聖誕節

12月25日

今日係同柏宇囝囝過既第2個聖誕節
我約左亞嫲,姑姐,婆婆去黃大仙飲茶.
姑姐仲好有心思送左禮物俾我,婆婆,及3個小朋友.
我都將昨日抽到既H2O沖涼套裝送左俾姑姐
飲完茶仲行左一陣街.亞嫲都好精神,好想好想陪佢多D
始終佢都80歲啦.見得一次得一次.佢又好鐘意柏宇.
我都行到5點就走啦,因為約左家姐一家係尖沙咀等.
打算睇火車,不過因為太多人,又各抱住小朋友,
所以唔睇啦,提早去食晚飯,
我抽到2獎,所以今餐由我請客.埋單700元有找.
飯後就同DADDY去左買MINI NOTEBOOK, 4000元.
不過佢話部SONY唔多得,甘佢要買都無法.
返到屋企都11點啦,要同囝囝沖涼覺覺豬啦.
今日可以陪到亞嫲過聖誕,我覺得好開心呀.

公司聖誕party

12月24日

今日下午公司係對面酒樓搞CHRISTMAS PARTY
我做到成1點先同碧姐及老細一齊去酒樓
公司D人無留位俾我,叫我坐老細個圍
我心諗仲好啦,同碧姐一齊坐,食得仲開心
突然老細問我,佢地唔同你玩呢,我話馬生,咩你甘心水清既
個秘書見到我地對話,於是即時同我講話佢地個枱有位,
叫我埋去坐.我唔知有無估錯, 佢地唔想我同老細亂講野,
亦唔想俾老細知佢地唔妥我,所以即時補鑊
我無所謂,佢地弧立我一個人,想我食得唔開心,
我偏要食得好開心,仲要令佢地食得唔開心添
到抽獎時間,我抽到2獎(NO.係5號),碧姐抽到頭獎(NO.係10號), D女同事全部黑面,
我仲即時拍大手掌,激C佢地,之後仲同碧姐一齊去飲左杯奶茶,
傾左成2個鐘頭計先返家.今日真係好開心呀.

奶奶家做冬&第10堂pg

12月21日

今日係冬至
奶奶家做正日,亞囝今日返第10堂pg
佢都開心,成堂跑來跑去,除左唱跳時間係一齊玩外,
其餘時間周圍走,無時停.激c.
因為囝囝要瞓晏覺,所以我地成6點才到奶奶家
我仲去紅磡買左隻海南雞.點知奶奶又整左雞
成晚最搶手就係海南雞,因為係無骨既.同埋個醬酸酸辣辣,
佢地覺得好開胃,我就麻麻啦.
今晚都有好多餸,魚,雞,蝦,冬菇海參,魚腸焗蛋,菜心,豆苗...
食得好飽呀.真係辛苦奶奶忙足一日.

自家做冬

12月20日

今日大陸同事lily來港,我地陪佢買完野,
去左jusco買左張兒童枱俾囝囝,佢好鐘意.
之後去左漢寶做冬,d野幾大碟,又好食,
三大一細叫左四個餸,埋單都是380元,都ok
仲有得打包回來添

返屯門

12月19日

今日因為99要覆診,我返左屯門,
因為亞邦又唔返來食晚飯,
甘我見老豆,裔邦,亞妹都生日,咪一次過同佢地慶祝加做冬囉
柏宇今日都好乖,無咩扭計.我都湊得好輕鬆,
晚飯後仲食埋糖水,因為土瓜灣既又貴又細碗.
今晚食得又飽又開心,真係好耐無試過甘自由自左啦
如囝日後唔做野,就會無錢,繼續返工,就會無左同仔仔相處既時間,
好難決擇呀.

返醫院覆診

12月18日

今日同亞囝返去QE覆診
跟進下個心同身高及體重
佢有79.7CM高,10.5KG重,醫生話進展得幾好
不過話亞囝脾氣就好大,叫我地好好教.
我地走時都差不多點半啦.返到家2點
今日同明天我都請左全日假.想好好休息一下.
我地食完飯,同囝囝瞓覺,瞓醒又叫PIZZA食,
亞囝一貫作風,嘩....好得意.
今日真係過得好開心呀,好耐無甘FREE啦.

在家休息

12月15日

今日無周圍去,打算收拾下間屋
爸爸就幫我整左個架係厨房
今晚我煮左西蘭花帶子,蒸排骨,另外再買左盒煙豬手
亞囝好捧場,食左成碗飯.爸爸都幫手將d飯餸全部食晒.
不過今晚我都覺得自己煮得幾好食.
飯後仲整左椰汁榚,留返明晚先食.
不過餐餸都唔平,仲貴過去買飯盒,
但勝在無味精,健康d,又食得舒服d
甘就辛苦d都值啦.

BBQ

12月13日

今日約左一家人去綠田園bbq,
順便慶祝商邦生日,今日天氣幾好.唔太凍.
開頭我仲心亞囝無咩啱食,點知佢幾乎全部都食
仲飲左成22oz粟米水,叻叻豬.
食得最多都係香腸,白魚蛋,連蜜糖麵包都自己食左一塊,
我想食都無,十分搶手.婆婆都自備左好多野食.所以唔駛額外再買.
婆婆又買左支吹波波鎗俾柏宇,不過囝囝唔係好識玩,
佢鐘意玩吹出來既波波多d,爸爸就幫柏宇影左好多靚相.
差不多九點,爺爺打電話來話係附近,甘我地就坐順風車返屋企
先送家姐,再送亞媽,回家途中爺爺要加單接遊客,於是我地去左迪士尼門口一遊,
回到家己10點35分啦,亞囝就係車程途中瞓著左啦
佢今日都玩得好攰啦.期待聖誕再一齊出來玩啦

大瀉日

12月8日

今日lunch食車仔麵,食完己即時肚痛
忍到成4點終於痾左2次無事,
晚飯飲左西洋菜煲羅漢果湯
返到屋企差d上吐下瀉,苦不堪言,
個胃痛到想嘔,又見暈,好驚個囝無人理
個刻真係想打俾亞邦叫佢即返來
結果我閉氣,先至忍住無嘔,但痾出來既係全黑色,好恐怖
仲要痾完第1次,起身唔夠2秒,要再痾
亞囝就入左toilet同我一齊.其間我合埋眼休息一陣
亞囝見到即時拍醒我,可能佢驚媽媽有事掛.佢真係好懂事.
其實佢已經好眼瞓,如果我唔係肚痾
一早同佢瞓左啦.結果佢要等到10點幾才有得瞓.
真係難為佢.

第9堂pg

12月7日

今日係亞囝22個月大,今日上第9堂pg, 換左個新miss
之前個亞sir無做啦,好似話其他小朋友唔like亞sir,
不過呢個ms我覺得麻麻
因為佢整堂講野為主,好少唱遊,好悶,
我已同出面d姐姐反映左,想以後上另一個ms堂
因為亞囝好鐘意唱唱跳跳,不過佢地話唔得,
因為如果個個家長都係甘樣,甘另一個ms咪無人上囉
唉,隨緣啦.
今日婆婆專登拎野出來俾我,佢幫我買左d美食切切樂,
仲買左一大埋thomas俾柏宇做聖誕禮物,亞囝已經好多玩具啦
昨日先去反斗城買左一個波波及2架小車車.埋單都唔駛50元.
個豬仔好鐘意個波波呀.頭先就要拎住套切切樂把刀一齊瞓.
佢d習慣唔知幾時可以改,好鐘意雙手拎住野先得.
真係俾佢激c同氹c呀

又無故大喊啦

12月4日

今早7點,亞囝又大喊
唔知發生咩事,點氹都喊,仲要喊到嘔左d痰出來.
我好驚佢有事.佢大約一個月會有一次甘既情況
通常我都無辦法,只能坐係度睇住佢喊夠收聲才抱佢
今日亞囝就不停扯件衫,甘我就估佢熱,幫佢除,又喊
著返都喊,甘又估佢係咪件衫有野吉到佢
最後除左一邊袖,赤膊,再加埋爸爸大聲問佢想點,
佢定左一定,我即時抱住佢,佢就收晒聲唔喊,挨左係我膊頭嘔左d痰出來
不停抖大氣.不過一陣又大喊過,真係咩都幫唔到佢
結果出左廳,剛做thomas,佢聽住歌就收左聲啦.
但又唔俾我坐底,結果等左一陣,我坐底抱住佢食奶
之後抱佢上床再瞓,由7:50am瞓到7:20am,都瞓返個半鐘
之後因為要趕返工,抱佢上bb車瞓,佢可以好攰,都曚曚曨曨甘樣瞓,
最後出左街,架車郁佢再醒晒.
唉,總之希望佢唔好成日甘啦
因為佢未識表達佢既意思,只識喊,我地真係好無助架
最後結論係估佢一係肚痛,一係牙肉痛.係一個謎.

飲早茶

12月3日

好耐無試過甘早去飲茶啦
今日因為爺爺休息,所以我地約左7點去飲茶
不過我都要成7:50am才出門口
因為要等亞囝食完奶才行
爸爸都同我地一齊去,8:30am我地就飲完啦
好快.四大一小叫左11個點心,埋單$104
都叫做幾平.
亞囝食完奶,半個鐘又食飽,又食飯,又食蘿白榚,真係好犀利呀

肺鏈第2針

11月30日

今日約左早上10點去打肺鏈第2針,不過仔仔好晏先起身,
我又唔想整醒佢,so,又遲到,支針又加到830元,好貴呀.
亞囝就例必大喊架啦.不過我鐘意個醫生好手勢,
所以佢放假,我都等佢回來才打針.
之後我地去左食魚柳包,再去反斗城,不過無收獲,後來約左嫲嫲去行jusco,
因為會員大減價,不過我地都係去左超市買野
仔仔一到去就要去玩電動車車.之後同左亞囝返屋企瞓啦
由於今日無煮野俾囝囝食,我又去左大家樂買雞脾+火腿通+好立克
亞囝都可以一個人食2/3個餐,勁.可能今日無咩食野啦
晚餐就去茶餐廳買左中式牛柳飯,好好味,囝囝食左好多呀

救世軍幼稚園開放日

11月29日

今日本來要同仔仔返pg,不過幼稚園open day
我book左2點去參觀,又想帶囝囝去睇下個環境,
於是放工即刻回去接囝囝,同daddy,嫲嫲一齊去,
我就去聽講座,囝囝就去其他課室玩
佢都幾開心,我最深刻係有一個3歲限妹妹示範摺手巾仔,我覺得好叻
佢地會訓練小朋友做家務,個個專注力都好強.
又同miss傾過,佢地係以報名先後次序去收生的
所以柏宇入到既機會好大,不過我怕無錢讀姐
一個月都要成3000元,未必afford到
唔好話我唔做野,就算返工,2個人都一個月儲唔到3000元啦
唯有見步行步啦