買單車

6月29日

早前生日去JUSCO換左全日通
今日專登去買單車用,爸爸選左上面有UFO,
可以按制發聲既單車,最重要係後面有支桿可推
大D佢自己又可以踏,$312.5唔算貴
之後又去買魚油及羊奶片,個姨姨仲請囝囝食左3粒羊奶片添
原來佢可以成粒放入口都唔怕,真係唔好睇少佢地
亞囝仲食得好好味呀

買積木

6月28日

今日去左尖沙咀反斗城買左筒大積木給囝囝

佢今日係反斗城扭計,要坐係地下玩,無佢乎

真係頂好好教先得

爸爸話下次唔會再帶佢去,因為實在out of control

我知佢好鐘意食芝士包,專登買左條再加支鮮榨橙汁,

都有成10安架,佢一個人飲晒,勁和味

去左元朗探耀叔叔

6月22日

今日去左元朗探耀叔叔及mandy嬸嬸
今日好熱呀.亞囝去左佢地屋苑既兒童會所玩
有d大型車車,亞囝試左幾次之後就識自己坐入去
不過佢唔識向前行.一直向後退,好好笑.
又有大間玩具屋,佢好鐘意開門及關門.
其他d小朋友好鐘意爭玩具玩,亞囝玩咩,佢地就爭咩.
後來因為有小朋友咳及流鼻水,我地就離開啦.
不過仔仔自己行得好開心,唔駛人拖,都係一個好現象呀.
大個仔麻.

自製T-shirt

6月21日

今日亞邦同亞輝出去買材料,打算自製燙畫T-shirt,
如果成功便會上網sell,當賺freelance.
第一次來說都叫ok,不過要洗幾次,再看看效果如何.

又要返工啦

6月19日

放完5日大假,今日要返工啦
唔知係咪亞仔唔捨得,昨晚唔肯瞓,即使好多個鐘無瞓都唔肯瞓
成日想你起身同佢玩,媽咪都想陪住囝囝唔返工,不過唔得呢
唔返工就無得買野啦.我自己可以慳,但唔想買野俾囝囝都要諗過計過先買,
今日都返去遞辭職信.因為做得好唔開心.
寧食開眉粥,唔食愁眉飯.
但老公話除非我唔再打工,在家湊仔,否則度度做野都一樣,
做生不如做熟......唉......好頭痛呀

嫲嫲去旅行

6月16日

嫲嫲同爺爺由6月14日開始去旅行,6月18日才回來
我就要由6月16至6月18日請假照顧囝囝,
今日係第一日,亞仔今日共瞓左成5個鐘晏覺,
今晚我地同梁榮昌叔叔食飯,可能亞囝夠瞓,佢今晚都唔算扭計,
仲肯俾昌叔叔及sara嬸嬸抱,淨係中途曳曳打媽咪,
打完又要錫返我,吹帳,不過要教佢唔可以打人.
做一個乖既小朋友.

學刷牙

6月14日

今日第一次教囝囝刷牙,平時我刷時都有俾佢睇,
佢就會傻笑,今早第一次刷,唔期望佢一學就識,
只要佢唔抗拒就得啦.
佢都識將牙刷放入口,但只係咬,唔識刷,我捉住佢隻手教佢,
佢又唔制,唔緊要啦,慢慢來,假以時日一定學識既.

完全放手行啦

6月11日

今日放工夜到奶奶家,同亞囝沖完涼後,亞囝由床尾行到床頭,
第一次放手行甘遠,之後就成晚係張床度行,可能佢覺得好開心掛
因為又識多一樣野.不過我地就要更小心睇住佢,
佢周圍撞好危險架.見佢成長真係好開心呀.

黑雨

6月7日

今早7點未夠已掛黑雨,但爸爸都要返工,
我就湊亞仔返瞓之後開住電視機,睇下幾時取消,隨時準備要返工,
一直等到11點取消啦.唉!都唔知要唔要返,依家返到去都準備收工啦
唔理甘多啦.唔返,俾人咋型先算啦.
又多左半日陪亞囝,不過佢今日好扭計,成日喊,又唔似唔舒服,
可能天氣唔好,易忟d掛.今晚為左睇西片"獅子.女巫.魔衣櫥"
搞到好夜先俾佢瞓.佢又扭計計.不過套片真係好好睇呀.

生日快樂

6月5日

今日係我生日,早幾日媽咪及家姐已俾左利是我

今日心情幾好,原本老公話今晚同我外出食飯,不過我拒絕左

因為甘樣奶奶會知係我生日,我唔想佢又包利是俾我.

點知今早上到去,佢已經俾封利是我啦

我心諗佢無可能估到今日係正日,不過點都好啦,一返心意.

我今日都預左公司無人會記得我生日,不過我無唔開心,

因為生左亞囝之後,萬事都以佢為先,我唔會介意無人同我慶祝

放工返到奶奶家,原來老公買左個生日蛋糕俾我,我地食完飯再食蛋糕,好飽

佢仲送左隻4G既迷你手指俾我,銀色好靚架

事源係因為之前我話想買FLOPPY去back up文件,佢話依家仲邊有人用架,

於是靜靜地買左隻手指俾我,我無諗過佢會送生日禮物俾我,

佢上年都係送左碗豆花俾我咋.Anyway, 多謝晒呀甘多位.

識自己行啦

6月2日

今日放工奶奶同我講
佢話今日下午亞囝自己放手行左幾步.
唔知係咪昨日見到哥哥自己行,所以佢學到野呢
晚上回到家,亞囝自己係床放手行幾步,
好開心呀....亞囝終於識啦.
唔只佢開心,我都開心呀
當亞仔由我懷抱放手自己行,真係感觸良多
覺得亞囝大個仔啦.自己獨立啦.
但亦都會諗佢仲會唔會嗲我呢.
會否識行後唔再要我抱呢.
唉......lee個亞媽真係多野諗.
點都好啦.最近要佢身體健康就得啦.
佢開心等於我開心啦.

探柏言哥哥

6月1日

今日無咩做,去左探柏言哥哥,順便食siti姐姐煮既好味餸菜,
唔食無機會啦,因為姐姐就走啦.新來之姐姐唔知煮野好唔好食呢
今日柏宇囝囝都好乖,去到一齊玩d數字同abc字,又聽歌,又睇flash card.
囝囝好開心,成日爬來爬去,伯娘就辛苦d,因為柏言周圍走,伯娘怕佢撞到柏宇,
所以跟到實,始終差唔多年齡既小朋友一齊玩,學野會快d.
到晚飯後,囝囝又食提子,又食西瓜,下午已食左香蕉,好似勁食大賽甘,
好飽,到9:30就走啦,因為實在太攰啦.囝囝係車上已瞓到豬仔甘啦
返到家,如果唔係我幫亞囝抺身整醒左佢.佢可能會一覺到天光呀.
結果佢再飲多5安半奶再瞓......好大食呀....亞囝

又食bufffut啦

5月31日

我地約左去機場富豪酒店食buffut
訂位時講明主題係和牛+大蝦
點知去到先知改左係魚翅佛跳牆.
因為係佢地既錯,所以成晚free drink俾我地
不過坦白講,我行完成個場,真係無野啱我食,
不過唔緊要啦,最緊要一家人開開心心食餐姐

p/s: 今日抱昊云時佢向我對新鞋嘔奶,記住數先,18年後要佢買對新既.哈哈