第4堂PG

10月26日

今日一早煲好湯及煮定飯仔,因為亞囝要返PG
我地係屋企食左腸仔,火腿,蛋後,就準備好要返學
今日又係無瞓覺,不過好在柏宇唔係太扭計,
不過都係唔坐定,周圍走,其他小朋友好乖坐定聽老帥講故事
後來到聽歌跳舞時,柏宇才好開心甘玩,佢仲好得好大聲,
吸引所有人既注意力.唉.去到邊都吸引人,真無佢乎
連老師都好似特別留意佢,可能係得佢一個曳曳啦.
不過我自己覺得,俾佢返PG,唔係要學D咩,最緊要佢唔抗拒,玩得開心
唔一定要英文叻,因為童年好緊要,唔想佢甘快有壓力.
留個美好既回憶.
另外今日柏言一家出來探我地,我地去左黃埔公園玩,
亞囝好耐無去打鞦韆啦,玩到唔肯走,反而柏言就麻麻地鐘意
晚餐是柏言扭計要落地,大佬都無佢乎,結果大家好葱忙食完飯就走啦.
亞囝今日仲試飲左啤酒添呀,不過佢無特別話要飲,但又唔抗拒.

註:今日才試食馬豆榚,味道OK,只是榚身較軟,下次再改良

試做小食

10月25日

今日不用上班,我買定了材料,打算今日整干燒伊面及椰汁馬豆榚
結果伊面味道OK,只是淋了一點,不過囝囝好俾面,食左一碗呢.
今日JOYCE出來探我們,本打算俾佢試下椰汁榚,但因為我太晚才做,所以來不及雪,
佢地無口福啦(正確來說是佢地行運,因為不用做白老鼠)
晚餐去左打邊爐,好早就食完回定家了,期待JOYCE姐姐下次再來探柏宇啦

亞囝伸手攞菜食

10月20日

今早收到媽通知,裔中被炒了,補左少少錢
唉,現在生意差,將有好多公司會裁員.
不過我唔擔心,我遲早都唔做.
今晚食飯時,亞囝主動伸手去攞菜食
佢以前未試過的,甘後來佢堅持要,
就俾左條菜根佢,佢可能牙痕,不停咬
結果我將d皮撕走再俾佢,佢食左成7-8條
好叻仔.不過飯就唔多食,越來越瘦,
希望佢快d出晒d牙仔,食返多d野啦

返屯門探公公

10月19日

早幾日得知公公唔舒服,今日放假即一家入去探佢,
我地己有好多個月未見過佢
入到去已好晏,同昊昊,浩云去完公園玩後就同公公吃晚飯
日後真的要抽多點時間去探下公公及婆婆才行

第3堂pg

10月18日

今早退左燒,打算俾佢返學
因為佢好鐘意唱唱跳跳,
唔知是否未好晒,個人好扭計,打算唔返啦
到佢情況好d,跟住問佢返學好唔好,佢又答好
甘咪好趕甘同佢即出門口
返到pg,都好扭計,唔肯坐定,要四圍走,
最終要食晒d糖才落堂,連老師都叫我要睇住佢,唔好俾佢周圍走
甘我都知,因為會影響其他同學仔.
希望亞囝快d適應返學環境啦

發燒呀

10月17日

今日中午奶奶打俾我話亞囝好熱,但耳探係屋企
於是奶奶賣亞囝肛探,成101.2度
甘我都無辦法,唯有快手d做完公司d野才回去同佢睇醫生
我地以為亞囝唔知是否俾野咬腫左個額頭,定還是出牙,所以才發燒
點知醫生話佢可能感親,食左一次退燒水就好了
不過這2日亞囝好扭計,可能就是唔舒服既先兆掛
點都好,最緊要亞囝快d好返,唔想佢辛苦呀

婆婆生日

10月13日

婆婆生日快樂,祝妳身體健康,日日都開開心心,心想事成,
快d中mark six, 等媽媽可以退休,唔駛做呀.

第2堂pg

10月12日

今日返第2堂pg,不過今日可能早起身又無瞓覺
佢成堂都好扭計,嘈住其他同學,我細聲同佢講野佢唔聽,
要我好似傻婆甘大鬧佢才靜一陣,唉.我唔想甘樣,因為佢會有樣學樣
之後成日都係咪,我同亞邦協議,我地要control eq,唔好打佢鬧佢,要慢慢教佢
細聲d,佢仲細,有得教的.晚餐去蘇記食,唔知亞囝係咪唔鐘意個度
又係嘈得好緊要,要我同亞邦輪流食,另一個就抱佢出去行
之後隔離枱有隻狗仔,亞仔唔怕,要走過去搞佢,又摸又錫,我就好驚啦,
點知隻狗會否咬佢架.好彩佢都係玩左一陣,之後我地快手食完走啦.
總括今晚餐飯食得好辛苦啦.

柏言堂哥2歲生日

10月11日

今日是柏言2歲生日
我地約下午5點才入到去
爺爺及嫲嫲先入去,我地去到即食野
adam姐姐整左3大盤小食,有波羅腸仔,啫喱糖,沙律吞拿魚餅干
之後仲有蛋榚,晚餐食炒飯,意粉,羅絲粉(配白汁及茄汁),好好味
玩到8點幾就走啦,因為亞囝好攰啦.
不過今日柏宇有少少忟,佢打左柏言一巴,又met佢,真係要好好教佢至得

20個月大啦 / 同婆婆慶祝生日

10月7日

今日係柏宇囝囝20個月大啦

由於要就時間,所以我地選左今日同婆婆慶祝生日

今次仲預左太嫲及姑姐,連同家姐一家及細佬一家,共10大3細

去左朗豪酒店食lunch buffut, 每位要228,都幾貴

不過唔緊要,最緊要開心就得.太嫲又未食過buffut,好想帶佢去試下,

人一世物一世麻. 太嫲今年都80歲啦.佢仲行得食得,好叻架啦

不過最叻都係姑姐,因為佢一早打左去酒店,話有人生日問有無special offer

酒店最終送左個8吋大既cookie俾婆婆,好靚架.如果要買都要成百元

雖然野食唔多選擇,但婆婆都好開心,一家人慶祝麻.

我出年就唔做野,都唔知出年仲可唔可以請婆婆食飯.

之後我地去左行尖沙咀,差不多成5點大家就各自回家了

太嫲出左來成7個鐘,怕佢太攰.不過end up佢都ok.叻叻呀.

我地仲約左下次去食齋,好期待呀.

先祝婆婆身體健康,心想事成.日日都開開心心.

國慶日(留港振興經濟)

10月1日

今日國慶,可以放假陪囝囝
今日去左jusco shopping, 主力都是買定d衫褲俾亞囝出年夏天
因為換季,好多衫都係19.9元,好平
而且有品質保証,我今日買左19件衫及褲俾柏宇,
大部份係出年著,有部份係依家都可以著的
因為今個sat會同亞囝返noddy playgroup
佢無咩長褲出街,唔好著得甘寒酸麻.
埋單都唔駛500元,唉.最多我自己慳d囉
不過如果日後唔返工,就唔可以再甘洗錢啦
所以我都要學下唔好甘大洗先得.

同昊昊慶祝生日

9月27日

今日我地提早左一日同昊昊慶祝3歲生日
今早同囝囝及奶奶去左noddy公司買野,因為有張500元書卷到期啦
甘不如睇下有無野可以買俾昊昊及柏言生日啦
甘我地又可以慳返d
嘩,原來唔係甘難去架咋
我去到都好多野買,仲好多都係100元
我買左2套winnie the pooh (mon到sun)既書連cd都是各100元
另外仲有2套格林童話vcd各8隻,又係各100元
仲買左1set6隻bob builder vcd都是120元
埋單只需俾20元即可,好抵呀
之後同囝囝去左mcdonald食薯條,佢好鐘意食呀
等爸爸收工就入屯門同昊昊玩,晚餐去左元朗食燒海鮮
不過可能我唔受得,食完已唔舒服,仲要坐的士回媽家,
痾左3次才可坐巴士回家.嘥晒d野
亞囝就因為太攰,係巴士瞓左啦.
一覺瞓到大天光.佢今日都好開心呀.