要洗碗沖涼,個囝又係唔俾daddy陪佢瞓,要等埋我.
所以又搞到佢成11回幾先有得瞓,仲要半夜又扭計話唔瞓覺,
天氣凍左,一晚我都醒好多次,睇下個囝有無冷親,都真係瞓得唔淋架.
所以早上咪都唔多願起身囉.

今日午餐: 椰菜花小甘荀雞翼,節瓜蛋絲煮瘦肉,白飯+梨
茶點: 菜心瘦肉湯通心粉

喊足45分鐘

11月18日

今日好早起身返學食早餐,放學買左佢要求既燒賣及腸仔食,
之後又因為要扭紙巾,我唔俾佢,佢就喊足45分鐘.同佢沖涼時,喊到咕咕都縮埋左,
涼完涼都唔收聲,就困左佢係bb床,關埋燈,我企係房門口同佢講條件.
要佢妥協唔拎手巾仔,唔拎紙巾才放佢出來.
出來之後佢叫我走,話唔要我,於是我同佢講,叫佢以後叫巾仔煮飯俾佢食,同佢沖涼,帶佢返學.
媽咪就走啦.佢一聽完即又喊住叫我唔好走,佢唔要巾仔啦.甘我就再同佢講道理,
同埋要佢將巾仔放床邊,唔准拎住,如果佢掛住巾仔,可以去摸下佢,
之後佢就扑係張枱瞓左啦.
有時真係俾佢激到我好嬲,想唔發脾氣都唔得,因為佢真係好無理喊唔停.
點氹點鬧都係唔理人既.完全無佢辦法.
佢喊又會咳,而且講左後果佢知,佢都係不停喊,唔通條巾仔真係甘重要?

今日早餐: 生菜牛肉粥+餅乾,
午餐: 紫椰菜,白椰菜蛋絲燴雞柳,蓮藕紅綠豆排骨湯,紅米飯+蘋果,
茶點:熱牛奶+甜粟米

豆漿豆花

11月17日

今早答應柏宇,如果放學乖,就會買豆漿或豆花俾佢,
點知佢隻貪心豬兩樣都要,甘我就俾豆漿佢放學飲,
豆花就留返做飯後甜品,唔知係咪將d豆花翻蒸出左水,
我食完即肚痾左2次.不過亞囝就無事.
下次都係即食好d.

今日午餐: 冬菇馬蹄蒸豬肉,烚西蘭花,紅米飯+木瓜
茶點: 熱牛奶+蒸蛋榚

返婆婆家

11月16日

今日送左囝囝返學,就執晒d唔啱既冬天衫俾婆婆送俾人,
因為實在無地方啦.不如送俾d要幫助既人啦.
甘又可以順便探下婆婆.婆婆仲買定晒d餸俾我拎走,驚我趕唔切.
真係辛苦晒您啦,婆婆,下次唔好啦,留返多個錢傍身啦.

今日午餐: 茄汁蕃茄雞絲青豆燴意粉,甘荀薯仔椰菜蕃茄牛尾湯+火龍果
茶點: 蘋果南北杏蜜棗水+甜餐飽

流好多血

11月15日

今日中午我煮麥皮時,突然聽到柏宇打爛野,之後佢叫我,原來佢打爛左個相架,佢諗住執返佢時,俾d玻璃割損左手第2隻手指,流左好多血,我當時都分唔清佢到底有幾多隻手指損左,因為幾隻手指都有血.
甘即刻同佢沖水,check左無碎片,才同佢貼膠布,仲教佢以後唔好搞啦.
佢都好叻仔,無喊過,只係好驚,俾個教訓佢等佢下次記得再搞玻璃就會整損流血好痛架啦.

轉新醫生

11月15日

今日見柏字d鼻水係綠色既,即時同佢去睇屋企附近既醫生,
個醫生雖然講野串d,不過佢又講中晒亞囝既病情,仲話好多醫生都斷錯証,
唔會有甘多氣管炎,佢話柏宇都只係鼻發脹,積左好多鼻水,只要流返晒出來即可,
仲話會越流越多,越綠,越臭,返到去真係不停流出來,望就望呢個醫生夾柏宇啦.
甘就唔駛下下甘凍去紅磡排長龍等啦.慳時間仲慳錢添

又病啦

11月13日

今日放學老師話柏宇有鼻水,少少咳,我仲book左今日去打流感針,都要取消啦.
校長今日同我講,話佢發現柏宇最近成日要人攞紙巾俾佢,原來係除左佢要搵安全感外,
主因係佢想引人注意,想人多d留意佢,可能佢平時玩開既玩具玩厭左,又或者佢好寂寞,先至有甘既情況.
校長唔講我真係唔知,甘我問校長係咪即係代表我地平時好少理佢,所以佢先至甘樣.
校長就話唔一定,不過如果日後佢想要甘樣野,唔好成日甘快滿足佢,佢要求幾次才俾佢一次.
甘慢慢去改善佢囉.

今日早餐:熱牛奶,果醬三文治
午餐:雞絲鮮冬菇椰菜絲炒蛋絲,大豆芽菜蕃茄煮瘦肉,紅米飯+蘋果
茶點: 南瓜蓉,牛肉粥,餅乾

要求食麥當勞早餐

11月12日

今日柏宇要求食麥當勞早餐,之後就返學,點知都係扭,今日校長仲親自出馬抱佢,都係不停喊,
唯有等佢見唔到我,冷靜下啦.

今日午餐:粟米燴豬排,甘荀蕃茄椰菜瘦肉湯,小餐飽+梨
茶點: 熱牛奶,粟米片

喊足一日

11月11日

今日放學時老師話柏宇除左午睡之外,其他時間全程喊,未收過聲,仲有不停要紙巾,真係俾佢激c.
不過佢真係太耐無返學,老師都話要重新再適應過先得,唉.辛苦老師啦.

今日午餐:西蘭花魚塊,南瓜栗子炆瘦肉,白飯+提子
茶點: 熱牛奶,雞蛋全麥三文治

繼續扭計

11月10日

昨晚應承今早去麥當勞食早餐,食完乖乖返學,點知又係狂喊,
今日仲要得1個老師,我送左佢入課室,佢又出返來,老師都理唔到甘多小朋友.
我想走都唔得,於是校長出來幫手去抱住柏宇,甘我就即刻走啦.

今日午餐:粉絲魚肉煮紹菜,甘荀粟米煮牛肉,白飯+木瓜
茶點: 腐竹雞蛋糖水+餅乾

重新返學

11月9日

無返學甘耐,都預左柏宇會唔慣,會扭計.
今日專登買天維他奶氹佢,放學老師話佢只係開頭狂喊,之後就無事啦.
等佢再重新適應下啦.過渡期姐.

今日午餐: 甘荀絲蛋絲煮牛肉,合掌瓜瘦肉生薏米蜜棗生薑湯,紅米飯+火龍果
茶點:雪梨水+提子麥飽

結婚紀念

11月8日

今日係結婚5週年,不過我諗daddy唔記得左,因為佢自己約左朋友去街,唔返來食飯.
不過無所謂啦,我同囝囝係屋企食一樣開心.
今晚就好搞笑,煮左餐肉通粉,我已食左一碗,亞囝仲係食左細半碗,甘當我食第2碗時,發現有d好似蟻既物體,
我仲諗係咪d味粉既蔥咋,點知再睇真d,有超過1x隻,即時唔俾囝食,去煮公仔麵,點知又咸又淋,大家都唔想食,
最終烚左2隻蛋,每人一隻,食完飲湯就算啦.呢餐飯食足2個鐘,唔知以為我地食緊法國菜呀.

買平貨

11月7日

今日柏宇33個月大啦.(2歲9個月)
今日返左屯門,去左行街街買冬季衫俾柏宇.依家小朋友既衫真係好靚,特別係女仔既衫,造形同大人既無分別,
雖則靚,但無左童真.今日買左幾件衫,平均都係30元/件,都幾抵,柏宇d衫多數都係領口太大,所以要買過d貼身既俾佢,以免成日冷親.好好保重身體,亦順便保重亞媽既荷包.

搶埋我支珍寶珠

11月6日

今日見柏宇好返好多,都無食藥啦.
下午佢瞓醒,甘就獎佢食埋粒迷你士多啤梨味珍寶珠,我就食朱古力味珍寶珠,
食到尾,佢連我剩返少少既都要搶埋去食,俾佢激c,可能佢太耐無得食,所以忘左形呀.

警察拉架

11月5日

今晚沖涼時,柏宇玩啫啫,跟住自己話,唔好玩啫啫,警察會拉架.
我問佢邊個教架,佢話係老師喎,唔知真定假呢?
跟住我問佢,甘曳曳豬會唔會俾警察拉,佢話唔會,甘唔怪得柏宇曳曳豬啦.

舒服好多

11月4日

柏宇昨晚都可以一覺到天光,差不多好返啦,甘我都安心d.

好耐無試過一覺瞓到天光

11月3日

昨晚聞左氣,仲叫DADDY買左部放濕機,柏宇終於可以一覺瞓到天光,仲要係無咳既.都係一個好大既進步.
今日成日都咳得好少,亦無之前咳到個頭紅晒既情況.只係仲有好多鼻水姐,唯有勤D同佢抺清D鼻涕啦.
今日柏宇同我講,柏宇好靚仔,大個仔都好靚仔.果真係貪靚豬仔.

排隊用左半日

11月2日

今日下午3:45PM去到診所,要排2X人,唉,今早己打左10次電話去掛號,都係BUSY無人聽,
姑娘叫我去行下先,差唔多要等2個鐘,甘我同柏宇行左個多小時,我攰到行路宦可以瞓得著,
5點返去問,都仲有12個先到,結果要6點先到我地睇,醫生話柏宇既氣管已好左6成,不過佢既鼻水越來越勁.
今次都要聞氣,又係聞聞下瞓著左,甘就由佢瞓啦.醫生話佢既情況唔係好嚴重,唔駛成日聞氣.甘我都放心D.
不過又再轉左鼻水藥.因為D鼻水係綠色既,即係發炎啦.我諗佢會好快好返架啦.

好殘忍

11月1日

昨日睇完醫生,又低燒過,仲係有咳,不過無甘勁.
今日中午瞓醒就有d扭計,我氹完佢唔聽咪鬧囉,佢就想喊啦,
我就話唔准佢喊,因為一喊就會入風,就會咳同嘔,到時又要睇醫生食藥,係佢辛苦咋,無人幫到佢架.
如是者佢最後都忍唔住,放低晒d手巾,入左厨房,雙手揞住個咀,係度飲泣,但又唔敢喊出聲,因為驚俾我鬧.
結果又係俾我喝返佢出來,佢就忍唔住係我面前大喊啦.但問心,我都知自己好殘忍,唔俾佢喊都係想佢唔好咳得甘勁,個刻見到佢甘樣,我自己都想喊呀.唯有等佢喊完,無甘唔開心,再同佢講道理啦.
診所姑娘今日都有打來問柏宇情況.我話佢知幾好.
點知話口未完,佢臨瞓時又係咳到嘔,仲連咳2x下,我真係無野可以幫到佢.
個刻我都想病既係自己,佢半夜直頭咳到坐左起身瞓覺呀.我等佢瞓左先扶佢瞓低咋.
柏宇快d好返啦,見到都肉赤呀.

去覆診

10月31日

今日下午要再去覆診,因為燒下退下,雖唔係高燒,不過柏宇咳到嘔,個頭又咳到紅晒,又話個心口好痛.今日2點35分去到排隊,3點開門,睇完都4點啦.醫生話柏宇咳到條氣管收窄左,所以d痰咳唔到上黎,個頭咪會紅囉.仲要柏宇聞氣,係幫佢舒緩氣管,等佢擴張返,可以咳得起d痰,唔駛唔上唔落甘辛苦.只需聞8分鐘就得啦.
柏宇聞氣唔驚,但就驚部機d聲,佢聞聞下都舒服到瞓著左啦.希望真係幫到佢啦.
之後我地去左夢幻世界玩,又係俾柏宇夾糖,玩左一陣,食埋飯就走啦.不過柏宇就無食,全程瞓,可能佢好難得可以條氣管甘舒服,於是就狂瞓囉.

無得去旅行

10月30日

今日係柏宇學校搞既第一次親子旅行日,由於昨晚柏宇翻燒,仲要成晚都唔退燒,所以無得去啦.
daddy請左假都要一齊留係屋企.唔緊要啦,我地今日就將預備去旅行食既野食晒佢啦
早餐整左火腿蛋三文治,餘下既腸仔及什丸,我就整左喇唦什丸米線.清晒,亞囝既晚餐我就另外煲蕃茄薯仔湯去煮通粉.大家都食得飽飽.好在柏宇中午退左燒,否則佢又食得少,只飲水,好易干燒架,唉.肉痛c我,越來越瘦.

休息一天

10月29日

今日一早7點幾出門去紅磡排隊睇醫生,我8:15am去到,8:30先開門,我都要排第6個,
睇完返到家都10點啦.唉...成日都要去排隊等都唔係辦法,冬天咪要係門口吹風囉.
今日醫生話柏宇只係普通感冒,甘我都安心d,不過就話最好留家休息,唔好吹水啦.
甘即係明天無得去學校旅行囉.不過我都買定晒d野食先.如果柏宇情況ok,就去啦.

daddy第一次送柏宇返學

10月28日

今日daddy返晏,於是一齊送柏宇返學,等daddy可以睇下柏宇幾叻仔,可以自己去洗手抺手,入課室食早餐,
不過今日既早餐同我之前睇既餐單唔同,放學問老師先知佢地既餐單同網上既唔一樣,叫文書姐姐send過一份俾我就得啦.今日我整定芝士腸+杯仔蛋榚接囝囝放學去嫲嫲度食tea.放學己覺得柏宇又d熱,老師話佢今日有鼻水添.返到屋企探熱,真係發燒呀.唉.佢本身氣管未好,仲有咳,所以好易再受傳染.希望好似上次甘快d退燒啦.

今日早餐: 粟米雞肉粥+餅乾,午餐: 紫椰菜,白椰菜蛋絲燴雞柳,蓮藕紅綠豆排骨湯,紅米飯+蘋果,茶點:熱牛奶+甜粟米

一齊正常

10月27日

放左甘多日假,今日柏宇返學都無扭計.一齊正常.
午餐: 冬菇馬蹄蒸豬肉,烚西蘭花,紅米飯+木瓜,茶點: 熱牛奶+蒸蛋榚

一家三口超瘋狂

10月26日

今日我地一家去左紅磡夢幻世界玩夾糖果,由柏宇及daddy比賽夾得多,有時原來亂夾都會勁過睇準位先夾,
柏宇由入金幣到夾糖果,都係事但甘按製,但就夾左好多糖,連daddy都話佢好叻仔.
每次當柏宇夾到糖時,佢都會嘩嘩聲,跟住望住我大笑,好開心.結果佢玩玩下唔玩啦,因為佢個目標己經去左夾左出來既糖度,佢不停係個箱度將d糖拎返去個袋度,我破例俾左2粒迷你珍寶珠佢食,我地ttl夾左三百幾粒糖呀,真係有排食,下次見到表哥表弟要請佢地食先.
另外今晚整左雞蛋及粟米壽司,柏宇一口氣食左十件,我都有d擔心佢會否食滯,咩真係甘好食咩,定係佢貪新鮮呢?

痾左8次尿

10月25日

今日柏宇唔知食左咩野,只飲左好少水,都去左8次尿尿,好犀利呀.
今日拜完太婆,去左大伯家,都係例食火煱,今晚仲有腐竹糖水,當然食埋先走啦,
返到家柏宇就瞓左啦,就由佢做一晚DIRTY豬啦,明早才洗白白啦.

舟車勞動

10月24日

今日十分開心,因為約左姨媽及婆婆去一日遊,婆婆先來我家一齊出發,我地由土瓜灣坐巴士去尖沙咀,再JOIN左姨媽坐船去中環,昊昊係第一次坐船咋.柏宇就上星期己坐過,之後再坐巴士去纜車站,再坐纜車上山頂,食完午餐行左一陣影相,就坐返纜車去山腳,我地之後坐電車去中環坐船返尖沙咀,再轉巴士去旺角食飯,柏宇同昊昊都係第一次坐電車,柏宇仲第一次坐纜車添.我都好耐無坐過纜車及電車啦.好懷舊.
今日無左班男人係度,好FREE,D小朋友都玩得好開心,最開心就係去左香港公園個洒水既涼亭,2個小朋友行來行去玩水,成身都濕晒,連鞋都濕埋,柏宇仲不停叫婆婆帶佢入去玩多次添.最終我都括出去,濕鞋都帶柏宇玩多次先走.等佢開心下.
今晚去左旺角食飯,飯後坐小巴回家,10分鐘就到啦,好快,柏宇一返到佢就瞓,我要不停拍醒佢沖涼,
睇黎佢今日真係好攰啦.
期待下次全女班再玩.(小孩例外)

柏宇好開心

10月23日

今日學校教師培訓日,唔駛返學,我約左幾個朋友飲茶,佢地都想探下柏宇,我昨晚整定個大芝士蛋榚,俾佢地今日食,我自己昨晚都忍唔住出爐食左2小件,今早柏宇早餐又食左2小件,仲話好味,唔肯請姨姨食添.
今早我一早拎d吉片片袋去萬寧換學習褲,每人限換一包,我有7個袋,結果行左3間才換晒,其間仲搵左d路人幫手換添.搞左成個鐘,不過甘樣可以慳到4x元,都值既.
我地飲完茶後,全部上左我家食蛋榚,傾計,我就忙返叮食物俾朋友,云姨姨及ann姨姨就陪柏宇玩,
佢地咩都玩一餐,柏宇就只要有人同佢玩就開心架啦.佢仲當眾表現彈琴唱歌,俾云姨姨錄低晒.
我發覺我都好少時間陪佢玩,日日都係放學,沖涼,食晚飯,瞓覺,真係要好好利用假期時間陪佢玩先得.
咪下次只要姨姨,唔要媽咪陪佢玩,甘點算呀.

狂咳

10月22日

昨晚開始已咳得好勁,今早都一樣,食左猴棗散,但老師放學話佢都好多咳及鼻水.
都要大掃除先得啦.因為一有塵佢就會咳到停唔到,我之前都試過,真係好辛苦架.
做亞媽既好肉赤架.又幫唔到佢.真係心都痛埋.
今日午餐: 粟米燴豬排,甘荀蕃茄椰菜瘦肉湯,小餐飽+蘋果, 茶點:熱牛奶+粟米片

自己識去拎書包及鞋

10月21日

今日放學,柏宇識得去分別放自己書包及鞋既柜度拎野.好叻仔,佢終於認得到自己d野啦.
佢仲好開心添,我都即時同老師講,甘老師都讚佢好叻,佢就會好開心甘跳來跳去啦.
今日午餐: 西蘭花魚塊,南瓜栗子炆瘦肉,白飯+蘋果,茶點:熱牛奶+雞蛋全麥三文治

添食

10月20日

今日帶柏宇回校食早餐, 食佢唔多喜歡既麥皮,甘我係門外睇住佢食,
老師俾左半碗佢,食完之後,老師問佢要唔要,佢竟然添食多半碗,好出奇,因為佢之前係茶餐廳食過一啖就唔食,
所以今日佢既表現我就覺得好特別囉,都好既,佢返到學校咩都食,唔揀食.對佢既健康都好d.
今日早餐: 熱牛奶蛋花麥皮,午餐: 粉絲,魚肉煮紹菜,甘荀粟米煮牛肉,白飯+木瓜,茶點:腐竹雞蛋糖水

整色整水整壽司

10月19日

今日又搞新意思,就係整壽司,因為想月底去親子旅行時食,所以要事前練習下先得,
由於第一次整,所以只用左腸仔,火腿,蛋做餡,即使唔成功,都唔駛嘥好多錢麻.
第一次卷,d紫菜整唔斷,包好才用刀切,好肉酸,第二次卷,剪好左紫菜鋪上去,放左飯又移左位.唔得
結果我決定只卷飯,再包餡,再鋪飯,壓好之後,才包紫菜,甘就靚仔晒啦.
我仲帶左15件壽司去等柏宇放學再去嫲嫲家食,柏宇食左4件,好捧場.
之後dinner又再食多3件,total食左7件,好勁呀.我都係食4件咋.
佢最鐘意係蛋壽司,好好味.第一次整有甘既成績,我有信心月底才以保持水準既.
今日學校早餐:白菜,瘦肉湯什菜粉,午餐:甘荀絲,蛋絲煮牛肉,合掌瓜,瘦肉,生薏米,蜜棗生薑湯,紅米飯+火龍果,茶點:雪梨水+提子麥飽.
另外今日沖涼時,柏宇問布樂言係邊呀,我都surprise,佢竟然識講得出同學仔既名.
問佢仲有邊個同學仔,佢就答鄭慧雅.之後問返老師,原來佢地真係記到同學仔既名架.

去郊遊

10月18日

今日同爺爺,嫲嫲,大伯一家,我地一家去左索古灣行山,行去南"亞"島,仲食左一餐海鮮餐,一餐豆腐花.
柏宇今日好叻仔,差不多行足全程,又食得多生果,佢今日玩得好開心.
回程係巴士仲瞓著左,仲賴左尿添.
今日終於帶左佢去坐船,之前有俾圖佢睇過,等佢可以加深對船既認識.自己感受一下.

以後唔駛煮晚飯???

10月17日

今早daddy同我講以後唔駛煮佢dinner,問佢點解,佢答我唔返咪唔返,真係唔明點解,
唔開心既野唔想記低.遲早會解開呢個謎.

買冬季校服

10月16日

今日唔記得左帶錢返學校買校服.返到去見到先醒起.
即時俾柏宇入課室食早餐先,然後去奶奶度借錢再趕返學校買,
經主任提意買左2薄1厚既運動服,全部係最細既size,再買埋件校褸,
校褸加細碼都仲有一隻手掌甘長,校長建議我買大一個碼,甘就可以著多幾年.唔駛嘥.
可想而知柏宇幾細粒呀.
今日早餐: 熱牛奶+果醬麥飽,午餐: 免治牛肉,粟米粒,紅椒粒炒蛋,木瓜,瘦肉,雪耳湯,紅米飯+火龍果
茶點:雞蓉,芝士,薯蓉+清水

唱k

10月15日

好耐都無去過唱k啦,今日同埋d朋友去左neway,由11點玩到3點,唱左4個鐘+lunch buffut,
每人都係46元,好抵玩,我仲話我地做家務助理1個鐘可以搵到50元,就夠玩4個鐘啦.十分抵.
可以將唔開心既野抒發晒.期待下次再唱過.
今日柏宇學校午餐:魚肉蒸豆腐,瘦肉草菇煮節瓜,白飯+提子,茶點: 熱牛奶+蒸蛋榚

答問題

10月14日

今早落大雨,亞囝拎住把遮,我問佢:你拎唔拎到架.佢答我,唔重架.
都唔知佢係咪真係明白我講咩.
跟住到樓下,管斑員叔叔不在,佢問我係邊,我話行開左囉,之後就出大門返學,
行左2步,佢大叫叔叔,甘我擰返轉頭睇,真係見到管斑員叔叔,柏宇仲同佢講拜拜,之後仲話下次見啦.
我即時O左咀,好肯定係老師平時同佢講得多,佢咪識同人講下之見啦.
好開心,因為佢係學校係學到野,仲要係有禮貌既.
今日係佢係學校食早餐:什菜牛肉湯什菜粉,午餐:椰菜絲,甘荀絲,芽菜,瘦肉,蛋絲炒上海粗麵,粟米生菜雞絲粥+木瓜,茶點:芝士醬三文治+熱牛奶

婆婆生日快樂

10月13日

今日送左柏未返學,我返左屯門搵婆婆食LUNCH,仲叫舅父幫我剪短晒D頭髮.
好幾清爽架.
婆婆仲大包小包整好晒俾我拎走,好似我呢度無街市甘,
不過真係辛苦晒婆婆啦.因為佢用左好多功夫及心機既,錢係買唔到架.
我諗日後亞仔大左,我都會好似婆婆甘,整好晒D野俾佢,心意黎架麻.

今早柏宇好叻仔,入課室後,仲同我拜拜及飛吻,完全無喊到.VERY GOOD叻仔.
今日午餐:南瓜煮瘦肉,牛肉蕃茄洋蔥湯,紅米飯+梨,茶點:熱牛奶+朱古力蛋榚
放學時柏宇仲成件校服都有南瓜漬添.不停同我講返學好開心,食茶點.
仲ENJOY咪好囉,起碼我都放心先啦.

在家學習

10月12日

醫生建議今天在家休息,以免回校散播病菌.
甘今日就同柏宇溫習學校既圖及字咭,圖咭佢約有4-5張唔識,字咭我就負責讀,然後叫佢將字咭放在圖咭上面,
佢都玩左成20分鐘先話唔玩啦.都叫OK啦.
今日唔駛返學,就成日同我講話要返學,俾佢激C.
不過值得一讚係佢好自動自覺食藥,唔駛我勞氣.同埋都好得七七八八,早D瞓準備明天返學.

2點5點8點

10月11日

今日凌晨2點,5點,8點都KEEP住CHECK柏宇有無發燒,時有時無,所以都係九點鐘去到診所睇醫生,
因為之前佢班有人中左豬流感,安全D好,醫生話佢好鬼精神,普通感冒姐,仲話我好鬼緊張,少少燒就問要唔要CHECK係咪豬流感,咳左星期就問會否變哮喘,要唔要食青蛙丸.我承認我好敏感,不過醫生都話,敏感都好既,起碼今次亞囝熱,我都SENCE到佢作發燒,有唔妥呀.
今日本來要去柏言生日會,都取消唔去啦.留係屋企休息.叫嫲嫲幫我俾封利是佢算啦.
等柏宇第時大個,俾佢睇返媽咪以前點湊大佢,等佢日後有小朋友時,都要幫手照顧,唔好大安指意.

婆婆生日飯聚

10月10日

今晚提早同婆婆慶祝生日,我同柏宇中午先行去屯門,等昊昊回來一齊玩,
昨日整定左一打壽飽送婆婆作生日禮物,仲專登去買左個盒裝,婆婆仲以為係街買既添,
婆婆,係街買邊有甘"肉酸"呀,不過婆婆甘講我都好開心,因為假可亂真麻,定係婆婆想氹我開心先至甘講呢?
今日姨媽教左我好多湊仔方法,係要強硬d,肯定d,俾佢強烈對比既選擇,希望柏宇唔好再甘大脾氣,
我都會改下自己既陋習,唔好再傳俾個囝啦.切戒長氣,一次起,兩次止.希望下次再見姨媽時,會睇到有改善啦.
當晚食飯雖有少少唔開心,不過大家唔駛擔心我,我no feeling,因為我有仔萬事足,我會做好湊仔呢份工,
我份人係點,熟我既人都知,唔會因為其他人加鹽加醋而對我改觀.所以我唔會嬲,因為會c好多細胞架.又會皮膚唔靚,本身已無咩護膚,無謂再整差佢啦.RIGHT!
昨晚我都覺柏宇個身好熱,今晚飯後就真係發燒啦.好彩只係微燒100.6度.今晚貼住退熱貼先啦.

失禮晒

10月9日

今日午餐:瘦肉蒸雞蛋,蕃茄豆腐煮魚肉,白飯+提子,茶點:熱牛奶+果醬麥飽
今日約左朋友飲茶,由於樓上有人掉煙頭燒燶我地個涼衫帳篷,於是要等管理處來影相出通告.
事後仲要大清潔,所以遲左成個鐘才到酒樓,之後仲要趕返家整飽,由於上次promise左下次整飽拎d俾老師食,
所以點都要等整好才接放學,今日差唔多成5點20分才到學校,柏宇好叻,無喊喎,不過羅老師已放學,甘我就將2個飽飽交俾梁老師,係請佢及羅老師食既.點知老師唔肯收,原來佢地唔可以收家長禮物.
同埋收左野食都要全校老師一齊分享架.2個飽飽,點夠分全校呀.今次真係好心做壞事啦.
唔怪得梁老師面有難色啦.最衰今日趕住接放學無睇火,最後個轉飽飽燶晒唔要得,晒左成6個呀.
否則拎埋返學就夠分啦.甘我話下次我會整多d拎俾佢地,老師叫我唔駛客氣啦.等下星期一問下羅老師係咪唔可以接受家長既食物先.如果唔方便,就唔好為難人地啦麻.
p/s:今晚都係順住柏宇既意思,逐步引導佢係床上聽故事等我沖涼後陪佢瞓,10點多就瞓左,起碼唔駛成日痴住我,又唔會成日喊先啦.如果甘做係得既.我會go ahead.

改變策略

10月8日

今日午餐:椰菜花,小甘荀,雞翼,節瓜蛋絲煮瘦肉,白飯+梨,茶點:菜心,瘦肉湯通心粉
今晚同柏宇沖涼後,我就即刻沖涼,然後陪佢一齊瞓左先,再起身去洗碗,
真係要忍到唔瞓先得,不過都值得,甘樣就可以俾佢早d瞓,又唔駛成日扭計要我抱,始終甘細個,瞓多d好d.

32個月大啦(2歲8個月)

10月7日

今日柏宇2歲又8個月大,今早返學有少少扭計喊喊,買左個芝士條+桃汁做早餐,今日我要趕住去油麻地覆診,
仲順便去埋上海街shopping.當然大有收獲啦.仲買左模用來整壽司添.最開心係醫生話我完全無事啦.
學校午餐:紫椰菜,白椰菜蛋絲燴雞柳,蓮藕紅綠豆排骨湯,紅米飯+蘋果,(本來食哈密瓜,因氣管敏感,改蘋果),
茶點:熱牛奶+甜粟米.
放學時,柏宇見其仔小朋友有人接,佢都未見到我,於是又大喊,其實我己到左啦,不過太多人,我企埋一邊先姐,真係俾佢激c,今晚用左新壽司模整飯,柏宇貪新鮮,差不多食晒呀.不過到晚上sleeping時,又要扭我抱住,又氹又講道理,搞足45分鐘都唔掂,daddy已發火想打佢,最後要daddy強行抱走佢,由佢喊,不過我講左唔准打佢,結果我沖完涼就收左聲啦.我知佢想我多d時間陪佢,佢唔係唔肯瞓,係要我陪佢瞓姐,都要同老師傾下搵辦法應付先.

夜晚唔瞓,日頭唔起身

10月6日

昨晚柏宇係床玩左2個鐘,我瞓左佢都未瞓,結果仲整醒左我添.
唔知係咪因為成個wee唔駛返學,昨日復課後佢就成日要痴住我,
連瞓覺都要我陪先入房,結果又成12點先瞓,今早唯有唔返學食早餐,俾佢瞓到9點先起身啦.
今日午餐: 冬菇馬蹄蒸豬肉,烚西蘭花,紅米飯+木瓜,茶點:熱牛奶,蒸蛋榚.老師話柏宇成日含住啖飯唔食,於是又要餵佢食.不過都食得晒.
由於今日整飽,成5點先去接放學,原來超過4:45pm,就會將全校未走既小朋友group埋係一個班房,等佢地自己玩.柏宇見到我帶埋飽飽接佢放學好開心,仲拎去嫲嫲家一齊食添.嫲嫲都話好味,我就覺得唔太軟熟,
等我下次再試下搓粉唔好甘大力先得.
今日同老師傾過柏宇瞓覺問題,老師即時同柏宇傾計,仲話如果佢晚上唔乖乖sleeping,就叫我打電話俾佢,
甘柏宇之後就乖乖甘應承老師晚上要瞓覺.今晚佢都玩左1個鐘先瞓,不過係自己瞓.其間扭計我就話話俾老師知,
佢就會乖少少,都係一個好開始呀.

第一次回校食早餐

10月5日

今日試下俾柏宇返學校倀早餐,食左全麥餅乾,午餐:茄汁蕃茄雞絲青豆燴意粉,甘荀薯仔椰菜蕃茄牛尾湯+火龍果,茶點:蘋果南北杏蜜棗水+甜餐飽.老師話柏宇全部食晒.甘咪好囉,佢放左成個星期假都係唔多食野.
今早我厘埋一邊睇佢食早餐,佢除左入課室前想喊之外,老師一俾餅佢就乖乖地坐定食,即使其他小朋友喊或扭計佢都無理人地.只係成日用對眼射住人地.好似戒備甘.
其實柏宇都適應得幾好,只要唔見到我就唔會扭計.都好肯聽老師話.
係我自己唔放心,成日要望住佢,睇下佢過得好唔好姐.結果當佢聽緊老師講故事時,俾佢發現到我望緊佢,
佢即時走出課室搵我,甘老師咪截住佢,佢之後就喊啦.我仲諗住同佢say goodbye同錫佢一啖就走啦.
但係就無諗到佢始終都係細路仔,想痴住媽咪,唔識去control自己既情緒.
講真,想同做係兩回事,佢又點會可以好似大人甘,俾我錫一啖就乖乖返去上堂呀.
本來唔喊,待見到我就再喊返,本來平復左既情緒.又要麻煩老師再去平復多一次.
真係為左滿足自己,搞到柏宇同老師又要重新黎過,真係要檢討下.
結果我再次厘埋睇到佢唔再喊,我才走得安心.
下次唔好再甘做啦.累人累己.
另外今日第一次整飽,好得意架.第一次發酵麵飽,係咸左d,不過亞囝話好味,仲食左2個添.

大出血

10月4日

今日行街發現左原來除左蛋榚烘焙店外,油麻地永星里,上海街一帶都有好多厨具店,
整蛋榚既模,撻紙,包裝袋及盒都一應俱全.仲款式又多又平.我下次又多一個選擇啦.
今日都行左好多間,終於買左個電子磅.都有少少肉赤架.始終無收入,唔想亂洗錢麻.

中秋節

10月3日

今晚無煮飯,去左大快活食火鍋,之後同柏宇去左屋企附近既公園玩燈籠同螢光棒.
柏宇玩得好開心,係daddy好緊張佢成日俾人撞到.成日叫我睇住佢,但佢自己又淨係得把聲.
都無佢甘好氣.我反而會珍惜多d時間陪佢玩,多過成日拎住部機同佢影相.
其間有人拎住個會嘖波波既燈籠,於是就有好多小朋友圍住d波波跑跑跳跳.
亞囝就至愛添啦.我真係好out.有d甘好玩既燈籠都唔知,等我下年買返個俾柏宇先.
不過要等佢daddy唔係度先得,費事玩玩下又喝住佢,甘就唔好啦.

愛我定係愛豆腐花呢

10月2日

今日買左碗豆腐花俾柏宇飯後食,食完後問佢下次再買俾佢食好唔好,佢好開心甘答我好.
之後過來攬住我講,我好愛你呀.甘佢究竟係愛我定係愛豆腐花呢?
問佢愛邊樣,佢就淨係笑.呢個正一古惑仔黎架.

氹得我好開心呀

9月29日

今日亞囝突然攬住我話:媽咪,我好掛住你呀,媽咪,我好愛你呀!
之後錫左我一啖,嘩...個傻豬氹得我好開心呀.好冧呀.
我都即時回應返佢我都好掛住佢,好愛佢.
之後柏宇自己唱歌,我聽左好耐先知佢唱咩
吹個吹個大波波,吹個吹個大波波,吹個吹個大波波,小心吹呀,boom
哈哈......好好笑呀.佢唱得好好聽,當我學識後,佢仲要求我同佢一齊唱添.
甘証明佢返學係開心既,佢學到野啦.

停課一星期

9月28日

今日大包小包返學,又落雨,好狼狽.
點知10點幾學校通知,話柏宇個班有一個小朋友中左H1N1(豬流感)
想家長帶小朋友回家,並隔離一星期,我昨晚仲睇晒個餐單,打算明天俾柏宇試下係學校食早餐.
不過今日都食埋午餐先走,午餐有甘荀絲,蛋絲煮牛肉,合掌瓜,瘦肉,生蒠米,蜜棗,生薑湯,紅米飯+火龍果.
中午去接柏宇時,佢已同我講話飲左湯湯,食生果,今個星期五你提燈會,今早專登拎左個燈籠回校,
結果因為成個星期唔駛返學,所以我又大包小包拎返屋企啦.甘我就打算呢個星期自己係屋企同佢玩啦.
留係屋企安全D.

昊昊生日會

9月27日

今日昊昊開生日會,除左我地一家,婆婆,細舅父,大舅父一家,仲請左昊昊2個同學及其家人,total有17日,好熱鬧呀
柏宇開頭好驚架.之後玩熟左,就可以同表哥及表娣一齊玩啦,佢仲唱左happy birthday歌送俾昊昊添.最大進步係佢可以拎住個波波同昊昊及皓云對打.佢以前唔敢架.我好少見佢玩得甘開心架.食物方面,就由姨媽及婆婆煮,姨媽仲親手整左個thomas蛋榚俾昊昊,好靚架.連婆婆都讚左好多次,佢proud of姨媽甘叻.佢真係好開心呀.姨媽整蛋榚既日子俾我少,但比我叻,我自問都整唔到甘靚既蛋榚.所以我昨日食晒,唔好浪費姨媽既心血.開心既時間好快過,我地3點幾就要走啦,因為要趕叔去奶奶家做節.我自己就好開心啦.因為柏宇玩得開心,所以媽咪就開心啦.其實做人好簡單架咋,睇見自己囝女開心成長,幾辛苦都值啦.
唔開心個d就唔想提啦.forget it.
anyway,祝昊昊生日快樂,聽教聽話啦

食野好慢

9月25日

今日返第2日全日學,叫做幾ok啦,今日餐單:椰菜花炒魚柳,甘荀薯仔炆雞翼,白飯+提子,茶點:芝士三文治+加鈣豆漿
老師話柏宇食得慢,同埋唔多咬食物,仲有好少同小朋友玩,多數坐埋一邊自己睇書.
佢屬於較文靜既小朋友.
甘佢唔喊,唔抗拒返學,都叫ok啦.俾d時間佢適應啦

第一日返全日

9月24日

今日係柏宇第一日試返全日,我送佢返學後,有成6-7個鐘可以做私人野啦.
今日柏宇只係講左一次唔返學,之後無再扭過啦.今日既茶點好吸引,係雪榚+梳打餅.午餐係牛肉碎炒青豆角粒,蕃茄炒蛋,青,紅蘿白排骨湯,紅米飯+木瓜.老師話柏宇今日好叻仔,全部自己食,仲食得好斯文,食完飯,再飲湯,最後才义生果食,全部45分鐘內食完,連校長都讚佢好大進步.不過就要同佢戒手巾仔.今日放學時,只見到自己坐埋一邊玩,好專心,之後見到我就少少喊,老師一同佢講野,佢就笑返晒啦.老師真布辦法.另外我地同慧雅一齊放學,佢仲一邊走一邊叫慧雅追佢,俾佢激c,不過見佢係好開心既,希望佢keep住一直甘開心就好啦.

第一日在學校午睡

9月23日

今日返學都仲有同我講話唔著校服,唔返學.
我都係照樣話佢知每個小朋友都要返學學習,佢扭唔扭計都要返架啦.
但今早佢入課室,第一次唔喊咋.只是用手巾仔抺下眼,好似想喊甘樣.
之後中午1點半,老師打俾我話柏宇今日食飯就只食少少,但之後老師餵佢就食得晒.
開頭唔多瞓,到1:30pm就瞓左啦,所以叫我3:30pm才去接佢放學.今日午餐食雜菜蛋絲雞柳炒米粉,粟米生菜瘦肉粥.瞓醒就食埋茶點:馬荳樣+香蕉.放學去到剛好見到柏宇仲食緊茶點,於是我厘埋一邊偷望佢,佢食得好慢,仲不時成日望去課室門口,我估佢係睇下我黎到未,食完老師帶佢將d垃圾,碗,义等分類放好.之後幫佢抺乾淨就帶出見我.佢放學都係無喊既.老師話明天可以返全日啦.我仲問老師點解佢既轉變甘大,昨日12:30,今日3:30,明天4:30.我好開心呀,亞囝返左全日,我就多左好多時間去做野.老師仲話柏宇好ok呀.放學仲自己去同每個老師say goodbye才走.又跟住其他小朋友一齊去洗手.好大個囝呀.

第一日在校食lunch

9月22日

今日係第一日可以俾柏宇係學校食午餐,今日既午餐餐單係豆腐燴魚柳,青瓜粒,紅/黃椒燴草菇粒瘦肉,白飯+哈密瓜.早上回去時,喊左一陣,到中午12:30去接放學,當時佢地已食完lunch,全部集合係大廳睇卡通片.甘柏宇見到我,第一次無喊咋,仲係度玩碌地沙,老師同我講,我走之後佢就無喊過啦.中午食飯就要人餵,都食得晒半碗飯.仲話明天可以俾柏宇試下午睡.嘩...我仲諗住學校會睇佢食飯2-3日才俾佢試下午睡添.聽到老師甘講,我都好開心,即係話柏宇都開始ok啦.不過如果明天試左唔得,就會叫我1點鐘多d去接走佢.甘都好呀.有進步麻.真係要讚佢叻仔呀.

唔肯返學

9月21日

柏宇係sat及sun呢2日不停同我講唔駛返學呀,我唔去老師度呀.
今日唔肯著校服,又唔肯著學習褲,氹左好附先可以出門食m記早餐再返學,
佢己經認得返學既路,一早我行去,佢就指東指西,務求唔要返學.
返到學校入課室都係喊,今日仲扯住唔俾我走.
唔通又打回原型.另外我今日收到僱主通知,佢家中小朋友發燒,叫我唔駛去啦.
甘我就失業啦.唔緊要啦.如果柏宇明天可以係學校食lunch,甘我咪可以自己接返佢囉.
到放學時,老師話柏宇今日除左入課室時喊左一陣,我一走左就無喊啦.
放學見到我時就喊左一陣囉.老師仲話佢進步左,明天可以試下食埋lunch先走.
好開心呀.好快佢就可以返全日架啦.
到時我就揾課程讀先.一齊學習.

又進步左

9月18日

今日柏宇返學見人喊,佢想喊,但無喊,係入課室才喊,放學時老師話佢今日有進步,
比昨日喊少左好多,由於sat,sun放假,多數mon會未習慣,所以決定下星期二才俾柏宇係學校食lunch
甘都好呀.不過下星期二我要返工,就會由嫲嫲去湊放學啦.等我到時問下囝囝佢當日食咩先.

老師讚柏宇好大進步呀

9月17日

今日返學,柏宇己無喊,只是在入課室前,有個小朋友喊得好勁,於是柏宇才喊住入去.
到放學時,老師話我知今日柏宇好叻仔.比之前喊得少左好多.可以自己去操場玩,又幫老師拎紙巾俾其他小朋友.
老師話手巾仔放褲袋,唔好拎住,佢話好,乖乖放左落褲袋,唔拎出來.
另外老師又話唔駛成人要人抱啦.拖住手仔都係一種錫既表現既架.
問柏宇拖住手仔好唔好呀.柏宇好明白事理甘只係拖住老師,就無再扭抱啦.
唔慣得昨晚亞囝成日同我講,媽咪拖住先啦,好少扭我抱佢.原來係老師既功勞.
我問老師,明日會否俾柏宇食埋lunch才走,老師話要問過其他miss才決定,
甘我就話唔緊要啦,唔得咪下星期先囉,反正明天都fri啦.
返左11日學,好開心聽到老師話柏宇有進步,其實佢唔蠢架.只要你講道理,佢都會聽既.
佢都係受軟唔受硬既.期待佢係學校食lunch呀.甘我可以煮少餐,佢又可以食得有營養.

又係喊住入課室

9月16日

今日都分別唔大,喊住入課室,不過今日放學時,
柏宇自己唱歌仔,我聽到佢一路行一路唱食果果,你一個,我一個,大家笑呵呵
呢首歌之前迎新活動時有唱過,所以我都識唱,於是我同柏宇一齊唱,唱到笑呵呵時,佢仲用2隻手指放咀邊笑.
好似哈哈笑甘樣.好得意.雖然仲未習慣,我覺得比之前好左好多啦.加油努力呀.

8號風球

9月15日

昨日傍晚掛左8號風球,點知今早都仲未落波,所以我唔駛去返工,亞囝又唔駛返學.
daddy依家份工又唔駛當風更,所以可以等落左8號波先去返.
不過仔仔都一樣7點幾起左身,唉...又無覺好瞓啦.
今晚要早d瞓,明天要早d出門,又風又雨,超狼狽.

有少少進步

9月14日

經過早兩日既不停洗腦,柏宇今日返學都有少少進步.
雖然都有喊,都有扭計,但就無上星期甘癲啦.
我不停問佢,要唔要做叻仔,要唔要叻過其他小朋友.甘就唔好喊啦.喊唔靚仔架啦.
可唔可以做一次叻仔俾媽咪睇下先,於是乎佢話好之後,我陪佢一齊敲門,一齊推門入課室,
佢一邊用手巾抺眼淚,一邊自己行入去老師度.無再痴住唔俾我走.
佢肯行出第一步,已經好好啦.起碼無再喊住話唔返學,要走...之類既說話
好快到11:30放學時間,剛好打風,所以早左少少接佢走.佢帶左朱古力餅俾佢,
今次見佢出來都喊,連我抱住佢都喊,不過唔緊要,仲有時間等佢習慣,唔抗拒返學就得啦.

提早食既中秋飯

9月13日

今日call van送部舊tv去公公家,順便係佢家食飯,
點知亞邦話不如出街食,叫埋婆婆,當係提早做節,食中秋晚飯,
甘都好既,一次過同佢地食晒,因為我可能呢個月都唔返去架啦.
亞囝返學未慣,都要跟緊d佢.個豬囝成日要亞妹抱,我叫亞妹,佢就跟我叫亞妹,
我話佢應叫姨姨,佢就叫左做亞妹姨姨,俾佢激c.
今日出街全程都係亞妹拖住柏宇,我係佢地旁邊,因為要等佢習慣唔好成日痴住我.
甘樣就會好快適應學校既生活架啦.

新電視

9月12日

之前買既41吋電視,今日送黎啦.今日joyce及其男友都來探柏宇,我地去左樓下食飯,
屋企太亂啦,所以我無煮飯,亦無整蛋榚.daddy仲去左實惠買左d鐵架去放dvd機,嘩,幾個架要成7xx元,
咪仲貴過買現貨,不過佢俾錢,佢話事啦.只係覺得最近洗錢好似倒水甘姐.
幾時先至可以執好間屋呢,實在好頭痛呀.我己經掉左好多無用既野架啦.
餘下佢既物品,等佢自己掉啦.

Too Much

9月11日

今日返學前,俾左柏宇食提子乾,餅乾及飲提子汁,之後柏宇話要飲維他奶,我話唔得,
飲太多唔同既飲品會肚痛架,佢之後自己同自己講"too much"
我聽到都好好笑,因為之前佢食得太多時,我都會同佢講唔可以食太多架,too much架.
佢就記住左掛,不過唔知佢明唔明當中既意思呢.
返到學校,換鞋時已喊住話唔係度玩,要返屋企,我唔駛理,洗手後帶佢入課室,佢扯住唔俾我走,
結果要老師抱住佢,我才可以走.放學老師話我知,柏宇唔多習慣係學校,都係成日喊,仲係要特別處理,
同埋要人成日抱住,仲話下星期都只可以返到11:30am就要放學,唉,佢都唔知呢個月可唔可以食埋lunch先放學呀.始終學校既午餐豐富過自己整既.好在我唔駛返工,有大把時間去教佢.
講開教柏宇,雖然佢最近講野叻左,不過同樣發現佢講野好命令式,有時我會問佢有無講唔該呀,佢就會講唔該媽咪,甘我先幫佢做.不過,我剛諗到,下次可以試下教佢將佢剛剛講既說話,在前面加上"我想".再要求佢講一次.
再要佢講野細聲d,即將佢既肯定語氣改為詢問語氣.唔想佢甘細個講野就甘硬.由細個培養成為一個有禮貌既人. 真係要加油呀.因為我一講錯野,或語氣唔好,佢就會記住架啦.小心小心.唔好學左d壞榜樣呀.

樹熊寶寶

9月10日

今日返到學校先知唔俾陪上課,仲將喊與唔喊既小朋友分開房,柏宇連同約10個喊既小朋友去左近學校門口既課室,交由校長及嬸嬸去照顧,柏宇未入課室己喊到豬頭甘樣,不過都無法,都己經陪左6日,仲係甘痴身,
都係時候要用強硬手段去令佢地獨立啦.老師要求我地11:30am才去接放學.
我就多左時間去買餸,仲無甘辛苦添.
終於到左放學時間,一入到去,見到校長抱住柏宇,佢當時喊緊,佢一見到我就叫媽咪,之後喊得仲勁,
眼淚鼻涕成面都係,校長同我講返柏宇係全班最嗲既一個,成日要人抱住就唔喊,食野飲水都要校長抱住餵,
好在佢個個抱都得,否則校長都好唔得閒.校長仲話佢係樹熊寶寶,又話佢好聰明,佢成日問校長媽咪呢?
之後又自己答媽咪去左買野.又用雙手捉住校長塊面,要校長望住佢講野,不過就好唔環保,成日喊要人俾紙巾佢抺,整到一枱都係紙巾,結果要老師收埋晒d紙巾,話佢知無晒啦,佢就將之前用過既個張再攞返來抺.
校長仲話佢都幾肯聽人講野,只係到放學時,見有人走,佢未走得,所以又再喊.仲話佢應過多一至兩日就ok架啦.
望就甘望啦.我都想佢快d獨立架.返左全日就會多返d時間做野啦.
另外今日中午約左d同學去某個同學家整野食,今日有蒜香骨,炒介蘭,九肚魚,啫啫田雞,白灼蝦,辣酒煮花螺食,每人都係夾34元,好抵食,個同學d手勢都唔錯,食完我就去洗碗,佢地就打牌,亞囝就同個同學隻狗仔玩,
我地4點就走先啦,因為我要返去煲湯煮飯呀.我地仲約定下次既飯局添.

打回原形

9月9日

昨日老師覺得柏宇可以自己上課,不用家長陪,今日我帶返學
老師又將柏宇列為需要家長陪伴上課.
因為昨日喊得太勁,佢又太痴嫲嫲,我都知老人家唔捨得個孫喊甘耐,於是就會就晒佢.
老師都話,如果可以唔好叫嫲嫲帶返學啦.
今日我都將佢放入課室,之後去洗手,打算入返去,點知未洗完手,佢已狂喊,老師抱住佢氹
甘我見甘既情況,於是放手俾老師去處理,自己行開一陣,結果我走開半個鐘,佢喊足半個鐘,
老師仲要抱佢去教職員室將佢隔離.我唔係唔忍心佢喊,只係怕佢又生眼瘡,所以同老師講左,
儘量唔好俾佢摔眼,以免發炎.之後到做手工時間,今日做一個太陽眼鏡,將自己鐘意既圖案貼上去.
都幾cute架.餘下所有既時間,佢即使去操場玩,都要望實我,怕我走左去.唉.老師話,最多可以陪埋今個星期.
下星期開始,喊成點都要放手架啦.仲叫我唔駛再同柏宇講叫佢唔好喊,甘樣佢只會更加喊.
甘我又試下配合下啦.今日玩完之後,學校每人一枝益力多.佢地飲得好開心呀.
另外上次打柏宇個女仔,佢又打左佢一巴,今次我捉住佢隻手教佢'愛'返柏宇,仲握手做朋友,
唔好再打人.
放學我諗左好耐,終於去左美心買左盒thomas造型既月餅,去鼓勵柏宇乖乖返學.
佢開心到連書包都唔要,自己去拎住盒月餅返屋企,返到樓下,佢同管理員叔叔講買左thomas月餅添.
成日都拎住盒月餅.佢似乎真係愛不釋手喎.

交俾嫲嫲帶返學

9月8日

今日我要去返工,於是交由嫲嫲帶返學及陪佢上堂
原來今日老師係唔俾家長陪柏宇上堂啦,但嫲嫲一走,柏宇又係喊到豬頭甘,
結果嫲嫲都要陪佢,另外今日佢既勞作係教佢地搽果醬落餅干,嫲嫲話我知,柏宇食左人地好多果醬呀.
正一為食豬黎架.可惜媽咪要返工,miss左無得幫佢影相,不過佢見我唔到,都可能會無甘扭既.
好期待聽日既趣事呀.

31個月大啦(2歲7個月)

9月7日

今日柏宇2歲7個月,今日返學校,老師話佢仲要家長陪上堂.
我中途試過走開,點知佢搵我唔到就狂喊.如是者試左幾次.
到最後去操場玩時,我又走開,去一個只有我見到佢,佢見唔到我既地方.
佢又係搵唔到我就喊,老師就抱左佢一陣,帶佢去抺眼淚,掉垃圾,之後同佢去玩波波,
佢又無事啦.之後仲好定甘坐低俾老師同佢著鞋添.
亞囝既性格係見唔到我就無事,一見到我就會癲架啦.
另外今日玩波波時,佢俾同學仔搶左個波,佢只係企定望住我,唔識去搶返.實在太純品啦.
之後又俾個女同學打左左邊面一巴,佢既父母又唔理,老師又睇唔到,亞囝只係企度狂喊.
之後我咪教柏宇下次有甘既情況,咪一係打返人地,一係推開佢囉,因為佢真係受保護慣,
唔識爭野唔識打人.連自保既能力都無.雖知小朋友推撞難免,唯有叫老師留意多d囉.
今日佢既勞作係整大陽帽,柏宇一放學就要戴住走,返到屋企先除,都整得幾靚架.
******************************************************************
今晚柏宇好識氹人,當我煮飯時,佢突然話"好靚媽媽呀"
甘我出廳睇下佢做咩啦,原來佢見到我未嫁前影既相,於是就甘講啦.
不過講真,之前又真係幾靚既.歲月催人老.
另外,佢又同我講"媽媽,食飯未呀,好肚餓呀,你聽唔聽到呀"
又話好掛住套絕代商驕,真係人細鬼大,不過佢唔知係咪真係明白咩叫肚餓呢?

買新電視

9月5日

今日去接daddy放工,佢去買左部新既40"高清電視,成$11xxx
對我來講,我覺得好浪費,不過錢唔係我俾,我唔想成日為左呢d事去嘈,佢鐘意點就點啦.
反正我反對,佢都會買,一動不如一靜.
另外今日買新電視有抽獎,抽到d現金卷去波買鞋俾柏宇.埋單都係補左$74.2,
好抵呀.今日真係大出血呀.

第三日返學

9月4日

今日係第三日陪柏宇一齊返學,除左中途我走開成10分鐘,佢搵唔到我喊之外,其他都無咩問題.
老師話下星期一就會知道要唔要再陪柏宇一齊返學.
今日慧雅好痴柏宇,去邊都一齊.當柏宇去整t-shirt畫時,慧雅都嬲柏宇自己去整唔預佢.
又成日推佢,所以我只有教柏宇要識講唔好,同埋教佢有危險時要推開人.
最起碼唔好令自己受傷先啦.

第二日返學

9月3日

今日早上返學本來好地地,返到學校玩集體遊戲時,柏宇開始有d扭計,加上有其他小朋友喊,於是柏宇又喊,
不過好快就被d沙灘玩具分散注意力,好快就投入去玩啦.
今日又平平安安放學啦.暫時柏宇都幾鐘意返學.

開學啦.大個囝啦

9月2日

今日係柏宇第一日返學,由於返9:30am,我8:30am先叫醒佢,
昨晚佢都係床自己碌到成12點先瞓,唔知佢係咪都緊張呢.
今早整熱左維他奶同蛋撻做早餐,9點鐘我地就出門,
樓下個看更叔叔讚柏宇著左校服好靚仔添.
今日約9:20am返到學校,已有好多小朋友.我地去換左白鞋,洗手,放書包後就入課室玩玩具
約9:40am就要收拾玩具去禮堂唱兒歌,玩遊戲,老師仲影左好多相添.
之後就到排洗時間,女仔去先,才到男仔.因為怕柏宇掛住玩唔記得叫痾尿,
所以今日同佢著左片片.當所有小朋友都去完toilet後,就分組做手工,今日教小朋友自己塗膠水,跟住揀自己鐘意既材料,(有軟膠,發泡膠,紙碎)貼落把扇.最後貼埋自己個名就完成啦.
柏宇都好鐘意個過程,好有心機去做.之後就可以入班房玩玩具.約10:45am就去操場玩,
內有大型車,滑梯,搖搖板,平衡木,小型氹氹轉,兒童籃球架,小型波波池.
亞囝一向最愛行樓梯,仲今日除左滑梯,樣樣都只玩一次,但就玩左平衡木20幾次
由開頭要我扶住佢上,到後期都唔多要我扶啦.玩得好開心.
太約玩左半個鐘,所有小朋友都要去洗手入班房飲水,柏宇拎起杯同隔離個小朋友干杯,一d都唔怕醜
之後就放學啦,不過柏宇唔肯走,話要繼續玩,氹左一輪先肯走,呢個豬仔今日都好叻,無喊,
連校長都話佢唔同晒,唔似之前成隻樹熊甘.好叻仔.
柏宇今日仲全程自己拎書包,唔肯俾我幫佢拎添.
今日我轉左d時間,飯前同佢沖左涼,9:40pm已叫佢上床瞓覺,想等佢習慣早睡早起,但都要10:45am才瞓著,
加油,逐步逐步啦.

返學前之演習

9月1日

明天要正式返學,今日我試下俾柏宇8點起身,之後8:45am去到嫲嫲家食早餐,
佢都ok,之前我去左返工,唯一既問題係佢今日無瞓晏覺,唔緊要啦,今晚早d瞓,明天早起啦.
好期待明天開學呀.

又去反斗城買玩具

8月30日

今日去左大伯家.甘我地又去左反斗城,今日daddy仲買左一套電子琴連咪連椅俾柏宇.
俾佢激c,次次去親都買野.今次仲要由甘遠拎返屋企.不過柏宇好鐘意彈琴.直頭唔肯同哥哥一齊玩添.
佢一向都唔自私,可能佢真係好鐘意呢份玩具啦.唔知佢對呢份玩具既熱度有幾耐呢.
如果佢真係好鐘意,唔排除日後俾佢學琴架.

中學同學之約會

8月29日

今日約左好耐無見既中學同學janice同iris去九龍酒店食lunch buffut.
我都有over 10年無見過iris啦.佢地都無咩點變,仲係單身,只係我同donna生左小朋友.
今日好多野食,柏宇由開場食到收場.除左食左好多栗米外.仲食左豆腐花,布甸,窩夫,西瓜,雪榚.
我仲俾囝囝自己親手拎住支棉花糖去朱古力噴泉自己整添,之後仲加左七彩星星米及花生脆脆一齊食.
好靚又好味.佢可以自己整又食得開心.今餐每人$187.2,我覺得都好抵食.柏宇加我都值回票價啦.
又可以同型舊同學聚舊.穴你好難得架.真係好期待下次再gathering.
之後我地去左反斗城,今日買左個會發聲既槌仔,昊昊都買左個一樣既.仲係同色同款添.
今次無得爭啦.由於昊昊都攰啦.佢地就走啦.
甘我自己同柏宇去行sogo.行行下柏宇都瞓埋啦.我右手抱住佢,左手推車繼續shopping.
都好開心.好難得靜靜地行超市架.雖然之後連左手都抽住一袋物品.不過都好開心呢.遲d柏宇大左就唔要媽咪抱架啦.好好珍惜啦.

網上瘋狂大購物

8月28日

早2日連同大嫂上網訂左好多手巾仔,不論係小朋友,男裝,女裝都有訂,總數訂左108件東西
今日下午送到啦.好開心.我今晚做晒家務後即拆來睇.柏宇仲開心過我,第一時間已揀左佢鐘意既手巾放入袋拎住行來行去.好搞笑.我就只訂左5條俾daddy,仲有一部份送俾家人,其餘大部份都係柏宇架.
因為我想買過d新既俾佢返學用.總數都係用左二百多元,都幾抵.
大嫂仲話下次如果我上網買野,記得預埋佢添.好快又會多一個購物狂架啦.

姑姑生日

8月24日

今日係姑姑生日,我及柏宇約左太嫲及姑姑去左荷李活既pizza hut食lunch慶祝
無見甘耐,太嫲都好好精神,行得食得.姑姑今日悉心打扮,仲噴左香水添.
我就因為預唔到時間,又搭錯車,結果遲左1個鐘先到,累到佢地坐左成個鐘,真係so sorry呀
今日我專登整左個cheese cake俾姑姑,幾個月前佢已book左話生日要食cheese cake
甘我今日幾趕都好,都一定要整埋拎去.由於今早清晨柏宇大喊又唔瞓,5:30am就起身,結果我陪佢到7點佢先瞓返,我個人都頭暈暈啦.曾經有諗過想偷懶唔整蛋榚架.
不過唔想姑姑失望,好在佢收到都好開心.姑姑仲買左d小禮物俾我,當回禮添,多謝晒呀.
我地食飽飽又行左一陣,甘就各自返家啦.
姑姑飯後仲打俾我,話我知,佢食完飯後仲食左1/4個cake,因為好味到唔停得口呀.嘻嘻...
佢俾我88分.太嫲仲好笑,未食就已經俾左我110分.仲同我講話好開心,因為有個孫女識整蛋榚,好叻.
我都好開心,有人甘欣賞我整既蛋榚.等我遲下得閒再研究其他款先.
至於柏宇,當然係眾人既開心果啦.佢把口簡直係氹c人呀.
成日講姑姑,生日快樂呀!我諗姑姑今日都好開心姐

第一次做既吉屋清潔($75/鐘)

8月19日

今日同埋另一個同學去左紅磡黃埔新村做吉屋清潔,我未試過2個人一齊去做,今次仲有成75/鐘,好高人工
僱主本來請我地做2小時,臨時加鐘做左4小時,$300袋袋平安,好開心.
個僱主仲book定我地下星期再去多次添,唔知係咪一樣價錢呢?
做左甘多份清潔,終於搵over$1000啦.我會儲起d錢日後用.
因為真係蚊蚊都有汗架.等日後囝囝返左學,再搵份固定既做.
甘自己就可以儲返d私己啦.

又去開工啦

8月15日

今日又去幫人清潔,我打算做埋今次唔做啦.
因為想留返d時間陪柏宇,返學初期要陪佢架.
費事成日請假,再加上奶奶唔舒服,唔想麻煩佢幫我湊啦.
所以才有此決定.不過我當然唔會同僱主講我唔做啦.
但今日有少少hard feeling.咩事我就唔想再提啦.
亦唔想記低,因為佢只係過客,無須介懷啦.
forget it.
今日買左套冷氣被,好靚架.係mickey mouse,
於其成日俾爸爸哦哦,不如早d買啦.
甘就開冷氣都唔怕冷親啦.

返健康院

8月12日

今日柏宇要返健康院跟進講野既程度
姑娘拎左本書問左佢10幾樣野,佢都可以清楚指出來,又識讀顏色.
話佢講野都幾叻,不過唔係甘清楚囉.叫我地跟進一下.
最近囝囝會向我講,"我想問你呢","呢個咩黎架"
佢好鐘意向我問問題.我覺得佢大個囝左.
有自己既思想.好得意呀.

相識紀念日

8月10日

今日係我地識左12年既日子,如果我無記錯的話,
今日無特別慶祝,都係係屋企煮飯,只係知佢早2日話想食燒味,
今日買左半隻油雞姐.不過由於我中午去買餸,之後一直放左係厨房,
所以隻雞好似有少少焗到'叔叔地',不過我地照食.因為食落又唔覺有問題呀.
唔覺唔覺結左婚都快5年啦.柏宇都快3歲啦.就快返學啦.
到時我就會諗下做返全職定搵part-time架啦.

買返學用品

8月8日

今日等daddy放工後去買柏宇返學用品,
我地係jusco買左對斷碼既黑皮鞋,折左$44.1咋,好抵
對白波鞋就貴d,要$12x,不過買晒2對鞋都係$16x,都抵既
另外仲有少少什物未買,明天要訂埋d名字印嘜先,因為好快就開學啦.期待ing......

2歲半啦(30個月大)

8月7日

今日柏宇2歲半啦,我今日亦要去醫院第三次照肺,一早7點幾就要叫醒囝囝去奶奶家啦.
因為我9點就要到醫院啦.
今日都好容易就搵到間醫院,仲見到玉器市場添,好得意.
今日照肺無花啦.不過醫生話我之前咳傷左肺膜,所以會有一段時間先會好返唔痛,
不過就唔駛再食藥啦.只係要2個月後再覆診即可.
睇完後去幫柏宇交學費.之後心血來潮入去探公公婆婆.因為daddy今晚唔返來食飯呀.
公公身體都ok,婆婆就好搞笑,因為佢又整左好多野食俾我食呀,
好似我剛係非洲返來無得食甘,一次過食晒一個月既野.
不過,我都真係好掛住婆婆整既野食呀.因為我少返去麻.
今晚仲有我至爰既炒米粉呀.總之樣樣都好味啦.
雖然我走時背襄係有少少重,不過都值得既.因為我仲可以食多2餐婆婆煮既餸呀麻.
婆婆,我好愛你呀.辛苦晒你呀,煮到身水身汗,我一定會食晒d野架.(骨頭及薯皮除外,難消化..嘻嘻)
次次返去都滿載而歸架.等我搵日都整餐俾婆婆食先.
今日最經典係柏宇當左婆婆係人肉梳化,不停叫婆婆俾瑤柱乾佢食,成個大爺甘,好好笑.
下次要記得影低佢先.等佢大個囝睇返,等佢知道婆婆幾錫佢呀麻.

提子乾

8月2日

今日婆婆托隔離屋既婆婆拎左樽提子乾俾柏宇,打算用來氹佢食藥.
點知甘啱早上我俾孖寶蛋榚柏宇做早餐,佢又係好like食提子乾
於是每當囝囝要食藥時,如果我氹佢唔掂,就會用提子乾做交換啦.
柏宇一路食一路叫好好味,甘我就叫佢打俾婆婆多謝先.
我都要多謝婆婆呀,真係及時雨呀.我都要講句d提子乾好好味呀.

柏宇氣管炎

8月1日

今早5點50分亞囝咳醒左,佢咳到好辛苦,自己仲坐起身喊(好似飲泣甘,唔係大吵大鬧)
我即時起身幫佢拍背,佢要出廳,我陪佢出去,之後佢咳順左,無甘辛苦,就返房瞓啦.
其實昨日都有甘既情況,有時咳到成個頭都紅晒,嚴重d既就會作嘔.
我覺得佢好似我之前甘樣,喉嚨癢到要咳到舒服為止.
甘我同奶奶商量後,決定睇定d先再去睇醫生.
今早10點我要去家長會,我到9:30am才叫醒柏宇,因為佢好攰呀.
即刻送佢去奶奶家,我再趕去家長會,結果一聽就3個鐘.早餐都未得閒食呀.
之後問左個僱主,今日下午要去佢家清潔3小時.因為佢上星期已經俾左工錢我啦.
今日都o左半個鐘俾佢,成6點先收工,返到奶奶家,佢話亞囝咳得好勁,
甘我本來諗住明天同佢睇醫生,諗下好似今日醫生收7:30pm,
於是快手食完飯坐的士去睇啦.早d去好過佢今晚要辛苦捱啦.
結果醫生話佢係氣管炎,抖氣有少少什聲.又要食抗生素啦.
真係用咩方法都要氹佢食晒為止先得,希望囝囝快d好返啦,咳真係好辛苦架.
我都剛經歷過,如果有得代佢病就好啦.

被放飛機

7月31日

今日本來約左去僱主度做清潔,今日晏左出門,我成8點先叫醒亞囝,
再即刻抱佢去奶奶家,之後即行快d去返工,好在8:55am到達啦.幾驚遲到
我上到去,個婆婆先同我講佢今日要出街,唔記得通知我唔駛來,吓...我趕到身水身汗,
佢話俾返10元我當車錢,我無收到,講真,你補返一個鐘人工俾我就話姐,
10元我就唔會收啦.佢不停道歉,講真我又唔太嬲既,不過肉痛甘早叫個囝起身姐,
佢又唔舒服,唉...算吧啦,佢話今晚再打俾我,但我都唔會做啦.
之後約左教清潔既miss同埋部份同學去飲茶,再返去攞証書.
咪當偷得浮生半日閒囉.

到我睇醫生啦

7月30日

今日終於忍無可忍,見亞囝成個鐘都唔瞓晏覺,
於是叫佢陪我去睇婦科,因為好痕呀.
原來之前食左抗生素,有影響,好在唔太嚴重,順便做埋子宮頸檢查,$640埋單,
今個月2母子睇左過千元醫生啦.
我同自己講,有時d野係天意,要來都避唔到,唯有希望後生病埋,老黎病少d啦
我去做檢查時,姑娘幫我帶左柏宇出去玩,佢都乖好聽話,之後見到我就有少少扭計,
甘醫生借左架車仔俾佢玩,之後佢竟然開口同醫生講:俾糖糖我食呀!
嘩...亞囝未試過甘問人攞野食架.由於我抱住睇唔到,醫生同姑娘話我知,
當柏宇問完醫生攞糖後,佢擰轉面奸笑呀.連醫生都話佢好鬼醒目,得上床牽被'come"
計我話佢奸奸豬就真.醫生都話佢大個仔啦,仲有好多野我地係未發現到既.
我都可以放心俾佢自己發揮啦.
期待佢每一日既進步.

第二次幫人清潔家居

7月28日



今早又係一早叫個囝起身,今日做新客,唔熟路要早d去搵,

由於個囝食晒藥都唔得,今日book左放工同佢睇埋醫生,

其實亞囝己好叻,由最初唔食藥,到依家唔駛人捉住,佢會企定定自己飲晒d藥,再飲水,

唔駛勞氣.

今日個僱主都幾好相處,無咩大問題,仲早左10分鐘俾我走,之後趕住同柏宇睇醫生
今日佢好開心,周圍走走跳跳,又同我講,行快d啦,遲到架啦,有巴士呀.
好好笑. 之後去左椰林閣食lunch,d野都幾好味架.不過亞囝唔多欣賞,只食飽飽.
仲既tea set仲抵,我叫奶奶下次去食時記得叫埋我呀.

亞囝今日就好興奮,不停走來走去.好似好耐無出街甘.

老公生日

7月26日

今日老公生日,不過一早就發生d唔開心既事,
話說之前亞邦對個囝講埋d不負責任既說話,我己經唔多開心
今早見到奶奶咪呻2句囉,點知奶奶轉頭鬧亞邦,甘佢大男人要面,咪即時黑面發脾氣
之後去飲茶仲話佢今晚唔返來食,我無所謂,我同亞囝一樣食得開心.
佢好多時一發脾氣就會出去同人食飯,講真,出去避風頭只係避開當時大家唔駛面左左,
不過唔係一個好既解決方法,唔通到你七老八十都仲係一嘈完就走左去咩,
我就唔care,反正都慣左,你出左去,我唔駛煮你飯咪仲好,2母子唔煮叫外賣又得.
結果大家都唔講野,我返家同亞囝玩同暗佢瞓,直到5點個囝瞓醒,佢叫個囝錫佢一啖,
甘我咪順便叫柏宇同佢講聲生日快樂,之後一齊去左紅磡玩及食飯.
唉,一世人幾廿年,話咩易過,開心同唔開心都要過,點解唔揀開心去過呢,唔好俾自己有遺憾就得啦.

第一日做家務助理

7月25日



今日第一次去做清潔,有少少緊張啦.

唔知個儸主係咪好挑剔呢?

我8點叫醒囝囝送去奶奶家,9點鐘準時去到紅磡,

本來話做9-12點,後來加鐘做到5點先走,個僱主同請我食lunch,個日本餐成5x元,好貴,

等於1個鐘既人工啦.甘我見個僱主都好nice,於是我都ot左半個鐘俾佢,今日收佢7個鐘既人工姐,

因為食飯食左1個鐘呀.總括係一個好開始啦.

另外囝囝既咳咳嚴重左好多,我日日燉/煲湯都唔得,右眼入面又生左眼瘡,我覺得自己唔識做媽咪,
每次佢病我都會好灰架.唉!
今晚同囝囝沖涼時,我叫左亞邦入來幫手,點知柏宇聽到,跟住我大叫亞邦甘去叫daddy,
我叫佢叫返daddy,佢唔肯,一味叫亞邦,呢個囝真係叻到飛起.
以後都要小心d講野至得,佢實在學得太快啦.

囝囝咳咳呀

7月21日

今日凌晨亞囝咳得好勁,於是一早去睇醫生,我將我之前既case同醫生講,因為我都怕傳染亞囝架
好在醫生話唔關我事,可能係轉天氣,氣管敏感姐,甘我見佢唔係咳太多次,只食左2次藥就算,
因為隻豬仔喊到拆天呀.另外今日同佢行超市,我買益力多俾佢,佢好開心甘講thank you mami,
如是者買維他奶都係甘thank you mami,好sweet呀.仲有佢最近講野叻左好多,仲成日問我點解呢xxxx,真係好大個囝啦.又識安慰人,又識氹人,keep住甘樣就好滿足啦.

懷疑氣管炎

7月17日

昨日一早收到土瓜灣診所通知要我今日返去睇照肺報告,都知唔慌好野,原來個右肺花左少少.
於是即時叫我返去之前照肺既147a矮屋見專科醫生,由於我上次照x-ray後,右胸骨就開始好痛,
最近2日仲連鼻涕及痰都有血,於是我一併同醫生講埋,我痛既地方跟肺花左既地方一樣,
於是醫生估係氣管炎,不過要等我留痰化驗,才知有無肺炎及其他病.之後開左抗生素俾我,
及book左3week後去油麻地賽馬會診所再照x-ray,唉!好煩呀,手尾長.有排都唔駛去打住家工啦.
希望快d好返啦.我都怕傳染個囝架.

家務助理考試

7月15日

今日要去長沙灣考僱員再培訓局主辦既家務助理試,如果合格,就會發技能咭.
今日總共考6科,鋪床,打地腊,燙衫必考,另外大廳/浴室/厨房就各3樣考其一,我抽到考抺窗,洗浴缸,洗抽油煙機,最後因鋪床唔得要重考,重考後沒問題了,等發技能咭即可.
總算安心晒啦.做唔做就下回分解,起碼多張咭傍身麻.

再飲奶啦

7月12日

話說早前雀巢送左一罐大既"瑞士寶兒"奶粉,甘我咪諗住俾亞囝試下飲唔飲啦.
雖然我每日都有豆漿,維他奶,麥皮,柯華田俾佢輪流飲,不過我覺得飲奶好d
起碼如果佢當日唔食晚餐,都有支奶可以補充呀.
就係今晚,佢突然同我講要食奶奶,我以為佢又玩野,問多佢一次,佢都話要食,
甘我就改俾佢啦.點知佢飲下飲下,都飲左6安,我當時真係開心過中獎呀.
可能你地會覺得我誇張,不過亞囝肯食野,對我黎講真係好開心架.
甘樣佢就會吸收多d,會成長得好d啦.
另外佢最近鐘意唱abc歌,瞓覺時又會叫我唱abc歌佢聽,
我覺得佢大個囝好多,仲學埋佢地洪氐家族既野,就係叫人抓背隻,亞囝直頭會舉高個pat pat叫你幫佢抓,c未,成家老中青都係甘架.真係想唔認一家人都唔得呀.

29個月大

7月7日

今日柏宇29個月大啦.
今日我亦安排左去九龍醫院照肺,因為咳左成半個月有多啦.
醫生話去照下好d,彼正又唔駛錢,當然去啦.
奶奶都帶埋柏宇同我去到附近,佢地係公園等我.
由於我唔多識路,搵左好耐先去到.照就好快搞掂.
今日本想買左餸都無煮,改為食上海粗炒外賣算啦.
因為想早d休息,另外昨日才讀完家務助理課程,
今日就有就業中心介紹我去擎天半島做一,三,五既9-12點清潔,仲出到$55/小時,
不過我唔舒服推左,否則都會去試下,我諗新樓點都好做過舊樓掛.

encore之畢業cake及蒜蓉雞翼

7月3日

由於昨日反應熱烈,供不應求,我應承係最後一日返學(7月6日),再整芝士蛋榚及蒜蓉雞翼請佢地食
但昨晚成9點鐘先記起有個同學佢last day唔返,於是我即時去超市買雞翼同雞蛋,準備今日請佢地食,甘樣就可以個個都有得食啦.
好在昨晚老公幫手陪柏宇玩,同暗佢瞓,甘我先可以順利整蛋榚,
一次過整3個cake,今次整2個芝士,1個唔要芝士,前車可鑑,我決定今次一個cake分10件,
我帶2個返去,20件一定夠分啦.另一個cake則俾老公帶返公司請同事食,因為老公就黎轉新工啦.
當係多謝佢地啦.我由11點整到凌晨3點,終於搞掂晒可以瞓啦.
因為今早我仲要6點半起身焗雞翼呀.我買左2磅細細隻,都有31隻,
帶左25隻返學請人食,俾左5隻亞囝做午餐,自己食左1隻試味.
今早又係call左ling同學幫我拎野返學校, 由於無人知我今日會提前整野食返去,
個個都食左早餐,但係中午都未到.蛋榚及雞翼已沽清,我自己又係無得食,亦有d同學話無得食,
好在我一早留定一份俾下午上堂既miss,lee班野真係皇蟲黎架.整幾多都唔夠食.
但個個都話今日既cake好食過昨日,因為多左芝士,又香又軟,所以d人食到停唔到口,
食完一件又一件.結果行得慢無得食囉.
不過雖然整好長時間,但係佢地甘俾面,真係好開心架.
今晚就真係要早d瞓,補返下先啦.

畢業cake

7月2日

仲有幾日就讀完家務助理既course
於是昨日整定3個cake(2個唔落芝士,1個落芝士),準備今日帶返去請同學仔食,
另外請埋教我地清潔既miss食,而另一個同學就整糯米磁.
我總共帶左18件cake,每人一件一定夠,點知最後我自己都無得食,
d同學仔仲話好得,叫我開班授徒,或者開鋪賣餅.
氹得我好開心,仲話想再encore添.
於是我就諗......

跳

6月28日

之前仲講緊柏宇唔識雙腳跳高,今晚突然佢跳俾我睇,
起衫我以為睇錯,因為當時我在晾衫.於是我停低手上既工作,
專心去留意佢,發現佢真係在嘗試踎低,再雙腳跳起,但只是離地好少.
終於都學識左啦.不過上次返QE時,醫生都話有D小朋友3歲先識跳,都係正常既.
唔知亞囝係咪睇電視學既呢?

生病篇

6月19日~6月27日



由於同囝囝去QE當日好曬好攰,當日下午又做餐C,所以開始感冒了,
我SAT即去睇街症,好在醫生話係普通感冒.
不過食左2日藥,本來只係頭痛及喉痛,
變左有鼻水及咳,仲要係好似喉嚨有野甘,好痕,唔咳唔得,
好辛苦,自己燉左川貝,飲左2日,婆婆又煲左川貝俾我飲,
同學仔又教我整薑蓉炒蛋加水滾埋一齊飲,第一次飲左又好似好少少,
起碼有覺好瞓,第2次飲就唔得,不分日夜都咳,我打算飲多2日,
如果唔得就睇多次醫生.其實我無任何唔舒服,只係喉嚨痕,唔知係咪氣管敏感呢.

返QE覆診

6月18日

今日請左半天假同囝囝返QE覆診,跟進下佢個心及身高體重
醫生今日幫柏宇BOOK埋3歲後做超聲波,去CHECK下個心既小洞是否已完全合埋.
不過囝囝今次CHECK既高度只有82CM及只重10.8KG,跟佢地個指標差少少,連細碼B既標準都達唔到. 可能亞囝已介奶,平時又唔多食正餐,依家己經每日俾一粒芝士佢食.當補充一杯奶.
另外醫生俾左6個有顏色既積木俾柏宇玩,問佢顏色,平時佢都唔多答,唔知係咪想醫生讚佢
佢有4個顏色用英文答,1個用中文答,餘下既YELLOW佢答PURPLE,不過我知佢識既,因為平時佢都將黃色叫PURPLE,紫色叫YELLOW.佢仲背3字經俾醫生聽,係甘SHOW OFF自己.
醫生亦都讚佢講野好叻,甘到佢2歲半時返健康院,講野方面應可PASS.
仲有當醫生整高佢件衫,用聽筒幫佢聽個心跳,呼吸時,佢一D都唔驚,仲好合作.
之後佢行去醫生度要醫生抱抱,我就話俾醫生知柏宇既意圖,
點知醫生聽完,仲俾佢玩,就係個聽筒啦.柏宇拎住聽筒,模仿醫生剛才既動作,
自己整高件衫自己攞聽筒放係心口左聽右聽,好鬼醒目.俾佢笑C
佢又唔怕羞,四圍去開醫生D柜筒,醫生又唔話佢,好好人.
不過最好係醫生肯免費幫我填左亞囝張健康狀況表,我問過學校,一般政府醫生都唔填,
要去私家醫生俾錢填.甘我今次又慳左百幾蚊啦.
今日睇完都12點幾,好趕,我仲再趕返去做實習呀.
又係忙碌既一天.

唔該&thank you

6月17日

最近亞囝會自動同我講唔該或thank you,通常我會答佢:唔駛客氣或you are welcome,
佢就會好開心甘講多幾次.
最近多左唔該媽咪,我都覺得佢好大個囝啦,好有禮貌.
又時煮野俾佢食,佢會話,媽咪,好好味呀,真係心都甜晒.氹c人啦.
又會話媽媽靚靚,柏宇靚靚,其實只要你唔大聲鬧佢,佢都唔會點樣發脾氣既.
今晚我仲用筷子引佢自己食飯食菜,仲食左好多添.
如果日日係甘就好啦.

大事化小

6月12日

亞囝今日又係扭計要我陪佢,一早起身,就喊,要巾仔,我俾佢又掉,
結果俾佢自己揀,佢一次過攞晒全部,
我由佢,明知佢係無野搵野黎扭,於是就順住佢講野,滿足佢既要求,
結果佢好快唔喊,仲一路都好安靜好乖甘上嫲嫲家.
嫲嫲話佢到我放學為止都無曳添.
所以好在早2日搵到原因所在,甘我今日咪識應付囉.

大扭計

6月10日

今日係第2日返全日學,今日好趕,因為我要送左囝囝去奶奶家,再行返去我家附近返學,
亞囝今早又好扭計,喊足一個鐘,點氹都扭,我又熱又趕時間,已好忟,於是打左佢pat pat1下,
佢大叫時我又大叫,一齊癲,終於可以氹到佢唔喊,唔嘔啦,上去嫲嫲家途中,柏宇仲不停問我野
點知去到嫲嫲家,佢又開始大叫大喊,扭計要我抱,甘我見仲有時間,就抱左10分鐘,嫲嫲就叫我狠心d放低佢,自己拿拿聲返學,我走左無耐,嫲嫲打俾我話我知亞囝己收左聲,食緊飽睇緊電視,
原來佢知我今日又成日陪唔到佢,於是就扭計,搵到個原因所在.下次都識應付.
嫲嫲話佢只要見唔到我,就唔會扭得甘利害.
有時佢講既野都啱既.我事後都怕自己,點解今早要大聲鬧佢,打佢.
不過當時真的好趕時間,所以人一急,就失去理智.
日後真的要三思三思.

再培訓之家務助理

6月8日

今日第一日開課,頭都痛埋,唔知係咪耐無返工返學,
有d唔多習慣,而且自己又係年紀最細既一個,不過好在亞sir講野生動,
先至無甘悶咋.由於今日返半日學,中午去接柏宇返家,
佢今日好扭計,成日發脾氣,又打人,同佢洗面不停嗌唔洗,
見我拎住條手巾,不停推我走,又唔肯瞓,結果俾我打左6大下pat pat
喊到cc下,平時佢自己喊夠就收聲,今日嫲嫲係度,就乘機咋嬌,亞嫲又就晒佢,
佢話點就點,甘樣我好難教架.所以拿拿聲返自己屋企,返家途中佢已經瞓左啦.
我自己湊慣,知佢係扭眼瞓, 平日俾個枕頭佢自己瞓既,一有其他人就野性,
不過唔怕,仲有幾個月就返學,到時等老師治佢啦.
最近2日,囝囝可以只穿底褲,一急尿就話'譚冠',我就即刻拎高個'譚冠'俾佢,
佢痾完仲拎住'咕咕'fing兩fing.這個動作係daddy教既,佢學得好快,
甘樣就減低d尿週圍滴啦.
其實柏宇好叻仔架,只係好臭脾氣,如果改到就perfect啦.

28個月

6月7日

今日係柏宇28個月大啦,今日無整蛋榚,改為煮左個柏宇鐘意食既餸,
就係中式牛柳.仲整左咸蛋王炒翠玉瓜,這2個餸都係第一次整
daddy都話有少少擔心.終於煮好晒啦.
d牛柳'un'左d,但d汁好好味,柏宇平時食飯食得好少,今日都食左一碗滿,
証明佢好鐘意食啦.等我下次研究下點樣煮d牛柳先,如果煮得淋,亞囝咪食到囉

生日之海洋公園之旅

6月5日

生日快樂,今日係我既生日呀.
daddy一早plan左同我,柏宇,嫲嫲去海洋公園,
我記得我上一次去係未陀住柏宇既,即係3年前,
今次亦係柏宇第一次去海洋公園.今日天氣好熱,
我地8點起身,9點去坐車,因為10點正就開門啦.
由於我地有7折既飛,大人價都係$145.6,只需買daddy及嫲嫲既飛即可.
我仲整左芝士及蜜糖腸去入去食,又有麵飽,朱古力,水...
嫲嫲又帶左6只雞蛋及3個麥飽,好多野食呀.
我地入到去都係行晒山腳底既地方先,玩左旋轉木馬,小型摩天輪,
其中有個地方係可以俾人同鷹鵡影相,
甘我抱住柏宇埋去,點知佢想摸隻雀仔,人地即時stop佢,
呢個囝真係好大膽呀.
到坐纜車上山頂,我就將個囝交俾嫲嫲,因為我好驚呀.
亞囝見我驚到閤埋眼,佢就係度笑,佢係度食飽飽添.
足足10分鐘,終於可以落車啦.
我已經2隻手都濕晒啦.
我地去左海洋館,水母館...不過柏宇怕黑,一入去就要走,不停大叫
所以我同嫲嫲輪流抱住佢出去,唯有靠daddy影相睇啦.
lunch就食麥當勞,之後囝囝小睡左1個鐘,就睇海洋劇場.
柏宇全程行行企企,無睇過,之後再去行埋百鳥居,就回程啦.
總括今日柏宇都ok開心既,係熱d啦.佢都俾蚊咬左一啖,
已經用左蚊貼架啦,我仲用左double添,點知用左double既反而咬得最多,有成17啖呀,
無用蚊貼既,一啖都無,真奇怪.
另外話,今次去海洋公園,除左食lunch外,只買左一個拍手掌既糖俾亞囝,就無用過錢,
連小食都無買過,真係好經濟.買左2張大人飛,3大一小食既麥當勞,一個玩具,
埋單今日都係用左400左右.
晚餐我地返家煎牛排同整意粉.今晚10點幾就瞓晒啦.因為好攰呀.
講多樣野俾你地知啦.
柏宇今晚好搞笑,佢向我打小報告,話daddy曳曳呀.因為daddy鬧佢,佢咪話我知daddy曳曳囉
另外佢成日自己開房門,甘daddy叫佢入房前要敲門,佢真係出返去再敲門,等有人叫佢入去,佢才入,佢真係聽得明架,好叻仔呀.

ps: 今日收到婆婆,姨媽既電話恭賀,joyce,mandy,oliver既sms訊息,好多人都記得我生日架.

姑姑來探訪

6月4日

姑姑好有心,記得我明天生日,於是約我今天食lunch,同我慶祝生日,
我去左左食日本店食2人餐,柏宇只食左2件炸帶子,同埋飲汽水,就咩都唔食
我就因為早餐食太飽,所以都食得唔多,返到屋企,柏宇不停要姑姑同佢玩積木,
姑姑都話所有精力都俾晒柏宇,佢今晚實好好瞓啦.
另外今晚我跟學校既餐單,整左南瓜粟米粥,我就覺得無咩味道,
但柏宇就食左1.5碗,我好耐無見過佢食甘多野啦.真係好開心呀.
明天要去海洋公園,所以9點鐘,囝囝就瞓左啦.不過我太大意,
俾佢係sofa瞓,但又無野欄住,結果佢係我去沖涼既時候,反身跌左落地,
'砰'得好大聲,我即係出來抱佢,佢一路喊,一路瞓返,真可憐呀.

買校服

6月3日

今日要返學校買校服及交書薄費,轉眼柏宇就要返學啦.好期待
因為一返學就會好快成長,有d唔捨得.
爺爺一早就俾左錢柏宇買校服啦. 學校建議買3套替換.
如果未戒到片,就返學先戒,通常約2個月左右,小朋友就會適應學校既生活.
開學時多數只會頭3天俾家長陪上堂.每天一個小時.如果小朋友真係好唔妥,
學校才會額外俾多2日家長陪上堂.另外仲要買一對白色及一對黑色鞋,仲有返學要著白襪.
都幾多野要買.不過柏宇都幾開心,因為校長帶佢去睇操場,有滑梯同大車車,
佢一見到已叫"滑梯",又話去公園,校長都聽得明佢講咩.
原來學校係2日飲奶,3日飲豆漿,都幾健康,返學時間就係8:45am-4:30pm
中午食飯有45分鐘,午睡則有2.5小時.真係好期待亞囝返學後會有咩改變呀.
希望佢可以合群d,有自信d,唔好成日扭計啦.

媽媽起身啦

5月31日

今早柏宇第一句同我講,就係"媽媽,起身啦"
呢個豬仔,一瞓醒就唔俾我瞓,少d精力都c得
今日上午大伯一家來探嫲嫲,下午我地就一齊去佢家玩及食晚飯
柏宇好耐無見柏言哥哥啦.
佢地今次都玩得好開心,伯娘係中心借左d玩具,教佢地2個小朋友一齊玩.
從中學習排隊,耐性,一齊合作,顏色...等等既知識.
我亦學到點樣可以同柏宇多d溝通.有時自己教囝既方法以為好好.
當參考完人地既教法,就可以再改善一下自己,不停學習就會不停進步啦.
唔知係咪玩得太開心,囝囝半夜坐起身喊,不停叫唔要,都唔知咩事.
好在好快都再返瞓.甘我都有覺好瞓啦.

三兄弟一齊玩

5月29日

今日爸爸放假,提議去婆婆家,
平日柏宇一見到有其他小朋友係婆婆家就會喊
但今日無喊,仲同昊昊哥哥及晧云弟弟一齊玩,成日都只喊左一次咋,
有進步.柏宇今日返婆婆度仲食左好多野添.可能有其他小朋友一齊食,
所以開胃d啦.keep住食多d野就好啦.

嫲嫲新曆生日

5月28日

今日係嫲嫲新曆生日,由於佢四月初二十當天舊曆沒慶祝,
於是約左表姑媽今晚在家食飯,我今日整左南瓜西米露做飯後糖水
仔仔每食一啖,就講一次好好味,我心都甜晒啦.
不過佢就好百厭,連嫲嫲都話湊佢好辛苦,不過都沒有辦法,因為我下個月要讀家務助理既課程
一定要交俾嫲嫲湊,希望亞囝乖d啦.咪激c嫲嫲就好啦

一齊玩

5月27日

今日爸爸返晏,我地食完早餐返屋企一齊玩lego.
柏宇好開心,因為平時我成日係厨房整野,無時間陪佢.
通常都係佢自己睇noddy同玩車仔.我最多都係陪佢唱歌,跳舞.
或者玩學習咭. 可能佢好寂寞,所以有人同佢玩就會好開心.
即使只是陪佢睇noddy,佢都一樣開心,我諗,如果經濟許可,我一定會生多一個弟弟/妹妹陪柏宇.
不過,佢9月返學後,可能會開心d,因為多左小朋友同佢玩,唔知到時會唔會日日返來話俾我知佢當日做過咩呢.好期待呀.
今日去左亞yan間鋪,柏宇同慧雅一齊唱歌,都好開心. 日後返左學,仲會叻d添呀.

一齊

5月25日

今日亞囝同我講,"媽媽,一齊坐呀"
之後又話,"一齊唱歌,一齊跳舞"
做咩都要一齊,好可愛
唯一唔聽話就係成日唔肯刷牙同坐廁所.
不過慢慢來啦,另外今日收到學校寄信通知要買校服同書簿.
大個囝啦,要返學啦.好期待呢.仲要出去同佢訂造床墊及被袋.
我諗我到時一定會好感動姐.

母親節

5月10日

今日係柏宇陪我過既第3個母親節.
我地今日返左屯門,同婆婆慶祝,及donna姨媽過生日
今日柏宇有少少進步,雖然都係成日喊,但都有段時間同哥哥及弟弟一齊坐低玩
只係今日唔俾其他人抱,我今日都成日鬧佢,都唔理咩事,佢都只係喊,
我好聲氣問佢氹佢都唔得,係要我大聲喝佢鬧佢就即時收聲,c未,
我唔鐘意甘樣做,唔想佢覺得大聲就係大晒.不過現階段未諗到有咩方法可以治到佢.
佢甘'蛇呱',返學仲c,不過可能真係要俾人教,俾人治先得,眼不見為淨,到時咪交俾老師教囉.
可能佢多左群體生活,會好快適應呢.
另外我今日好開心,因為個個都好鐘意我整既蛋榚,
椰汁紅豆榚都ok好味,連唔多食既婆婆都話ok,肯放入口,見到佢地晚飯後,都可以清晒個cake,
就知有幾得啦.連d小朋友都搶住食呀.唉,我又多左2個小fans啦.
真係超級開心呀.整得辛苦都值既,因為有人欣賞呀.
多謝甘多位賞面.等我得閒又再去研究下其他cake先.
生日蛋榚都可以試下,不過我嫌佢太多cream,好肥呀.但又好靚,真矛盾.

好友有困難

5月9日

今日又係好忙,因為明天要返屯門慶祝母親節及donna姨媽生日,所以今日早d整定椰汁紅豆榚,
仲專登整左個無芝士既蛋榚(但就用整cheese cake既方法整),送俾姨媽生日,
因為唔想嘥左d奶,於是整多個cheese cake俾柏宇食,仲分左一半cake及拎左d椰汁榚俾亞yan佢地食,d椰汁榚好靚架,因為我用左好多花及魚既模去整,出來好cute.味道亦比早2日整既好食,
好滑好軟,而今次個cake都整得好好味,我近d半個月才開始學整芝士蛋榚,半個月已整左6個,
只有1次失手,其他都ok,整一個cake約要1.5小時.不過我今日整2個,第一個用左1個半鐘就出爐啦,
第2個呢就用左1個鐘加20分鐘,快左10分鐘,由於上次諗住一次過整定2個cake既材料而衰左,
所以有少少陰影,今次整好一個,再洗過晒d用具才整第2個,甘就一定無衰啦.
講返亞yan,原來佢老公成2年半無做野,因為有病,佢一個月屋租連鋪租都要成萬幾蚊,
早2日仲因為周轉唔到,無錢買奶粉俾個女食,佢都同我講到眼濕濕.
我無咩可以幫到佢,唯有有時煮lunch時煮多d,拎d俾佢個女食啦.
大人唔食,個小朋友都要食啦. 希望佢先生快d搵到野做,甘亞yan鋪頭生意又好d啦.

27個月大

5月7日

今日柏宇27個月大啦,我今日好忙,打算整西餐做晚餐,包括粟米火腿薯蓉,义燒醬雞翼,蕃茄肉醬腸仔長通粉,仲有椰汁馬豆榚做甜品.
足足係厨房忙左5-6個鐘,無辦法,我手腳慢.
不過今日最忙係要幫柏宇抺地,由於daddy唔俾佢拎個'談冠'係廳痾,一定要佢入廁所痾,
甘可能柏宇未習慣,於是成日係廳痾完之後話我知.最大鑊係佢係成屋痾屎.
問佢又唔識話我知係邊度痾左,變左我要地氈式搜索.係房搵到兩pet,係厨房門口有1pet,
但我清晒之後仲聞到有臭味,終於係noddy書柜前搵埋最隻1pet,真係抺地都抺c我,
仲未計佢食野時食到一地都係喎.
所以我都係決定俾返個'談冠'佢係廳痾,等佢習慣左大小便係'談冠'痾後,先慢慢再教佢入廁所,
step by step.今日個椰汁榚失敗左,因為硬得滯,其他就ok,亞囝仲食左4隻雞翼添,好捧場.
抵我成日整d特別既野俾佢食既

肚"bo"被咬

5月3日

今日返左婆婆度,最近囝囝成日咬損咀唇,又好忟,又成日大叫,
可能熱氣,唔夠瞓,或者出牙.
當我正在同婆婆傾計時,柏宇突然埋黎係我肚"bo"咬左一啖,
我痛到大叫,可能佢牙痕,佢好耐都無咬我啦.我話痛痛,
佢又呵返我,俾佢激c左.
另外今日好扭計呀,成日喊,又發脾氣,結果由姨媽出馬,
由佢發完脾氣先,唔好理佢,唔好抱佢,之後慢慢同佢講道理,
問佢食唔食飯,如果唔食就無得食,佢喊左好耐,結果見唔可以恰到姨媽,
於是乖乖去食飯,仲食得比平時快,因為姨媽會鬧架.佢仲係食晒飯先飲水
唔似係屋企甘,一啖飯一啖水,呢個仔真係要俾人教先得.
不過我都會開始訓練下佢食飯要快d,否則日後返學無得甘架啦.
學校唔會理佢食唔食架.不過最緊要係要佢獨立d,唔好成日甘痴我.
返學就大件事啦.

靜電王

5月1日

今日同叔叔,爺爺,嫲嫲去完飲茶,我地行左去九龍城公園玩,
由於滑梯都幾高,於是我每次都在旁扶住柏宇,免生意外.
但每次我一掂佢,無論係掂衫定係掂手,都俾佢電親,d靜電仲好大聲添.
我本身都好易過電,由其係冬天時份,只係估唔到甘熱既天氣,
我兩母子都會觸電姐.唔通我遺傳左俾亞囝?

第一個cheese cake面世啦

4月29日

本來昨日應承整芝士蛋榚俾亞囝食
但後來先記得電腦壞左,無得睇食譜
於是昨晚daddy即整機,我今早6點幾就起身整餅啦.
結果忙左2個鐘,香噴噴既cheese cake就做好啦
今次既蛋榚比之前既小蛋榚好唔同,
因為好軟綿綿呀.又香芝士味,唔知係咪香得滯,
仲整醒左柏宇添.
我都忍唔住食左2件做早餐.
連柏宇同嫲嫲同話好好味呀.
等我下次整俾婆婆試下先.

搞daddy食dinner

4月27日

今日無野做去接daddy收工,
晚餐就去左食深圳雞煲,太耐無食啦.我仲一口氣食左1.5個烏冬添.
好滿足呀.
不過又係突然加左個佢既同事落黎,
好在我一向唔多理,自顧自食,反正都aa制,有食唔食,罪大惡極
食完我仲自己同亞囝返家先,後來daddy話我知,個餐飯佢同事請,早知我就再叫多d野食啦.
蝕左添.嘻嘻...

第11堂pg

4月26日

好多個月無返pg啦
因為黎緊5-8月pg搬新地址,所以我報左今日返學
雖然柏宇甘多個月都無返,但一樣不停甘周圍走,無佢乎,
又係影響晒其他小朋友.佢今日仲叻,走去搞miss karla既播音機,
連miss都話佢係clever boy, 我話佢百厭就真.
亞囝最叻做copy cat,人講咩佢講咩,不過佢未必知道當中意思.
俾佢激c.之後我地又去左行蛋榚材料店,當然又大出血啦.
成日話封爐,但又忍唔到手.暈啦.

Ruler

4月25日

今日亞囝自己玩學習咭時,佢跟手入房拎左把間尺,
原來佢手上個張咭係有間尺圖案,甘佢咪入房拎間尺,話我知係同咭上既一樣囉
我都無教佢,佢都識搵,都幾叻仔架.
有時有會見到其他野,好似筷子,飯,蛋榚,漢堡飽,雪榚...佢都會話俾我知
依家D咭既圖案真係晝得好似架,所以小朋友一睇就明架啦.

扮型仔

4月24日

今日同亞囝去買豆漿,間鋪2邊都有鏡,亞囝雙手揷袋,懶型甘款.
到我走時,佢仲一隻手拖住我,一隻手揷袋,c未.
又貪靚要搽香香,又扮型,仲要人地成日讚佢叻仔同靚仔.
有時真係以為自己生左個女架.

地下痾屎

4月23日

今日好忙,所以無時間俾亞囝自己痾尿,
到傍晚先得閒,佢自己痾左幾次尿後,突然同我講痾左屎呀.
我以為佢係想痾屎,一睇原來真係痾左屎係地下,好叻仔,我仲以為佢要係片片先痾屎
諗佢慢慢教佢坐廁所痾,點知佢企係度都痾,好開心.我一d都唔介意要'執金'
只係教佢下次可以好似痾尿甘,係廁所痾屎.
期待中...

靚仔有著數

4月22日

今日同亞囝去公園,行過一間生果鋪,甘個老闆撩亞囝,話佢好大對眼,仲有個佢對眼,
甘我禮貌上同柏宇同人打招呼,點知個老闆請佢食個蘋果芒果(即係蘋果種既芒果)
亞囝又老實不客氣去攞.幾唔好意思.唯有叫佢去多謝人地啦.
所以話呢,原來唔係昊昊,皓云先有野送架,我地唔買都有得送呀.哈哈.

可以自己去痾尿

4月21日

今日已經同亞囝試戒片一個星期,由於成日出街,唔係日日係屋企,所以唔係日日俾佢自己學習用廁所痾尿.今日我照舊放個兒童廁所係廳,佢早上10-12點,短短2個鐘,已自己去左5次啦,
不過就唔俾人望住佢痾,要喱埋.我都無提佢要去廁所,只係成日話佢知,如果急就自己去痾啦.
我諗甘樣叫做試自己去廁所掛.
另外,佢早幾日俾廁所門夾到,隻左腳既腳指公損左塊皮,佢今日成日同我講痛痛,
甘我同佢沖涼後,諗左好耐,結果要貼膠布才話唔痛,唉.唔知會唔會做左細舅父三世呢.
因為昊昊已經做左二世啦.

太嫲生日

4月18日

今日係太嫲生日,我凌晨1點開始整蛋榚,諗左好耐,終於整左個海綿蛋榚,
甘樣可以切呀麻.今次係第2次整,上次唔記得篩粉,焗出來既蛋榚完全好似石頭甘硬
今次跟足食譜做,出來既cake比上次發高一倍,亦好鬆軟,但一定無得同餅店師傅比,
做埋清潔,4點鐘先有得瞓,不過我覺得值得,因為今日係太嫲80歲生日,我好想每年都有機會可以親手整一個cake賀佢生日,雖然賣相唔靚,但心意搭夠.
今日中午除左我地,仲有公公同拉叔公一家去酒樓飲茶.私就一早上左太嫲家放低個cake先
下午返去就請太嫲切cake分俾我地食,好緊張呀,唔知好唔好食呢,
姑姑同太嫲都話好食,好似餅店個d一樣,仲提議我可以自己整完拎去賣,
公公仲問我到底係我自己整既定還是係街買既,可能佢地氹我開心,不過最緊要係太嫲開心就得啦.
而且無論整成點,亞囝一齊會捧埸全部幫我掃清光架.
晚上我同公公都有同太嫲食飯,由於大家都無工作,我地去左茶餐廳食,叫左3個小菜套餐.
個間店d小菜都幾好味.我地7點食完就返家啦.
祝太嫲身體健康,日日都開開心心.
不過有柏宇係度,佢地都真係好開心架
而我仲應承左姑姑等佢生日會整個芝士蛋榚送俾佢架.
甘我就要係8月之前試下整先,再搵人幫我試味啦.

係廁所痾尿

4月17日

今日亞囝成功係兒童廁所痾尿,我見佢想去,即時拎個小廁所俾佢痾,真係留意左好耐架啦
佢成功之後我讚佢好叻仔,佢又跟住我講叻仔,仲好開心添.
不過仲要日日訓練佢架,一齊加油啦.

係兒童坐廁尿尿

4月14日

今日俾亞囝試下去坐兒童坐廁,佢坐左一陣就要起身,要我抱,點知一行埋我身邊就痾左少少尿係地下,
甘我即時叫佢企係兒童坐廁旁痾,佢開頭唔痾,忍住,後來斷斷續續左四至五次才企係坐廁痾晒篤尿,
我讚佢well done,佢好開心,係好既開始.不過之後都再試左2次,佢都額忍住唔去,我試過俾佢坐左成半個鐘,
佢都唔痾,話痛痛,真係要遂步慢慢來,唔好甘心急,最緊要唔好成日俾身邊既人影響,
因為你一句,佢一句,真係搞到我人都亂晒架.
我都好想快d介到片,好想佢日日早起身,第時適應到返學,大人都要時間啦,可況甘細個小朋友
佢都唔知點做好,我都要EQ高D,否則點教亞囝喎.

不停除褲除片

4月12日

今日好忙碌呀.
因為亞囝成日趁我做緊野既時候,自己除袗除片呀.
第一次除左叫痾左屎,我咪打算同佢去廁所,點知原來佢係片片痾左屎,自己除左,
甘我即時同佢去沖涼啦,剛開完水,叫佢入去沖,佢就係廁所門口既地氈痾尿,
甘我同佢沖完就去洗地氈啦,順便自己沖埋涼.
我都一路沖一路望下佢架啦,見佢唔到,咪以為佢係房玩電腦.
點知突然叫媽媽痾屎,我即時望出來,見佢又除左褲同片,我即刻著衫出來,
因為怕佢周圍痾,即時同佢著返片片先,再跟手成屋check下佢有無周圍痾,
好在虛驚一場.都係時候要訓練佢去廁所痾同埋介片架啦.
甘我要開始同亞囝一齊作戰啦.加油,俾心機呀,一定ok架.

有樣學樣

4月11日

今日我係厨房整野時,亞囝係sofa倒頭跌左落地,當然大喊啦,
我只能用力抱住安慰佢,等佢唔駛甘驚,待佢平伏後,我打算放佢落地.
點知我失重心,佢落地後我都跌倒,仲撞到條腰,當堂痛到眼有淚光,
坐左係地下唔郁,亞囝見到即時過來好大力甘攬住我,唔放手,好似我之前攬住佢甘安慰我.
雖然佢唔識講,但我知佢見我有痛,佢想好似我氹佢一樣甘氹返我,好touching呀.
真係越來越體貼呀,好大個仔啦.

26個月大

4月7日

今日柏宇26個月大啦,今日daddy好大頭蝦,唔記得帶鎖匙,甘我地瞓到成11點,之後先拎去俾佢,順便食埋lunch先返屋企,柏宇係daddy做野既公司搞搞震,不停撩人同佢玩,又不停想搞d機,個office淨係聽到佢把聲,
玩轉甘滯.由於我今日唔多舒服,所以回來後又同亞囝瞓覺,今日無煮呀,同柏宇去左大家樂食雜排餐.
不過,佢只係對條腸有興趣咋.其他一概唔食,仲好,益左我食多d.嘻嘻.
昨日去磅有10.6kg,83cm高

試用杯飲奶

4月6日

由於d奶樽用晒未洗,今早試下俾亞囝用隻佢鐘意既杯飲奶,
因為日後返學都係用杯飲既.佢用口飲左d,之後又用飲管飲,都ok既
今日佢指住個頭話痛痛,因為昨日既蚊懶腫到好似雞蛋仔甘,另外又自己要除褲,不停按咕咕,
甘我問佢是否咕咕痛,佢指住咕咕叫痛痛,我咪即刻同佢去睇醫生,原來咕咕洗唔乾淨,成日有d尿係度,分泌線發炎,甘我順便睇埋個咀角同個頭皮,醫生見到亞囝個頭甘腫,都話媽咪有無搞錯呀,周圍都腫到一舊舊既,
唉,我都真係唔知點做人亞媽,個囝d皮膚成日都甘樣,醫生話可能亞囝食得重味精,甘我煮野食就唔好玥甘重味啦.今次唔駛食藥,只係要搽3種藥膏.我見亞囝睇醫生都好合作,於是去左買飽飽俾佢,遇到藝人方中信,因為佢好高大,我先望多眼,睇真d先知佢真人係幾型仔架.
結果今日返到屋企都5點啦,甘又過左大半日啦.

拜山

4月5日

今日爺爺,嫲嫲及叔叔約左我地飲茶,
佢地之後話去拜太爺及太嫲山,
本來我同柏宇都唔去,點知爺爺問我地有無興趣去行一轉,
甘佢開到聲,即係想我地去啦,因為今年老公唔得閒去,
加上我己經話左唔想帶亞囝去,但叔叔話可以我入去裝香時,佢抱住柏宇咪得囉
即係無藉口推啦.咪順佢地意去囉
拜完仲同亞囝去左公園玩左一陣,不過佢俾d毒蚊咬到個頭皮幾處都腫晒
真係陰公.不過總算盡左本份,費事日後爺爺嫲嫲怨.

兒童節

4月4日

今日係兒童節,本來都無咩節目,但婆婆叫我地返屯門.
甘就返去行下啦.因為昊昊都返來,甘咪可以同柏宇一齊玩囉
不過柏宇好蛇呱,成日不停喊,唔太獨立,真係要好好訓練佢先得
咪日後返學俾人蝦c佢,老師邊理得甘多呀.
今日去左市廣場,有隻大復活蛋,同亞囝影左d相,就去左反斗城買玩具
我買左個可以拍既搖鈴,至在應下節,兒童節叫做有禮物,
因為亞囝實在有太多既玩具啦.真係唔想再買甘多俾佢啦.
夠就算.

千金難買愛心餸

4月2日

今日突然返屯門,同公公食飯
婆婆並不知情,點知婆婆當日整左冬菇海參炆豬肉,正呀.
由於婆婆成日驚我無得食,於是順理成章俾我拎返出去慢慢食.
嘻嘻,漁人得利.因為我真係好掛住婆婆整既餸架.
人地話所有人都會鐘意食自己亞媽整既餸,
因為由細食到大.我係甘,亞囝都係甘.
所以婆婆每次都會等我地幾姐弟返去時,出盡法寶整好野俾我地食.
甘我都要學好d厨藝,將來除左煮俾囝囝食,仲可以煮返俾婆婆食添.

終於食菜啦

3月31日

今晚煮左菜心肉絲,將d菜葉剪碎加肉絲拌飯,
亞囝終於肯食啦,不過都要用雪條去引佢,同佢講食晒飯餸才俾雪條
雖然甘樣做係唔好,不過佢肯食,已係開始既第一步,慢慢來啦.

道高一呎,魔高一丈

3月27日

今晚煮飯粒湯飯,亞囝只食肉,其他配料唔食,甘我迫佢食左一細粒冬瓜,
佢係好唔情願放左入口,點知佢將d冬瓜收左係左右2邊唔吞,我都覺得奇怪,
點解佢2邊腮都脹卜卜,原來係甘,叫佢咬爛吞,佢就c都唔肯,
佢d古感招都唔知係邊學返黎架.無佢辦法,結果罰佢無得食,由佢夜d餓先食奶,
所有雜糧一律唔食,由佢餓下都好,成日揀飲擇食.等佢知食飯時食飯,唔食就唔會有其他野食.

飯後幫手收拾

3月24日

今晚懶,無煮飯,得我同囝囝食,於是去買左飯及麵做晚餐
食完後,我先執左d碗及麵入厨房,出面只剩盒飯未執,
當我轉身想出去執時,亞囝己捧住盒飯係我身後面,
佢有甘既行為,証明佢有意識食完飯要幫手收拾,我都好surprise.
不過由細訓練佢做家務都好架,日後唔會甘懶呀麻

第一次去髮型屋剪髮

3月23日

今日終於去左同亞囝剪髮,不過行左好多間都係好年輕既女髮型師,問我亞囝會否喊,
甘我之前係屋企剪開都喊,我諗出去俾人剪都會喊掛.
無人肯幫佢剪,於是我差不多行到近奶奶家附近,終於搵到間係年紀大少少既男髮型師啦
佢開價50元,哇,甘貴既,如果唔係行左甘多間都無人剪,我一定走人呀.
入去後,個師傅都好有耐性氹囝囝,不停讚佢靚仔,甘亞囝都無咩驚,之後師傅開個電剪,俾佢聽下d聲先,
之後剪時,亞囝只係側一側頭,約5分鐘就剪好啦,亞囝無喊過,只是到最後叫我抱抱咋.好叻仔.
有時d錢真係要俾人賺先得架.
另外亞囝現已識表達話我知,腳腳痛痛,要飲野,去公園,真係日日都有新鮮事架.好開心呀.
唔知呢d生活可以維持幾耐呢.

小型聚會

3月22日

今日joyce同她男友來探我地
我今日係家煮飯,因為出去食太貴啦.
今日整左魚型砵仔榚,試下用個新年榚模,
雖然唔多夠色,但外型及味道都幾好.
又整左炒銀珍粉,焗粟米煙肉薯蓉,炒娃娃菜,新加坡沙嗲雞肉串燒,粟米魚肚羹
雖然多功夫,成日係厨房,不過大家食得開心就得啦.
最開心都係柏宇,因為有人陪佢玩麻,玩到咔咔大笑,
隻豬仔都好俾面,今日食左2件砵仔榚,仲食左成碗銀珍粉呀.好捧場.

第一次整曲奇餅

3月20日凌晨

本想係昨日應承左整曲奇俾亞囝食,不過時間上唔許可,
於是我又要等囝囝瞓左之後才可以整,甘佢就早上瞓醒有得食啦.
今日第一次整,都好一舊雲,因為唔知點樣搓粉團.我用左一套三個既交通工具模去整,
有汽車,船同飛機.講真,真係比整蛋榚用多好多時間架.
因為要吸模之後又要脫模,可能我唔識整啦,又或者d粉團搓得唔好啦.
總之如是者搓左10幾次,脫模唔靚既又整過,終於整左24件曲奇啦.
有23件用交通模整,最後個件我整左一個圓型,上面寫左個'宇'字,
我吸好晒模都2點啦,要快手焗好晒佢,因為我好攰啦.
唔知好唔好食架呢,等我陣間試塊先.
下次有機會再整俾昊昊食先.

忙碌的一天

3月13日

今日好忙,因為plan左明天回屯門,所以今日專登整左砵仔榚,蛋榚仔,打算明天俾家人試下我既小手作
另外仲整左啫喱俾daddy同囝囝食,點知一齊整好晒後,婆婆話明日天氣得11度,姨媽又話唔返去,
於是我將d蛋榚,砵仔榚分晒俾嫲嫲同亞yan食,我整甘多次砵仔榚,最色香味就係今次,囝囝可以一次過食晒一個.甘就証明真係好好味啦.整定婆婆無得食,雖然最後都有返到屯門,但由於我係臨時臨急再整過,一d都唔好食,
所以我全部倒晒囉,下次啦,實會有機會整俾婆婆試下既.

香煎藕餅

3月10日

今晚dinner食香煎藕餅,我又有蝦碌野啦,
我今日買左20蚊墨魚膠,買左一段蓮藕,點知蓮藕多過墨魚膠n甘多倍,我又唔想嘥左d蓮藕,
於是夜麻麻去買左10蚊肉碎,結果整左6件墨魚藕餅,17件豬肉藕餅,我仲擔心仔仔唔食,因為蓮藕係爽既.
點知亞囝好鐘意食豬肉藕餅,仲淨食餸唔食飯,激c,昨晚整蠔油薯仔雞翼,佢又係甘樣,淨食餸,
今日餐飯食左成1.5小時,終於可收拾碗碟啦.我拎入厨房時,出來竟見到亞囝手拿住件豬肉藕餅黎食,
俾佢激c,我咪問佢,咩你食唔飽咩,但佢個肚仔係超級脹架,呢個豬仔真係同我一樣好為食,
但都好開心,因為甘樣代表佢鐘意食,daddy都覺得好好味.甘都不枉我用左甘多時間去整呢個餸.

回身一攬

3月9日

今日亞囝睇緊雅培既奶粉廣告,一路跟住拍手,當拍完手後,佢突然回身一攬我,
第一次甘肉緊甘攬實我咋,我都好surprise.
個刻好warm呀.真係越來越多驚喜俾我啦.
如果老黎都可以甘攬落去就好啦.
真係發覺自己愛個囝多過daddy啦.

鼓油皇炒麵

3月8日

今日daddy order晚餐食鼓油皇炒麵
我又係第一次整,色與香味都ok,但就'淋'左d,同無咩味道,唔似茶餐廳整個d
不過亞囝都一路食一路話好味,我地都食晒一大碟麵,仲有芽菜火腿絲伴食呢.
再夜d,daddy話餓,sorry呀.今晚所有餸沽清啦.
佢就將我雪柜d野食全部掃清光,肥c你呀,daddy.

25個月大啦

3月7日

今日囝囝25個月大,我整左一個天使蛋榚(又名蛋白蛋榚)
又係第一次整,我覺得甜左d,但今次既蛋榚好鬆軟,幾好味.
我仲專登叫囝囝捧住個蛋榚影相添.
呢排自己湊返,亞囝次次瞓醒都好嗲,要我抱,唔抱就喊,俾佢激c.
不過我會睇情況,如做緊野,我都會同佢講唔抱,佢喊我就話佢架啦.
一鬧佢或喝佢,就會收聲,唔敢再扭,不過我就唔多想用甘既方法囉,費事俾佢有樣學樣.
另外亞囝越來越古惑,成日掉虎離山,呢頭叫我去幫佢拎野,個頭就入左房玩電腦.
總之成日做跟屁虫,我去煮飯都要成日抱抱,不過雖然有時覺得煩d,但講真佢痴我既日子又有幾長呀
所以係佢瞓晏覺既時候,我最好做妥晒d野,甘咪可以多d時間同佢玩囉
佢最近又識好多英文生字.成日自己指住身邊所有野,總之有字就自己讀佢識讀個d.好叻仔呀.

返婆婆家

3月5日

今日daddy唔返來食飯,所以我帶囝囝返婆婆家,諗住等亞囝同弟弟玩,
點知弟弟今次反常驚左柏宇,亞囝就反而好活躍,唔怕人,玩得好開心,真係大個囝啦.
今日可以抖返日,唔駛煮,因為日日諗食咩餸都好頭痛架,又要就到daddy,又要囝囝都食,
試過煮好左,亞囝係唔食架,搞到要另外煮麵俾佢食,頭都痛埋,
今日婆婆煲左海星湯,好特別,不過好好飲.亞囝又食左好多野,所以今日痾左4次便便.
婆婆話可能食滯左.嘻嘻.係屋企無甘多野食架.
好在係婆婆家沖涼才走,因為囝囝一上車就已經做左豬仔啦.
落車都迷迷糊糊.不過半夜就喊醒,可能玩得開心掛,不過遲下佢就會慣架啦.

焗豬排飯

3月4日

今日整左焗豬排飯,唔知daddy係咪驚做白老鼠,所以臨時唔返來食,
結果一大盤當然食唔晒啦.今之第一次整,我覺得酸左少少,不過亞囝好捧場,食左一碗,
不枉我專登整俾佢食,無論我整咩都甘捧場,抵我錫晒佢.
(其實係亞囝仲細,唔多識分好唔好食姐,總之有得俾佢食佢就高興,我自己自我安慰姐)
不過講真,整呢個飯都好多功夫架,總之出來好食就得啦.

正式做家庭主婦

3月2日

昨天是星期天,今日開始我正式唔駛返工啦.
係屋企湊囝,煮飯,打理頭家,搵錢養家既責任就交俾爸爸啦
不過我都會慳d洗錢,只是要辛苦公公婆婆及嫲嫲啦
因為我唔做野,要cut佢地家用先頂到頭家,唉!
奶奶身體唔多好,亦已出聲叫我等佢好返才好再搵野做,
不過我都同daddy講好,如果佢有困難,我都會再出來搵野做既.
總之見一步行一步啦.
今日第一日自己full day湊囝,佢瞓晏覺時我又瞓,
所以咩都無做過,時間過得好快,睇黎我都好適應甘優閒既生活啦.

赤柱之行

2月28日

由於今日唔駛返工,我一早約左lily來港,等我老公收工後去赤柱行下
入到佢都係1:30pm,即食左野先,因為我怕暈車浪,今早唔敢食野.
我又焗左d蛋榚仔俾lily及亞囝食.今次用左個muffin新模,好靚架,又可以慳返d紙杯模啦
我地食完野行晒成個赤柱,中途仲買左一支泡泡槍,lily負責吹,亞囝就追泡泡,daddy影相,
個傻豬好痴lily,成日要同佢玩,不過由lily第一次見佢,亞囝己跟佢,我諗呢d係人夾人緣.
之後坐巴士出返去市區,甘就出事啦,我坐小巴入都想嘔,但無野嘔,坐巴士嘔左2次呀.
搞到daddy要抱住亞仔,lily要幫手拎晒我地2個既背襄,真係唔好意思啦.
晚上去左黃大仙打邊爐,由lily請客.之後佢係我地屋企留宿做廳長.
亞囝同佢玩到癲晒,又係要大喊一輪先瞓,因為今日係車瞓左45分鐘咋,
佢已經攰到瞓唔到狂喊啦.真係唔發火鬧佢,都唔收聲,好無佢乎.
不過佢呢2日又開始打我啦,好耐無打人啦.都要係時候諗下辦法好好教下佢,唔好成日發脾氣先得啦

海棉蛋榚

2月27日

昨晚第一次整海棉蛋榚,睇個食譜好似好易,
其實都有d難度,加上我唔記得篩粉,出來既蛋榚無咩點發大同埋好硬
好似食cheese cake甘,我將佢分左4份,亞囝食左2份,我一份,另一份俾左碧姐
當係最後一點心意,今日謝生同我講,話如果我今日交接晒d野,明天可以不用返了
甘我今日lunch同佢2個飲茶,當係多謝佢呢3年既照顧.'謝師宴'
不過大家都爭埋單,好老土呀.最後當然唔夠我爭啦.
不過我今日真係食得好開心呀.好似返左去剛剛入去做既時候,同謝生有講有笑.
祝佢同我一樣,日日都甘開心健康啦

成功戒奶咀

由2月14日開始,我叫囝囝將佢咬爛左既奶咀親手拎去掉,之後就唔再俾奶咀佢食,
佢起初都係一到瞓覺時間就問攞咀咀,每次我都同佢講無啦,你唔記得自己掉左啦.
佢由第一次自己係度'ee arar'左一個鐘,慢慢減至50分鐘,40分鐘,
直到第5日,終於唔再問啦.亦都習慣左無咀咀都可以瞓覺.
期間有d真係唔忍心想俾返佢,但諗下甘多日都捱過左,唔想前巧盡費
即使佢眼淚鼻水一齊流,都唔俾,今日第11日啦,我諗應該叫做成功戒左啦.
等我做全職媽咪後,就要再戒片片同佢train下個午睡時間,等佢可以適應返學時間.

買整蛋榚既模

2月22日

今日用左daddy同囝囝去左旺角信和買整蛋榚用既模及麵粉,
越買越多,買左成2百幾元,不過都會用得著,日後唔駛返工,就會多d係屋企整野食架啦
好開心,辛苦daddy幫我拎啦,晚上就約左kelven及mandy打邊爐,佢地又買左盒車仔俾柏宇
亞囝同kelven玩得好開心,佢有得食有得玩,就最開心架啦.
做小朋友真好,無憂無慮,我都想囝囝過一個好開心好開心既童年呀

再整砵仔榚

2月21日

因為早2日烚多左好多紅豆,諗住唔好浪費,於是今晚又整砵仔榚
吸取上次經驗,今次沾米粉唔落甘多,反而木薯粉同馬碲粉落返多少少,
出來果真色香味俱全.又軟又煙'un',唔知囝囝鐘唔鐘意食呢

初試整砵仔榚

2月19日

今晚想試整砵仔榚,因為碧姐鐘意食,打算學左整來請佢食,作為一點心意
其實製作好簡單,最多功夫都係烚紅豆,如果買到即食紅豆就會方便d
我都整左成2個鐘,出來既賣相ok,香味ok,味道都ok,不過係好硬,所以最終掉晒.
但都有影相留念,因為賣相同街外既真係差唔多架咋

慶祝gloria姨姨生日

2月17日

今晚放工即返家接囝囝去紅磡,因為約左gloria姨姨同佢食飯慶祝生日
我地去左一間叫札幌既店食拉麵同炒飯,柏宇係第一次見姨姨,但就同人地好熟甘樣
又俾人抱,又咀咀人地,仲玩到癲晒,可能人夾人緣啦.
姨姨又買左盒餅,又俾左2封利是囝囝,囝囝則回贈香吻.
今晚亞囝好欣賞d野食,食左好多呀.我地玩到10點就要返家瞓覺啦,
因為小豬仔好攰啦.
我都好攰啦,早前因為要趕工手造呢份十字繡福扇電話繩送俾gloria,
我捱左好多晚夜啦.好在個個見到都讚好靚,甘我都好有滿足感.
我越來越對煮野食及小手作有興趣啦.
一定會加油去做好佢既.

特別驚喜

2月16日

今日中午奶奶突然打俾我,話佢同亞囝係我公司樓下,
因為佢地約左2點半去健康院,甘奶奶咪早d帶亞囝行黎囉,
我就陪佢地行左一陣,囝囝好開心,碧姐都讚佢好叻好靚仔呀.
佢都好鐘意行路,我話抱佢都話唔好.
差唔多1:35pm,我要返公司食飯啦,甘奶奶拖住囝囝走,
佢一步一回頭望我,好唔捨得佢呀.個刻好想走上前陪佢去到健康院才返公司,
我越來越唔捨得囝囝啦,好想時時刻刻陪住佢成長呀.

又搞搞新煮意

2月15日

今日一早去又JUSCO買餸,因為準備今晚整西餐
老公又想食牛排,我地去買左一件$35/G既加拿大肉眼,都要成$110/件,我未買過甘貴既排自己煮
驚失手晒左件排.我仲打算整粟米雞蓉腸仔煙肉蟹肉長通粉,芝士粟米火腿焗美國薯,蒜蓉焗雞翼.
今晚一定夠飽.因為囝囝唔多鐘意食肉,所以我先要樣樣整D,超碼佢唔食A,都有B可以俾佢食.
我真係好怕佢唔食野架.
起初囝囝只食腸仔,唔食通粉,之後就只食薯仔,咩都唔食,
都最後佢樣樣都食D,不過最鐘意都係焗薯,我直頭俾佢成個自己用匙'畢'黎食,
佢食得好滋味.結果佢個肚仔好脹呀,要我stop左唔俾佢食甘多.
呢隻豬仔,真係一係唔食,一係食到唔知飽,十分可愛.
我今晚實左煮得太多啦,所以可以留一d明天俾奶奶及亞囝做午餐,我自己又帶一d,
仲留左一d俾daddy明晚放學回來自己食.
下次要注意一下個份量先得,次次都甘大堆頭,嚇親人呀.

代人作文一篇

本來唔打算幫個朋友作文,點知佢今次個topic係講下最難忘既一餐飯及人,地點
甘我因為剛同亞囝開左生日會,所以咪以此為題才啦
LAST SATURDAY IS MY SON BIRTHDAY,
WE HOLD A BIRTHDAY PARTY IN OUR HOME.
WE PREPARE MORE FOOD, INCLUDED POTATO BALL, FRIED RICE, MEAT SAUCE-SPAGHETTI,
CHICKEN WIGN, VEGATABLE AND MANGO PUDDING.
OF COURSE, ALSO HAVE A BEAUTIFUL BIRTHDAY CAKE.
I THINK THIS IS ENOUGH FOR TEN PEOPLE.
AROUND SEVEN O'CLOCK, ALL PEOPLE IS ARRIVED.
WE EAT THE BIRTHDAY CAKE FIRST, OVER VIEW ALL FOODS,
I MOSTLY LIKE THE MANGO PUDDING. BECAUSE THE PUDDING IS FLOWER SHAPE AND INSIDE HAS MORE FRESH MANGO. TONIGHT, WE ALL FEEL SO HAPPY AND EXPECT THE NEXT BIRTHDAY PARTY COMING.

第2次整小蛋榚

2月10日

其實昨晚已手癢,想整蛋榚仔食,
但daddy好晏返,我又有好多家務做,
所以留到今日才整
今日我自己一手一腳整,好有滿足感
同埋我想俾亞囝試下即炤即食既好味,所以忍心唔俾佢瞓住
結果等到成11點,先焗好晒,亞囝仲連食左3個呢,
証明佢都覺得好食啦.
不過今次既賣相好過上次好多,無燶,全部金黃色,
仲好好味,我留左4個準備明天請碧姐及謝生食,
當多謝佢地啦.
其他就留俾囝囝同嫲嫲食.
我都係時候要去學下整其他蛋榚啦
驚亞囝食厭呀.

柏宇2歲生日會(屯門篇)

2月8日

昨日係屋企同柏宇搞2歲生日會,由於地方唔夠大,無請到婆婆佢地來
於是今日係屯門補慶祝柏宇生日,由婆婆及姨媽整野食,
囝囝瞓到10點半才起床,我地入到去都已12點半啦
真係等食.嘻嘻.
今日有好多野食,有雞翼,腸仔,煙肉腸仔卷,豬排,春卷,咖哩角,煙肉腸仔炒長通粉,
魚蛋,什菌炒蔬菜.柏宇食得好開心,食左好多呀.
今日柏宇都唔算怕羞,同舅父玩到咔咔笑,亦有同昊昊玩,
兩兄弟仲一齊拖住手行去食晚飯,晚飯去樓下大排檔食,亞囝都食左好多肉,
唔知係咪我地整得無甘好食,所以佢係屋企唔食肉呢.
今日無咩點瞓覺,豬仔上車已經瞓左啦.
希望佢發個好夢啦.

2歲生日

2月7日

今日係柏宇囝囝2歲生日
今日我地係屋企搞大食會,
今次係一個挑戰,因為將會由我一個人負責8大2小既食物,
我今日會整焗粟米火腿薯波,焗蒜蓉雞翼,炸什丸及腸仔,
炒飯,焗肉醬意粉,蒜蓉炒豆苗及西蘭花,芒果布甸,同埋買左一個一磅既多啦a夢生日蛋榚
本來想自己整cake,不過無時間,下次有機會既.
我由中午12點整到7點, 食後評價係大致ok,只是意粉唔夠汁同干左d,薯波淡左d.
今次對我來講,好有滿足感,下次會再小心控制焗火.務求完美
今日生日會有個小意外,就係亞囝玩自轉時,柏言突然拉住佢衫尾,甘亞果就飛左埋個電視柜右邊既cd架度,將個cd架撞爛左.我無作大架,成個動作真係飛左過去,奶奶即時埋去抱起亞囝,
今次有件事啦,撞得好甘,個額頭仲有條疤痕. 不過小朋友玩無得避免.
我亦無怪柏言,但大佬就發大嫂脾氣.我就覺得好莫須有.
事後佢地走晒,爸爸有事外出,我就要暗左囝囝瞓才半夜1點起身做清潔
洗碗,抺爐,抺地等等.做到4點先有得瞓,好攰呀.

變臉大王

2月5日

今早係街同柏宇講,叫佢俾個奶咀我,人地笑笑佢架,好醜怪呀
佢即是唔食俾左我
今晚如是者甘做
當時我在收拾手袋, 奶奶係厨房,
亞囝企係枱邊,佢聽到我講唔好食咀咀啦,好醜怪架,
佢即時狂喊,俾佢嚇左一跳,
奶奶即時問佢咩事.結果俾返個咀咀佢, 就唔喊啦.
奶奶俾佢引到咔咔笑,甘亞囝又一齊大笑
當時仲係一邊流緊2行眼淚,一邊大笑
真係俾佢激C,唔做藝員嘥晒呀.

講野叻左

2月2日

今日我要返工啦,呢個新年假期,囝囝講野叻左好多呀.
好多野都識講,我仲教佢講自己個名
起初我講一句,佢跟我講一句,
到第2日,我問佢叫咩名,佢答我,名: 柏宇
到第3日,我問佢叫咩名,佢直接答我:柏宇
即是佢己有concept,知點解同識對答,
學得好快,真係好叻仔.
I PROUD OF MY SON.

俾亞囝考起

2月1日

今日個囝可以話完全好返晒
甘佢食左甘多日清淡食物,
我咪專登整左火腿洋蔥薯波,
點知亞囝唔like洋蔥味,一啖都唔食
我即時頭都大埋,即刻要整熱蘿白榚
點知亞囝又唔食,唉,都不知要氹左幾耐先至肯食
我都怕個囝唔食野,因為佢已經好瘦架啦.
病左甘多日,又瘦左甘多,心都痛埋.

初三BBQ

1月28日

今日約左去耀叔叔家BBQ,
由於無人得閒幫手買野食,
所以我地2點多己入到元朗幫手
亞囝就係差不多落車時才瞓著.
結果我抱住佢瞓左唔夠一個鐘,
最近因為日日出街,搞到佢D午瞓時間亂晒
玩足一日又無瞓晏覺,又玩得太癲,
結果晚上又發夢大喊.
今日有力行哥哥及浩逸弟弟一齊玩,
力行哥哥大柏宇半年,佢地好啱玩,
中途明叔叔吹泡泡槍時,2個小朋友掛住玩泡泡
互相撞埋一齊,結果柏宇跌左落地,撞到個頭.不過喊左一陣姐,
D小朋友又去左會所玩左一陣,
爸爸就負責燒野食,我就只需照顧囝囝,
可惜BBQ時間只能去到9點,有點未能盡興,
走時柏宇唔捨得力行哥哥呢
同昨晚一樣,柏宇係車上已瞓左啦.
隻豬仔又唔沖涼啦.

初二開年飯

1月27日

今日11點入到去屯門搵公公去行山
我地由11:30am出發,行到成2:00pm才完畢,
亞囝今日好勁,自己行左好多路.唔俾人抱.
我就有d腳軟.睇怕都有幾日痛啦.
飲完茶先至返去婆婆度.都己4點啦.
我地今晚book左去黃金海岸食buffut
公公同亞妹同我地去一齊食.
不過今晚d野就麻麻啦.無上次甘好食,
中途仲有財神大派朱古力金幣,昊昊同柏宇都好開心.
總括今日亞囝玩得好開心,成日不停唱歌,跑跑跳跳,
回程中己瞓左啦.

大年初一

1月26日

恭祝各位身體健康,笑口常開.
個個衣食無憂.
今日我同囝囝自已坐車去契婆家,之後再去太嫲家
今日柏宇好扭計.全日要我抱,
直至下午係太嫲家食完通粉才落地玩左陣
搞到我頭都暈甘滯.
可能佢剛好返啦,又怕生保,所以咪好似樹熊bb甘囉
無佢辦法,又唔想再鬧佢,整喊佢,但就得佢太多又唔得
真係有d頭痛呀.
4點就係太嫲家返去奶奶家食飯. 食左甘多日清淡,
今晚柏宇食返少少有味餸,仲食左好多花膠添.
都唔知佢聽晚食唔食到buffut呀.
由於明早要早起身.所以9點幾就要囝囝上床瞓啦.
而我就要洗衫,洗奶瓶先有得瞓,睇怕無12點都無得瞓啦.

年三十晚

1月25日

今日公公出來探我地.
今日我同公公傾左好多野
最後我地應承左初二同佢行山,
晚上公公就同我地一齊去黃金海岸食buffut
我好想一家人開開心心食餐飯呀
今日仔仔全日食白粥,情況好左
只痾左一次,個pat pat都好左好多啦.
最起碼清潔時唔會喊啦.
今日終於買晒賀年禮盒,同包埋d利是,
亞囝病左甘耐,真係好忙呀.
明天新既一年開始
希望囝囝健健康康,日日都開開心心啦

再去睇醫生

1月24日

今日係年廿九
因為亞囝仍然有痾,個脾邊又紅又腫
所以都係睇多次醫生好d,因為明天開始一連幾日無醫生睇啦.
我地去到診所都12點,結果等到2點才有得睇,
返到屋企都3點啦.好在醫生話亞囝可能之前食左抗生素,又出玫瑰疹,
先影響佢會痾,好少事姐.甘都俾定藥膏佢搽.
醫生叫佢食得清淡d,用粥水開奶,少菜少肉.甘就好快好啦
不過佢最主要要止左痾先,今日亞囝都痾左5次啦.
希望快d好啦,否則過年邊度都唔駛去呀.

差唔多好返啦

1月23日

今日亞囝無再抓啦.
亦無發現佢再出一舊舊既疹
不過仍要食藥,因為驚佢新年期間返發.
今晚佢好乖,無甘扭計,叫佢食左甜甜藥先食奶,
佢都分幾次食晒d藥,一滴都無漏出來,
好叻仔,希望食埋明日既藥就全部好返晒啦
但又另有一個問題發生
就係佢呢幾日都成日痾d黃色有水既爛屎
次次痾完即換片都會整到2邊脾仔又紅又腫
同佢抺都喊,因為好痛,我都好心痛,
好完一樣又有第二樣.明天要問下醫生是否正常,
否則要再去睇多次醫生.因為佢一日都痾2-3次甘既屎
次次都又紅又腫,怕又起第2種菌呀.

康復中

1月22日

今日都仲有一舊舊疹,不過比昨日好多了.
希望佢快d好返,唔好甘辛苦,
今日去學校交留位費,同校長講開柏宇病左
佢話甘既情況多數係因為奶,蛋敏感,或者係退燒水開得勁得滯,
令到佢身體虛才出疹. 總之要小心佢既飲食,
以清淡為主.
我係lunch時間去學校的.d小朋友全部瞓緊覺覺豬,
我覺得好得意.不過我就無甘既機會睇到佢係學校瞓覺啦.
好期待佢返學,等7月開家長會就知詳情啦

出玫瑰疹

1月21日

今日凌晨時己發現亞囝成身成面都有一舊舊紅腫
早上即刻同佢去睇醫生,醫生話佢出玫瑰疹
可能之前食左抗生素,個人比較虛,又或者之前個醫生開退燒水太重手,
亦有可能係空氣傳染既過濾病毒.
由於上次亞囝唔肯食藥,今次醫生開左d甜d,稀d既藥水,必要時才食.
今晚又要去西貢食飯,下午奶奶話亞囝出多左,又痕又抓,連腳板底都有,佢不停狂捽腳,
又喊,好想唔去食飯回去睇囝,結果奶奶用左片糖煲水俾囝囝沖涼,
暫且舒緩佢無甘痕,大半個鐘又痕過,真係睇見佢都辛苦
今晚就由爸爸暗囝囝瞓先,我返到去都成12點啦.
見個囝成身成面都係,真係好想代佢病呀.

個大脾仔又紅又腫呀

1月20日

今日放工回來,奶奶話我知,亞囝2個大脾仔又紅又腫
我一睇覺得好似係虱咬既.
不過佢圍住成個圓形甘咬,
一個地方有成幾粒,亞囝抓到紅晒
甘我即時同佢沖涼啦.可能條褲唔乾淨,
又或者佢成日係地下爬,又或者佢食左藥,
有D地方特別弱,總之就希望佢快D散啦.
否則要去睇醫生架啦.
大人都忍唔會會去抓,可況係小朋友呢.
好在昨日幫佢剪左指甲,否則俾佢抓損晒啦

蒜蓉雞翼

1月18日

今日本來去婆婆家團年,
但因為亞囝昨日發燒,所以取消唔去啦
今日留係屋企焗左蒜蓉雞翼,
調好味後放入焗爐20分鐘就食得
又唔駛睇火,好方便,又健康d
因為無咩落油麻.最重要係好好味呢
唉,有時我發覺自己都幾有煮食食既天份.
嘻嘻,自己讚自己.
今日亞囝傍晚時份都返燒,去到成101度
藥又餵幾多吐幾多.甘樣係退唔到燒
結果daddy將d退燒水溝落維他奶,
我試飲過都好大陣橙味.點知個囝又飲左大半杯喎
我估佢都有飲左2/3既藥水,即時退左燒啦.
次次食藥都要同佢鬥智鬥力.佢而家一聽到食藥或者見我拎住d藥
佢就話唔好,同埋自己入房關門.你話叻成甘,好難搞.
我知佢好叻仔,開始有自己思想,所以睇下點教佢啦,
好壞一線之差,佢要好好培養先得
我自己都要收歛下d脾氣,唔好成日大聲鬧佢,
儘量同佢講道理,因為佢會有樣學樣架.
我唔想佢甘大脾氣呀.所以要練好自己d脾氣同EQ呀.
說易行難.加油呀,我一定得既.

第一次整小蛋榚及囝囝無故發高燒

1月16日

今日奶奶家團年.
由於daddy昨晚夜返,我要先暗亞囝瞓
所以我成12點半先起身整蛋榚仔.
諗住柏宇及柏言有得食,
第一次整好緊張,好在daddy同我一齊整
搞左成個鐘,終於整好左個麵糊.
等一陣先焗,結果焗左10分鐘未熟,甘就再焗多5分鐘,
諗住熄火後唔拎出來住,點知原來熄左火,佢d熱力都好勁
就係甘d蛋榚燶左少少.我當然要刮走d燶既表面,
整好晒都2點半啦,我仲買左雞翼,調味後,洗埋d碗,剛好4點有得瞓啦
不過一d都唔攰,因為個滿足感好大,焗出來既蛋榚仔面脆內軟,
我覺得好好味呀.今次只整左20個小蛋榚,柏言食個4個呢.
亞囝就因為下午瞓醒後突然好熱,探熱成101.5度,所以即時同佢去睇醫生
原來喉嚨發炎,去到診所103度.擔心c我啦.
又要食抗生素.佢又唔肯食藥.迫佢食完後,佢又喊得太勁,嘔返晒出來.
唉,真無佢辦法.希望囝囝早d好返.健健康康啦.

薑汁撞奶

1月15日

今晚買左材料,係奶奶家整薑汁撞奶,
跟足食譜去做,結果好成功,
整左2碗,我同亞囝一碗,爺爺及嫲嫲一碗,daddy去食公司團年飯,
所以無得食.第一次做就成功,真係好開心呀.
又易整又快,下次試下再整第2樣先

幼兒園取錄啦

1月13日

今晚放工收到學校既信,取錄左亞囝啦
今年9月可以入學啦.
等我開第一張票俾亞囝交學費先.

收到個新焗爐啦

1月11日

今日係屋企等收貨,好期待
原來打算收貨後去買d野整,試下個新爐
最後都無整,因為想去旺角行下買野
結果等亞囝瞓醒食飯後才出,
出到去到6點幾啦.
行左一陣,只買左件羊毛底衫俾亞囝,
daddy就買左件衫同d襪,我就無收獲.
由於daddy約左同事食飯,我地回家自己食,
出門前已整好左冬菇雞飯,可惜有少少碎骨,否則就正啦
不過亞囝食晒一碗都唔夠,要我再俾多d,
可能凍掛,個囝咪食多左囉.並非我整得好食.
亞囝淨飲暖水都一晚飲10幾安啦.
可想而知天氣有幾凍呢.

去學校面試

1月10日

今日約左12點當去救世軍面試
我地見到同亞囝同日出世既小夢兒媽媽既囝囝,
佢好似方力申架
亞囝去到都係玩玩具
到時去見老師時有少許發脾氣
後來校長負責同佢玩,我就專心回答老師既問題.
我見d老師都好有愛心同耐性,
柏宇都有少少扭計要攞某d玩具玩,不過校長say no,
佢就好乖唔再扭啦.之後佢同校長坐係另一張枱度玩,事後校長讚佢乖
話問佢野佢識答好.我地in到1點到就可以走啦.
要等1星期才知是否取錄.
今晚晚餐我地邀請到爺爺嫲嫲來我地家打邊爐,
好難得請得到佢地架.
大家都食得好飽,好開心.

自己除褲褲

1月8日

今晚亞囝無端端自己除左條面褲,
不停搞條片片,唔知係條片唔舒服,
定佢想玩咕咕.因為今日沖涼時佢都有玩咕咕.
呢個stage只能慢慢教,因為佢學野好快架.
小d心機都唔掂.

23個月大啦

1月7日

今日亞囝23個月大啦
下月就1歲啦,時間過得好快
我已開始plan定下月生日會要食咩啦.
想係屋企搞,但要分2次,因為地方唔夠.
今次仲會學整蛋榚及曲奇餅,希望成功啦
好想送個親手做既蛋榚俾囝囝做生日禮物呀.
亞囝越大越古靈精怪.成日嗲人.又耍成日抱,真係可以去考演員,
一時俾佢激c,一時俾佢氹c.真係無佢甘好氣呀.

尿片座談會

1月6日

之前去了研究公司拎左6日尿片試用
今日回去做訪問,完成後有450元車馬費
今次係第一次做座談會,開頭都驚被人呃
好在無事姐.
對我黎講,可以試用又可以有錢賺,
又唔駛花太多時間,都幾好,咪當幫亞囝儲多d錢囉.

冷戰

1月4日

今日6點幾亞囝喊醒要食奶,
個c6出左廳瞓.當然又無理個囝啦.
囝囝食完奶後瞓到成11點先起身.
我當時己洗緊奶樽,因為用晒啦.
我唔做邊個做呀.
之後有人約c6去街
佢只話帶埋亞囝去,一直都無同我講去邊
我亦唔問,專心做我既家務.
直到成1點鐘先叫我去換衫,話大佬約我地食lunch,之後去公園玩
講真,係大家未傾過既情況下,我都唔會好面口啦
我真係想唔去架,佢有本事咪自己帶個囝去囉
不過我唔想剝削個囝玩既機會,先一齊去咋
我同自己講,去得就唔可以黑面,否則會玩得唔開心
點知中途大佬鬧大嫂唔小心睇住個囝,又要做又要俾人鬧
我唔得甘樣囉.但大嫂話佢慣架啦.佢好快就會無事
好唔明,甘樣可以忍到老咩.我唔得囉
之後都一直無野.同囝囝去公園玩得好開心.
不過佢就跌左撞左幾次,兩邊額頭都腫左瘀左.
晚餐係屋企打邊爐,因為2個小朋友全日無瞓覺,怕扭計,係屋企食會好d
飯後同c6平心靜氣傾
我將我既不滿講出來,如果大家仍想一齊,想佢日後有咩野事即時講出來
唔好成日發脾氣,仲就唔好成日自己走左去,掉低我地2個.
我仲將我既感受講出來,我覺得自己似個工人,次次出街都係佢食先,我食後.
仍聽完覺得好好笑,覺得我小事化大,小器,佢都唔想返來呢頭家.
唔想煩.話我連佢唯一既嗜好都剝削,好管佢飲酒.
甘我話我以前好鐘意打機,生左之後都無得玩.佢話唔係佢唔俾我玩,係我無時間玩姐
甘你成日去應酬,無人湊囝,我邊有時間玩啦.講到無私人空間,我仲無過佢啦
不過我係心甘情願俾晒個囝既.做得亞媽就係甘啦.
我自己都係成日半夜起身做野.因為亞囝真係好痴我.
甘我咪話如果公平起計.不如日後d日子平分,大家輪流湊仔
佢話好.之後又話我好似講數甘樣.
假民主,即使你俾我出街,我都未必去啦
我唔放心你湊個囝.你連片都未識換,個囝2歲啦.我叫佢學識換片先啦
佢叫我唔駛理,佢搞掂,佢最叻咪叫奶奶幫手囉.唔通你亞媽幫你一世咩
講來講去都無共識,最後我話甘日後有關佢既野我都唔理.
費事話俾壓力佢啦.總之我有飯就食,有屎就痾.其他咩都唔理啦
佢話你我講架,甘最好啦,就甘決定.
我諗如果唔係有個囝,我地分開左啦.大家一齊生活甘唔開心
做咩仲勉強姐. 唔知我地可以維持得幾耐呢?

又炒大鑊

1月3日

今日裝完晒d新爐,我地去左黃埔jusco
買左部熱風焗爐,報水壺,電動打蛋器,cookie用具套裝...
用左成1800元,最近洗錢好勁.
之後去食飯,亞邦又想打邊爐,我話唔想,因為喉嚨痛,
之後佢話甘佢唔諗,叫我自己諗,我已經覺得唔開心,
點解除左打邊爐,佢無其他野想食姐,
成日食好燥架,個仔又唔多鐘意食
佢成日都要人就佢,好討厭.
甘我提議去椰林閣,佢話唔好,甘我咪話叫佢幫手諗,
因為我都心情唔好,語氣係唔好架啦
佢即時話我發脾氣,係街同我嘈,之後走左去,無理我地2母子
甘我都照跟佢行,佢越行越快,我忍唔住打俾佢問佢想點,
我地打算自己坐的士返家,原來佢在我10幾步身位,
佢即時過來同我大吵大鬧,又推我,又搶個囝,又攔住唔俾我走
亞囝嚇到喊,我覺得一個男人做到甘樣好無品,我回佢一句問佢想點,
我話我個囝要食飯,佢聽完大鬧我:咩我甘仆街,之後同我講數要抱個囝,
我話個囝係我生既,你憑咩抱走佢.嘈左一輪之後佢話要抱個囝先肯返屋企.
結果我要佢應承唔傷害個囝我才被佢抱.
佢抱左囝後一支箭走左去,我問佢才講去坐車回家,
係巴士上我忍唔住喊,因為真係好唔開心,個囝都唔跟佢
佢就用糖去忍佢,講真,可以捱得幾耐呀.
之後全程佢抱個囝,去買埋飯俾佢食
平時又唔見佢甘做,抱2抱就俾我
有事先攬實個囝,好無謂.
晚餐我都無食,只是負責餵個囝.
佢就一貫作風飲酒.我都唔想話啦.
有病仲飲,唔想理佢啦.
講真,如果唔係為個囝,我真係走左啦.
無咩必要甘唔開心一齊生活,
如果覺得我地阻住佢,我可以同佢離婚,我帶個囝走,
還佢自由.反正佢一個月都俾唔到幾多我地.
佢d開支甘大.唔知點養起頭家呢.
咪又係cut晒奶奶黎俾我,變左我做左衰人甘樣.
唔講唔知,原來佢話佢忍左我好耐,
我成日發佢脾氣,佢咪又係甘吞左佢.真係委屈佢啦.

去買熱水爐

1月2日

今日師傅來check左爐,無得整,要換個新的.因為個爐成25年,無零件啦
甘我同邦放工即去煤氣公司睇,本來唔想去,昨晚先嘈完,根本唔想理佢,
後來去買爐先無野咋,我仲一次過換埋個煮食爐,中間有得煮飯架
我想買好耐架啦.熱水爐4050元,煮食爐2750元,一次過換左安心d
之後去左大快活食飯,亞囝無咩點食,可能係奶奶家食飽左
我自己食晒一個飯都唔飽,仲要煮多個粉絲.下次都係去返大家樂好d

元旦日

1月1日

今日有少少唔開心,因為同亞邦有d 言語不合
晚飯後發現家中既熱水爐壞左,無得沖涼
佢都唔諗下我同個囝未沖.就發脾氣出左去同亞wing賀生日
甘樣我覺得佢好無品,一個男人可以甘唔理人感受,成日發脾氣
真係讀幾多書都無用.因為eq太低
我無理佢,應左佢一句早d出去仲好,唔好係度發脾氣,影響個囝
之後打俾奶奶話上佢度沖涼.我都無佢甘好氣
對一個人無希望就唔會有失望.甘樣自己亦唔會唔開心.
我有子萬事足.其他野有無都無所謂啦
只要囝囝好,就得啦.

徐夕

12月31日

今日係徐夕
中午食過飯後,老細話無野做就可以收工啦
可惜我大把野未做.所以要返去ot
4點終於走得啦
今晚如往年一樣.約左亞邦d朋友食晚
我地未到約定時間就到左,今晚係麗閣打邊爐.
亞囝今晚好多野講,叫佢叫姐姐,哥哥,嫲嫲,爺爺,全部都叫.
氹得佢地好開心,佢又食得多,由頭食到尾,
係最後差不多走時有少少扭計,因為眼瞓.
原來當時已11點半,所以我地打的回家.
係屋企睇埋倒數就瞓啦.
2008年完結左,2009年來臨,希望新的一年開開心心,事事順利.
所有人都身體健康.經濟快d好啦.

去探柏言

12月28日

今日約左去大佬家,亞囝今日同柏言第一次玩得甘投入,2個未試過有甘多交流
亞囝仲追住柏言要扯高佢d衫褲,柏言第一次驚左柏宇,場面好好笑
到晚飯時間,佢地2兄弟一齊爭食一碗粥,2個鬥快食,個碗好快就吉左啦.
由於亞囝全日無瞓覺,所以我地9點到就走啦.
今日多謝大伯大伯娘既招待.亞囝今日都不停叫伯伯同哥哥.好叻叻呀