又係全日唔瞓,亞媽頭暈中

10月14日

今早晴晴8點幾醒左,到夜晚成12點先瞓,全日不停喊,抱住就瞓,又成日想食,今日食左好多餐架啦.埋身都餵左5次啦.又唔係食唔飽.因為我等佢食完再補2安人奶俾佢都只係食得1安.其實佢就好眼瞓,因為佢瞓唔到咪成日喊囉,好多時抱住都係合埋眼喊,一路抱住一路拍佢,甘就可以瞓到,但一放落床就會醒,仲要係好似俾野嚇親甘不停手腳狂抓.俾d手巾佢拎住都唔得,一定要抱埋身.結果全日我除左食野外,就係抱住佢餵奶同抱住暗佢瞓.咩都唔駛做.但我又無得瞓,個頭己經好痛好暈架啦.daddy仲要開夜,好在嫲嫲幫我湊住哥哥.否則我仲c快d,另外今日打去健康院問左,原來晴晴痾d綠色屎係因為內有鐵質.係正常既,甘我都放心啦.

p/s:今晚漏夜整左個米袋俾晴晴,希望有用啦

今日奶量: 640ml

婆婆生日

10月13日

大日子,今日係婆婆生日,今年多左晴晴同婆婆慶祝.由於小朋友太細,今年無全部一齊食飯,我只係約左今日同婆婆飲茶.最緊要食得開心.今日婆婆拎左好多bb衫俾我,原來我娘家既柜桶收埋左好多,好彩婆婆睇下姐,本來打算買過既,依家可以慳返啦.因為bb衫真係好貴呀.而且又大得快,好易唔啱,又係手抱階段,唔需要買甘多同買甘靚.留返佢會行會走先同佢扮靚啦.
今日亞妹痾左d全綠色既屎呀.唔知正唔正常呢.

今日奶量:725ml

第一次無便便

10月12日

昨日全日唔瞓,今日就全日瞓,真係諗唔明呀.今日晴晴第一次全日無便便,不過唔擔心,佢食全人奶.一定唔會熱氣.無便便都唔駛驚.

今日奶量: 590ml

全日唔駛瞓

10月11日

今日亞妹日夜都唔駛瞓,好野.唔知佢想點.唔通佢地係要一日瞓一日唔瞓既.甘咪會好攰囉.
好在今日亞哥要返學,甘日頭都只係對住亞妹一個姐.不過無得瞓真係好攰架.唔知我可以頂得幾耐呢.

今日奶量:705ml

分身不暇

10月10日

今日又係2重奏,哥哥成日叫媽咪,亞妹又成日扭計.都唔知顧得邊個.真係順得哥黎失嫂意.俾呢2個大小魔怪搞到亞媽個頭出煙.就黎暈架啦.

今日奶量: 600ml

柏宇回味小時候

10月9日

昨晚晴晴8點半食完奶,到今早凌晨2點半先食,不過換片時就痾到我一身都係屎,因為佢一條屎柱甘噴出黎,避無可避.今日專登裝返柏宇細個玩過既音樂轉轉係bb床.諗住俾亞妹望下唔同顏色同聽下音樂.點知柏宇仲高興過亞妹,要爭住玩.仲要係bb床瞓添.可能佢想回味一下小時候掛.

今日奶量: 925ml

少少辛苦,但都有得抖

10月8日

昨晚10點幾就嘈定食奶,1點幾食完又唔瞓,抱住又扭,結果成點幾要埋身俾佢啜,佢又真係想食甘,10分鐘就瞓左啦.我攰到奶都唔泵,諗住4點先起身泵俾佢即食,點知又係太攰,連鬧鐘都聽唔到,到6點半佢有d喊我才扎醒.嘩.我一口氣瞓左4個半鐘,晴晴就一口氣瞓左5個半鐘,好勁呀.不過一覺瞓天光既代價就係變左岩石胸,成6個半鐘先泵,腫晒啦.結果叫daddy先餵女女食奶,我趕快用雙泵泵左先.加埋出左245ml,好在無塞.都係要較大聲d個鬧鐘先得.寧可瞓少d,好過去承受塞乳線既痛.

今日奶量:700ml

柏宇3歲8個月(44個月大)

10月7日

今日柏宇起身無扭計,做左哥哥係唔同d.亞妹今日都超級乖.因為婆婆出來湊佢,又係蝦我既.今早5點食完奶,又唔瞓,到7點先瞓,諗住佢會瞓耐d,點知8點幾就醒左,直到婆婆10點黎到都唔瞓,亞婆三兩下抱上手佢就瞓左啦.仲一覺就瞓到4點,剛好亞婆走佢就醒添.你話係咪俾佢激c.之前己講話亞婆一走佢就喊,我地仲以為佢慣性每日3點幾醒,甘今日婆婆專登4點先走,佢真係可能認得亞婆陣味,3點幾佢無喊,等亞婆前腳出門,佢轉頭就喊,真係不能不佩服亞婆湊仔係有一手既.可能昨日瞓得少,今日要補返數瞓個夠既.希望今晚都係甘就好啦.

今日奶量:690ml

早晚都唔瞓

10月6日

今日好攰,晴晴早晚都唔瞓,每每聞到飯香就醒,搞到我食都唔得閒,再加上可能打針後有d唔舒服,佢好忟,仲有出世打個支卡介苗個針口又腫左.仲含膿.全日最長瞓得1.5小時.我都只係瞓左半個鐘咋.到晚上10點幾,未夠鐘佢就想食.d奶又未暖,所以埋身食頂住先.點知佢食左30分鐘就瞓左.唯有差唔多成12點先整醒佢再食,望佢呢覺瞓長d啦.

今日奶量:710ml

返健康院打針

10月5日

今日婆婆一早出來幫我takecare晴晴,我要同柏宇返學校買校服,成個幾月無帶佢返學啦.d老師及家長見到我都話我好fit,好耐無見,不過可惜仲有個大肚"bo"未收,都唔明點解餵人奶都收唔到身.
之後要趕住同晴晴去健康院,今日要睇黃,監察發展同埋打針.姑娘話晴晴重得十分之好,有3.35kg(約7.4磅),剛好係細碼範圍內,甘我都會keep住俾最好既奶佢食,等佢再重得好d.打針時都只係喊左一陣,不過可能針口有d唔舒服,佢由下午3點幾扭到10點幾先瞓,日夜都唔瞓,好攰呀.

今日奶量:585ml

密密食

10月4日

今日全日多數埋身餵奶,由9點幾到6點幾埋身食左7次啦.不過時間亂晒,個女無咩點瞓.最長瞓得1.5小時,成日扭計.俾奶佢又唔食,抱住就瞓.係咪做錯左呢.我夠奶俾佢食架喎.佢仲食到吞唔切.點解食完唔瞓呢?最終夜晚10點幾先瞓,真係頭都痛埋.

今日奶量:450ml

二重奏

10月3日

今日daddy要返工,我一個人湊住2個,亞妹喊,哥哥又跟住喊,我真係頭都大埋.
今日無人到訪,可以俾妹妹埋身食4次.我又唔駛泵甘密,真係好唔得閒呀.
不過生得出,就要自己搞掂架啦.唔好成日指意人地幫,要獨立d.同自己講,我一定得架.

今日奶量:580ml

同婆婆一家食滿月飯

10月2日

今日daddy請假去幫晴晴拎出世紙,今晚我地係樓下酒樓訂左一圍食滿月飯,昨日同嫲嫲,今日同婆婆,仲有美玲姨添.成16個人一圍,好熱鬧.晴晴今日收到好多禮物,真係好多人錫佢呀.
今日仲特意著左條裙仔,不過俾張包被包住,大家睇唔到啦.等晴晴大個d先著俾大家睇啦.

今日奶量: 625ml

同嫲嫲食滿月飯

10月1日

今日柏晴第一次去酒樓食飯,嫲嫲自家人一家食,晴晴由頭瞓到尾,連奶都唔願飲,幾好瞓.今晚都係甘好瞓就good啦.

今日奶量:820ml

今日滿月啦

9月30日

亞妹昨晚食完奶,到今早3點幾我泵奶先醒,甘我都有少少時間瞓下,無甘辛苦,3點幾食完奶瞓到7點先起身,算係甘啦.今日滿月啦.希望佢夜晚唔好再扭計啦.

今日奶量:645ml

2重奏

9月29日

晴晴又係成點先瞓,我都攰架啦.今晚哥哥同妹妹都一齊喊,簡直係2重奏.我飯都未食呀.要先搞好晒哥哥既需要,俾佢上床瞓覺,先可以餵妹妹食奶.亞妹好勁,喊足50min唔停,仲好大聲添.幾好氣.
到10點半終於2個都瞓晒啦.我都唔理d家務,快手泵完奶就瞓,唔知妹妹會唔會今晚又唔瞓架.甘我咪c得囉.

今日奶量:675ml

夠奶

9月28日

由於晴晴唔瞓,又嘈住哥哥瞓,我就1點埋身俾晴晴食到1:45am.都唔理佢啜左幾耐.差唔多成2點先瞓,我太攰啦,set左2:15am起身泵奶,都miss左.結果一覺瞓到天光成7點先起身泵.相隔左成9個鐘,一次過出左200ml,不過唔好成日係甘,因為會塞,早2日好難得俾晴晴啜通晒,唔想甘快又塞返呀.另外晴晴係第一次埋身食奶後,可以一口氣瞓甘多個鐘,甘即係我都夠奶俾佢啦.

今日奶量:670ml

好味既章魚湯

9月27日

今日婆婆煲左好味既章魚湯俾我飲,章魚都係谷奶架.又惹味.不過可能食左蓮藕,個胃就唔多舒服.下次都係唔好食甘多啦.唔消化呀.

今日奶量:620ml

大佬來探望

9月26日


今日到大佬一家來探我地.由於我太攰,亦唔想煮,所以今晚食m記做晚餐,不過太貴啦,食左18x元,係唔飽架.
真係唔多想幫襯佢.

今日奶量:620ml

姑姑來探望

9月25日

姑姑今日來探我地,又買左好多野食俾柏宇,真有心.
佢成日驚我無野食,又怕我太忙,所以來幫頭幫尾.真係唔該晒啦.

今日奶量:690ml

再返健康院磅重

9月24日

今日返去健康院磅重,姑娘話晴晴重得好好,有2.84kg(6.2lbs)叫我俾心機餵奶,好開心呀.呢個人奶b有甘好既成績,我真係要俾心機泵多d俾佢飲先得.

今日奶量:560ml

好燥火

9月23曰

昨晚晴晴3點幾到6點幾,食完奶都唔瞓,最後6點俾佢埋身食,佢就瞓到9點先醒,可能滿足左佢啜既慾望,奶咀都唔要,又抱住瞓,太舒服啦.
另外柏宇唔舒服,鼻膜發炎,最近太過忽略佢,佢今日唔小心踩到妹妹,我好大力打佢pat,佢唔喊,不過呆左.後來我呵返佢,佢就喊啦,話唔開心.唉!好多野要兼顧,真係脾氣差左好多呀.

今日奶量:710ml

第一次一家四口過中秋

9月22日

今日係晴晴出世後同我地一齊過既中秋節.
今日好忙,但都埋身餵左3次奶.見到個女笑住瞓,好滿足,幾攰都值得既.

今日奶量:610ml

有好多家人幫手

9月21日

今日細舅父第一次見晴晴,我現在一有時間就會埋身餵奶,因為俾女女吸啜多d,會造多d奶.同埋我好鐘意見到晴晴埋身食奶後個滿足樣,好可愛.
今晚joyce成7點打來,原來有大批奶粉返,奶奶即幫我去拎,成35罐,好重,真係辛苦晒佢啦.為左晴晴,多謝晒甘多位幫手呀.

今日奶量:575ml

好滿足

9月20日

今日有時間埋身餵奶,見到晴晴食完個樣好滿足,我都好滿足呀.因為佢係笑住瞓架.

今日奶量:640ml

公公探望

9月19日

今日公公來探晴晴,仲買左好多野上來.不過我今日無咩精神,因為昨晚晴晴由晚9扭計到朝5,我甘多個鐘無瞓,個人好攰,仲要daddy今日要返工,我我一個湊住對仔女,真係有d辛苦架.所以等公公走左,我地2個即去瞓覺,晚餐瞓醒先算啦.

今日奶量:625ml

未滿月去嫲嫲家做節

9月18日

今日我既家務助理同學來探我及大小b,佢地好客氣,買左4包片片上來,我都略盡地主之宜,請佢地食薑醋,佢地話好好食,好甜.仲話亞妹好似哥哥添.
另外今晚嫲嫲家做節,亞女未滿足,但奶奶話唔怕,叫我照去食飯,甘佢都甘講咪去囉.

今日奶量:610ml

第一次返健康院

9月17日

今日本來係預產期,點知亞女一早就出左世.今日約左返健康院,出左院成個星期啦,要返去磅重.好在個女都好乖,昨晚2餐飲完奶就無再嘈啦.乖乖甘瞓,甘我都有得瞓.否則真係會暈.健康院話第一次返去要stay3個鐘.唔係呀,甘耐.仲要9點返去.今早超趕,因為要即時泵奶帶去,又要搞左柏宇返學先.再餵埋亞妹先可以出門,今日磅有2.57kg(5.6磅),姑娘話重得好好,不過就話一日食5-6餐太少,要俾8餐佢食,唔好理佢食幾多,佢想食就俾,因為人奶好易消化,好易餓.聽完我既情況後,叫我唔好晒時間埋身餵,因為我唔係一出世就埋身餵,成第5日先有埋身,個女用奶樽食奶,已經有乳頭混淆.你俾佢都未必食.所以建議我泵俾佢食,大家都好,不過最少一日要泵8次.否則好易無奶,又叫我唔好太大壓力,唔夠奶就補奶粉.總之有幾多人奶就俾幾多.儘力而為.俾人奶bb食都係想佢重同健康姐,另外見醫生話佢有黃,不過唔係好嚴重,約左1星期後返去再磅重及check黃.總之大家加油啦.
婆婆最近都唔可以出來探我啦,因為昊昊出水痘,佢要去照顧佢.甘今日就叫左姑姑煲粥我食,姑姑仲整左葱菜俾我配粥食,好好味,原來姑姑煮野食都有一手架.佢仲應承下次炒米粉俾我食添.

今日奶量:670ml

又扭計

9月16日

今日情況一樣,都係1點多就喊,今次我頂到2:45am.連柏宇都嘈醒埋,坐係到喊,於是唯有call daddy來幫手,daddy由2:45am接手至3:45am,佢負責抱個女出廳,我負責暗哥哥瞓,自己順便補眠,因為好唔舒服啦.到3:35am,daddy話不如早少少俾佢食,甘我起身暖奶,等daddy瞓一陣,到4點晴晴食完後唔扭啦,我都唔理佢是否瞓覺,放佢係bb床,自己熄燈瞓覺.7:30am起身叫柏宇返學.都好有成3個多鐘瞓,今日一早起身就胃痛,食左醫院俾既藥都唔得,日頭交俾婆婆湊,我前後補左3個鐘眠.隻豬女好乖,全日無扭過計,一直瞓.我終於頂唔順去左睇醫生,又係腸胃炎.如果唔係要餵人奶,真係唔想去睇醫生.另外嫲嫲幫我去左買多張床墊,甘柏宇同daddy今晚可以瞓廳,唔駛俾亞妹嘈住無得瞓啦.又可以開少一部冷氣.希望亞妹今晚乖乖啦.

今日奶量:620ml

無覺好瞓

9月15日

今日凌晨近2點開始,晴晴就不停喊,抱住都喊,甘我俾左奶佢食,佢食晒3安即痾,之後又想食,甘我擔心佢食太多,又嘈住哥哥瞓覺,唯有抱佢出廳囉,好辛苦捱到4點,再俾多40ml佢食,點知佢食完又即痾,好在有渣既,唔係痾水,於是等到6點,佢夠鐘食奶,食完佢就瞓啦.甘我泵埋奶先瞓,6:30am先有得瞓,7:30am又要起身叫仔返學,真係有d暈暈地.頂唔順.嫲嫲話昨日太熱鬧,多人抱,咪扭計囉.唉,關事咩.今日婆婆無出來,我每次做晒野打算補眠,個衰豬就扭計喊,前後我都係補得1個多鐘頭覺.今晚要早d瞓先得.

今日奶量:495ml

姑姑來探望

9月14日

今日姑姑第一次見柏晴,話佢好靚女.我覺得佢同柏宇好相似.係晴晴個咀仔比哥哥厚少少姐.但d手指腳指都好長架.條脷又好長,婆婆話佢日後講野會好叻姐.

今日奶量:530ml

勤力就退燒

9月13日

半夜起身泵奶,今早就退燒啦.晴晴12點食完就成5點先食奶,剛好我夠時間泵左出來俾佢食.
今日爺爺同婆婆第一次見晴晴.嫲嫲今日又講話不如將晴晴交俾佢湊幾個月.我無出聲,因為我一定唔會甘做.
我有過之前既經驗,呢次湊bb都無甘緊要.最起碼情緒暫時都ok.婆婆今日幫我手抺晒d窗,又執左好多野.多個人商量果然係唔同既.指意我一個人做,有排呀.

今日奶量:450ml

好乖

9月12日

晴晴今早1:30am喊要食奶,依家暫時可以全人奶餵佢.遲d唔得就補奶粉啦.佢食完就一覺瞓到7點.要我叫醒佢食奶,可能我成8個鐘無泵奶,個胸好硬,亞女食得唔多,於是即泵出來叫daddy餵.晴晴好似好鐘意daddy抱佢.一抱就唔喊.又成日對住daddy笑.氹到daddy好開心.另外今日下午己好攰,陪左對仔女一齊午睡,瞓醒個人成身都痛,原來發燒.100.8度,唔算高.即時打去qe問姑娘仲可唔可以餵奶,我怕有菌傳俾晴晴,姑娘話如果無傷風感冒就無問題.我估係我半夜谷奶無泵,所以先發燒.晚餐後咩都交俾daddy做,我即去瞓,就好d啦.希望快d好返啦.
柏宇今日都去睇醫生,隻左手好多一粒粒,原來係濕疹.真係要勤洗手先得.柏宇好錫亞妹,成日幫手餵奶,拎片,又幫手掃風,有咩食都問亞妹食唔食.真係大個囝啦.

今日奶量:490ml

無期望反而可以出院

9月11日

今早11:30am接到醫院電話,話晴晴夠2.3kg可以出院啦.甘叫我地2:30pm後去接.搞好晒手續返到屋企都3:30pm啦.第一餐奶交俾嫲嫲餵.到6:00pm就試下埋身餵,晴晴食左一陣就瞓左啦.甘佢瞓左我就唔補奶啦.等佢餓再食啦.

今日奶量:470ml

唔期望

9月10日

雖然姑娘昨日話今日好大機會可以出院,不過我就覺得無咩可能.唔緊要啦,係醫院多d人睇住,仲放心啦.
今日再磅輕左少少,得2.54k,今日我醒啦,一次過拎晒d人奶去醫院,若果好彩出院咪最多拎返走.好過白行多一趟.今日唔夠奶,得400ml咋,補少少奶粉啦.不過都逃唔過要2頭走,因為得返一條片咋,我都要走出去買.唉,又一來一回,好c攰.日日甘多個鐘係醫院,都幾攰架,有時直頭想瞓添.

今日奶量:530ml

來回好攰

9月9日

今日再磅得2.55kg,無得出院,但我又無帶人奶去醫院,於是餵左1餐後,即趕返去拎埋餘下6餐返去醫院,一來一回都要個幾鐘,好攰.今日共拎左420ml人奶俾晴晴飲.姑娘話只可以拎夠一日份量,因為無甘多地方幫我雪.甘我唯有分好晒每日拎來啦.

漏奶

9月8日

由於太攰,昨晚1點多泵完就到今早起身先泵,一起身就件衫瀉左一大片,因為成6個鐘無泵,谷得勁得滯,昨晚連今早共泵左3次,已有6餐俾晴晴食,真係要加油.只要個女健康,幾辛苦都值得.
今日都第10日,下午會再磅重,希望重多d啦.
今日total拎左7餐人奶俾晴晴,有420ml,足夠亞女一日既份量,仲有少少存貨係雪柜,今日磅重得2.22kg,不過姑娘話叫我今日拎定衫俾女女,佢話好大機會今日可以出院,約明天4點左右就知出唔出得,我諗如果今日唔得,咪最多住多一至兩日,因為佢都係差少少磅數姐.
今晚回家即時要執好張bb床,枱,搞到好夜先有得瞓,因為間屋實在太亂啦.想整整齊齊接亞女出院.費事甘多塵啦.

柏宇43個月大

9月7日

今日係柏宇43個月大(3歲7個月),今日本來應承早d回來陪佢,但柏晴今日埋身食左15min後,我4:45pm先補多50ml人奶俾佢,佢食完都唔瞓,直至6點我想走啦,佢不停喊,又扭想食奶,結果等埋姑娘6:30pm俾枝60ml人奶我,先食埋乖乖瞓覺.今日我都泵左390ml人奶,夠晴晴食6餐架啦.返到屋企都8點啦.無咩時間陪柏宇,今晚就同佢傾左一陣佢學校既野,佢好開心話我知多左咩新玩具,同邊個一齊玩,又話老師好錫佢,仲話俾我知校長病左無返添.等暗左佢瞓先起身洗奶樽及泵奶.可能飲左木瓜魚湯,我覺得明顯谷奶多左又泵多左.甘希望keep住奶量,甘晴晴就夠奶飲啦.快d長肉快d出院返屋企.

重得好好

9月6日

今日又要磅重啦,好驚佢重得少,結果姑娘話佢重左0.09kg.現有2.18kg,嘩,好開心呀.進步左好多.我仲諗住如果唔重,我有可能會放棄唔餵人奶,改食奶粉,點知空擔心一場.
今日帶左400ml人奶俾個女,差唔多夠佢一日份量.不過半夜真係唔多想起身架,唔泵又痛得緊要.為左想佢健康.我會加油既.今曰2次埋身餵都唔成功,因為佢全程瞓,即使俾奶樽餵都啜幾啖就吐返出來.點拍都唔醒,不停瞓,我諗唔通上餐食得好滿足,所以呢2餐唔想食,拍極都掃唔到風,佢又唔食奶,不停左扭右扭推開個奶咀.最後要搵姑娘幫手,都係一路食一路吐出來.到換片時,突然係我抺patpat時痾,唔係普通痾,係成條屎柱射出來,我成手連件袍都係屎,佢d衫及包被都係屎,好論盡.呢頭換左,未抺好,又射一大篤出來.今次好在剛放左片片.咪等佢痾完先再清潔囉.可能佢頂住唔舒服,所以唔食奶.全程4點瞓到7點45分.到我差唔多走先醒,就不停喊.俾佢激c.仲以為佢係唔識喊添.好唔捨得甘留到最後一分鐘先走.因為佢今日碌大眼仔既時間唔多,好想同佢傾多陣計先走.不過哥哥又係屋企等緊我.嫲嫲話柏宇講係佢屋企住得唔開心,想返媽咪度.於是決定每日嫲嫲來帶佢上學及放學,係嫲嫲家晚飯及沖涼後才回來睡.daddy都話唔想柏宇覺得生左妹妹,就好似唔要佢甘.所以目前就甘做先啦.睇下妹妹出院後咩情況再做決定啦.我都驚自己撐唔住架.

柏宇第一次見妹妹

9月5日

今日daddy同柏宇一齊去醫院,我趁推柏晴去人奶房埋身餵時,daddy即抱柏宇去見妹妹.因為佢係唔入得病房既.之前柏宇仲以為妹妹係我肚入面,所以成日錫我肚.佢見到妹妹後好開心,話妹妹好細粒.要妹妹食多d奶,經過昨日第一次埋身餵奶,今日出多左,有成300ml俾佢食,另外埋身食左25min,雖然唔知佢食左幾多,我亦無補奶.不過見佢食完無扭計,又瞓得好熟睡,我估佢應該食得飽掛.柏宇等到係daddy身上瞓著左添啦.佢今日係屋企拎尿片俾妹妹,拎到去病房話要自己俾妹妹,佢真係好錫妹妹呀.柏宇甘乖,我都好錫佢姐.

重得好少

9月4日

今日磅重,只重得0.02kg,現有2.09kg,姑娘話bb應每日重0.03kg,亞女食得幾好,可以食50ml一餐,不過痾得好少,正常甘吸收,應會重好多,真係唔明點解.今日第一次埋身餵,都有吸啜,通緊d無甘谷奶.今日泵出黎都係得200ml人奶,太攰啦.儘力而為啦.姑娘又話可能食人奶易吸收,好易餓,無奶粉甘飽肚.會重得慢d架.不過抗體會好好多.甘我就有幾多俾幾多啦.
另外成個星期無見個仔,今日放假返來住,係開頭有少少發脾氣叫我走,後來都可以冷靜,可能我忽略左佢啦,最近係醫院真係用左好多時間,個囝叫做生性架啦.真係要時時提自己要關心多d佢先得.

決定租機

9月3日

今日上奶第3日,由於谷奶太痛,手泵又壞左,於是去問上次大嫂租泵奶機既公司,睇下有無機,好在仲有最後一部,即租半年,1500元租金,雙泵配件:580,按金:2000,仲可以送到上門,10點打去問,1點多己到,即試泵,鬆晒.今日有200ml人奶俾柏晴飲,另外今日去到見到佢掉左臍帶,我就拎走留為紀念.上次柏宇我都有儲起.2兄妹不分彼此.

上奶有進步

9月2日

昨日上奶,今日好谷奶,手泵出左50ml,到係醫院個胸硬到借機泵左50ml,因為姑娘話晴晴食唔唔叻,無得埋身食,無法啦.泵住先啦.今日磅重收水至2.07kg,一齊正常,每餐食45ml奶,返到屋企又要用手擠出50ml.好實出唔到奶,痛到想喊,搞到半夜2點幾先有得瞓,好燥火呀.

奶媽=乾媽

8月29日

今日joyce及其男友來探我地,佢除左俾左20罐細a+我之外,仲拎左d包被,手套仔,玩具及顏色筆俾我2個囝女,十分有心,我話佢唔只係奶媽,直頭叫佢做乾媽.生柏宇時又係佢供應奶粉,生柏晴時佢又可以供應奶粉,有呢個朋友真係好好彩,慳返唔少.所以我今晚請佢食飯多謝佢,因為無幾多個朋友可以甘對自己架.

又大執位

8月28日

今日叫左細舅父出來幫手,因為要掉sofa,成個廳d野重新擺位,之後重去訂埋個書柜,dinner同舅父食火鍋,真係辛苦晒舅父啦,成日都要佢幫忙.我諗屋企都無咩可以再郁架啦.

都係要睇醫生

8月26日

今日頂唔到,都係要去睇醫生,都係腸胃炎,食左藥就好d,唔想甘早生亞女出來.所以唔入院.亞囝就好d啦,起碼無嘔,等佢痾清d菌就會好架啦.

2母子都病

8月25日

昨晚開始我同柏宇都唔多妥,有肚痛,到今早凌晨,我去廁所前,同柏宇換片,之後佢就嘔啦,佢嘔完瞓返,但我就瞓唔著,於是到6點幾我就起身嘔啦,嘔左3次先瞓到,後來食完早餐,叫左嫲嫲睇住柏宇,我去瞓一陣,到中午整左通粉俾仔食,可能我地迫佢飲左成杯涼茶,於是佢連粉都嘔埋出來,當然帶佢去睇醫生,醫生話佢係腸胃炎,食2日白粥就ok架啦,麵包都唔好食,甘都安心d,甘即係我都係一樣啦.不過我唔想晒錢睇醫生.希望2個都快d好返啦.
原來病唔可怕,最慘係2母子一齊病,你唔可以發佢脾氣,但佢就會發你脾氣,你唔舒服仲要煮埋俾佢食先得.自己真係頂唔順架.

照超聲波

8月23日

今日又要再照,我有57.5kg,亞女有2kg,重得好少,個size差成個月,醫生要我下次9月1日再返去照,不過目前check左佢既內在功能無問題.甘都唔緊要啦,細粒d,咪日後多人錫d囉.

唔舒服

8月22日

昨日可能熱得滯,今日柏宇有d唔舒服,不停流鼻水及有咳.希望無事啦.

囝囝放暑假啦

8月19日

柏宇今日終於放暑假啦.今早好驚,因為剛好係返學時間,出面行雷好勁,好在今日唔駛返姐,不過都俾d雷聲嚇醒左,今日婆婆同細舅父仲出來探我地添,好開心,全程柏宇都可以跟住舅父,甘我都唔駛甘操勞,不過婆婆都話柏宇惡左好多,一句黎一句頂,又無禮貌.真係要諗下辦法治佢先得,唔可以俾佢無大無細,無法無天.甘細個都甘樣,大d仲得了,第時妹妹學埋一樣就c得啦,我實嘔血都似.

壽司迷

8月15日

今日下午去左食壽司,柏宇一個人食左6件小卷,2件普通壽司,加半碗烏冬,個囝真係好鐘意食壽司架.次次去到都好興奮,佢食飽就不停要攞俾daddy食,因為佢覺得好開心,可以自己拎.
之後去左買護床墊,海馬做特價,250元,加左真係好好多,條腰無甘痛,起碼有覺好瞓先啦.

產檢

8月11日

今日返去產檢,我有56.4kg(124lbs),醫生話一切正常,我仲揀左順產添,希望可以順利啦.
其實自己都好茅盾,如果個b太大,又怕難生,要開刀,如果太細粒,又怕佢難湊,真係好煩呀.都係有得食就食,瞓就瞓啦.唔好諗甘多啦,反正都唔到我控制.隨遇而安啦.

拍拖紀念日

8月10日

今日係相識日,不過老夫老妻,又有埋小朋友,無再特別去慶祝囉.都係係屋企食飯.呢d節日過多幾年就會唔記得架啦.因為到時要記住d仔女既野,個腦仲邊有空間記甘多呀.

見家長

8月9日

今日約左去見家長,今次見我既係吳老師,佢話柏宇大致上ok,只係唔太主動,性格慢熱,怕羞,無論玩及食都可有可無,唔會主動去爭取.仲有佢好多野都識,不過唔表達出黎,全部收埋係心入面,明顯缺乏自信心,所以希望我地可以幫佢建立自信,慢慢引導佢講出內心既感受,唔好成日收埋,甘對佢既成長係好大影響架.仲有多d帶佢出外見多d野,擴大佢既視野.等佢多d話題,就唔會成日只講自己有信心既野啦.

42個月大(3歲半)

8月7日

今日係柏宇42個月大(3歲半),好快妹妹就要出世啦,唔知柏宇做哥哥開唔開心呢.
今日約左去區議局搞既影學生相,d工作人員見我大肚,靜雞雞俾我影先,前後用左15min就走得,d人真係好好呀.不過柏宇就狂喊,所以我諗到時影出來既相應該唔太靚,不過10有1打,都好抵架.之後我地去左買開學既黑鞋及白鞋,今日真係滿載而歸.開學既野都搞得七七八八,甘都安樂晒啦.

唔想生??

8月3日

今早6點幾,個肚好硬,大脾內側好痛,未試過甘痛,我第一個感覺係,我唔想生啦.
真係從來無試過甘諗,因為想郁都郁唔到,又係度諗,係咪陣痛呢?
結果好辛苦坐左起身,按摩大脾,自我安慰話,呢d甘既痛都忍唔到,日後陣痛甘點算喎.
等無甘痛,就坐左起身瞓,真係好攰好痛呀.好在之後成日都無再係甘痛,甘都舒服d.
都33週幾,都係小心d好.唔想好似第一胎甘早產呀.

沙田之行

8月1日

今日一家去左沙田spoony town,之後又去左睇3d立體畫屋,再去埋ikea食熱狗,飲汽水,仲去左食柏宇最愛既壽司,開心c佢,佢一個人食晒一碗他烏冬+ 一件朱古力蛋榚,仲成舊蟹柳小卷一啖放入口,都幾勁,總之佢鐘意食既野就會食得好多啦.結果晚餐都未食,佢已經攰到係巴士上瞓著左啦.因為昨晚佢成2點先瞓,8點就起身啦.我都攰啦.趁我仲行得走得,想多d帶佢出街,唔駛成日困住佢麻.否則日後生完想出街都好難啦.

姑姑來探望

7月29日

今日姑姑來探我,我就順道請佢飲茶,當作預祝佢下月生日,因為怕到時亞女早左出世,會唔得閒,仲送左個化妝袋作為生日禮物添,小小心意啦.

daddy新曆生日

7月26日

今日係daddy生日,我一早訂左蛋榚,買定牛排意粉做晚餐,因為我今日要去照超聲波,今日磅過我有54.3kg(119.5lbs),可能趕住去,量血壓有成139,之後抖順條氣就正常返去110.甘都好d,等左一陣就去照,今次亞b比正常週數只差個多星期,我今日32w3d,亞b約30-31週之間,都追返一半,現亞b約有1.6kg(3.5lbs),胎水及胎盤,bb腦血流量,骨既長短都正常,而且仲掉左頭啦.醫生話可以4個星期才返去照多次.甘就好啦,唔駛甘辛苦.
我仲可以準時第一個去接囝囝放學添.佢不知幾開心.返到屋企我仲捉住佢隻手一齊寫左張生日咭俾daddy,等切蛋榚先拎出黎送俾daddy,不過柏宇就等daddy入門口已講左俾佢知,好在daddy唔明柏宇講咩姐,否則無晒驚喜.
柏宇仲一馬當先走去爭住吹蠟燭添,俾佢激c.出年就可以多個寶寶一齊慶祝生日啦.好期待.

大伯娘到訪

7月25日

今日下午大伯娘一家到訪,晚上由daddy去m記買外賣,因為叫返來貴好多,2個小朋友仲食得好開心添.伯娘仲話柏宇大膽左好多,不過脾氣好勁,變臉都好快,情緒起伏較大.因為我同daddy既教法太極端,柏宇學野好快,不過係差在好情緒化.要同daddy搵個平衡位先得啦.佢仲細,可以教返好架.

爺爺嫲嫲帶柏宇去街

7月24日

今早同爺爺嫲嫲及叔叔去完飲茶,行到屋企樓下,柏宇跟左爺爺嫲嫲去街,唔駛媽咪陪,甘我當然好啦,一來可以俾佢痴嫲嫲多d,日後我生時,佢都唔會抗拒跟嫲嫲,二來唔駛去邊都要搵我,甘我又可以多d時間做自己野,佢又可以獨立時.幾甘好呀.佢地12點去街,我下午4點先接返囝囝,因為我地約左婆婆及姨媽一家去九龍灣睇恐龍及行mega box.主要目的都係去ikea食hotdog,popcorn,雪榚及飲汽水,柏宇成日都話要食架,不過又真係好抵食既.晚餐去左食上海菜,都好好味,不過貴左少少,嘻嘻,無收入,所以量入為出啦.食完飯就要返家啦,因為柏宇行足一日都好攰啦,要返去早d休息啦.

daddy舊曆生日

7月19日

今日原來係daddy舊曆生日,(六月初八)唔講我都唔知,差不多到柏宇放學,爺爺打俾我話今晚唔好煮,佢請daddy食生日飯,甘我實無問題啦,只係好少可係長輩同後輩食飯慶祝姐,daddy有甘好既父母真係要好好珍惜呀.

去探婆婆

7月18日

今日爺及嫲約左我地去m記食早餐,之後提議去探婆婆,我地去到果真俾左個驚喜婆婆,因佢唔知我地入去,見到婆婆身水身汗,好肉痛呀.等到婆婆收工,連埋姨媽一家去飲茶,之後嫲嫲拎住婆婆幫佢整好左既薑就趕返出去啦.
我有大有細,都係一齊返去,差唔多到都忍唔住要嘔啦,因為架車實在太焗,好在同嫲嫲同車,佢可以幫我睇住仔仔先,甘我又聞下d薑味又好d甘囉.

產檢

7月14日

今日返去產檢,有成53.4kg(約117磅),我有重,亞b就麻麻啦,不過心跳正常,醫生話我到後期,怕上次既毒血症返發,於是又要留24小時小便去驗,同埋仲要抽血,甘我都要乖乖照做架.希望平平安安生妹妹出來啦.

連環仆

7月12日

今日去接放學,柏宇一見我就即收好玩具,跑出黎,結果向前仆,咬到下唇有少少流血,少不免大喊啦,好在有拎餅餅及益力多俾佢,好快收聲無事,到出左學校門口,佢係條斜路又仆,今之係向側仆完再轉多個圈,我都無手扶佢啦,等佢自己起身,今次喊得仲勁,因為有少少皮損左,石屎路,實痛啦.佢要自己行,唔俾人拖,但對腳又好似無力甘,唉,結果俾我罰要拖住行直至返屋企,真係睇少眼都唔得.

做勞作

7月11日

今個7月,柏宇學校研習主題係帽,甘上星期五,送柏宇返學時,佢同我講想要試戴老師既皇冠,於是今日幫柏宇整左一頂,當係帽甘俾佢拎返學校同小朋友一齊分享.佢見到即時要戴住,唔肯除低,幾驚佢整爛都未拎到返學呀.
最近柏宇識叫妹妹乖d,唔乖會打佢patpat,乖呢就會錫佢,仲即時行動添.希望佢日後都甘錫妹妹就好啦

30week再照超聲波

7月9日

今日返去再照,book左3:30pm,點知等到5點先有得睇,結果係亞b整體細左3週,但其他野正常,現重1.1kg(2.42lbs),係細碼b底線,醫生話我胎盤唔吸收,食幾多瞓幾多都無影響.要再約2星期後返去覆診,我睇完即趕返去湊囝放學,5:45pm去到,柏宇同我講佢喊,因為見唔到我.正傻豬黎架.
醫院都好體諒我,幫我約下次3點再照,希望唔駛等甘耐啦.

柏宇3歲5個月(41個月)及好味既金沙骨

7月7及8日

昨日係柏宇3歲5個月啦,好快就到妹妹出世啦.柏宇都好錫個妹,甘我都好安慰.
另外今晚整左金沙骨,第一次整,唔知得唔得,但daddy一早講左佢唔多食呢d,so預佢一件即可.整呢個餸都要焗成個鐘,幾晒電及時間,甘我見仲有5分鐘就焗完,於是去同囝囝沖涼先,點知出來個面燶晒,有幾舊唔未食得添,白費我既心機,於是我又要進行修緝既工作,出來daddy見我唔開心,於是話佢一定會食晒佢,甘佢一食即話好味,我以為佢安慰我,唔信佢,自己試味先,點知真係幾好味喎,唔係賣花讚花香,連柏宇都搶住食就知真係ok架.食剩最後一件,柏宇仲出聲叫我地留返俾佢,結果佢一個人仔食左3舊金沙骨,daddy仲叫我過幾日再整添.

第一次去海灘游水

7月4日

今日柏宇好開心呀,因為我地一家同爺爺嫲嫲去左清水灣游水,由於太曬,我地3:30pm坐車去礸石山地鐵站,再轉車去清水灣,全程共1.5小時,都幾耐,去到都5點啦.之後爺爺同daddy及柏宇去玩水,起初柏宇都好驚,坐係水泡上面,後來越玩越大膽,不停叫爺爺帶佢去浮台,又不停係水行返上岸同我say hello.又行返落水,仲要唔駛人拖,自己行來行去.爺爺同daddy又托住佢教佢撥手及腳.暇終玩左1個鐘,太凍啦,要走啦.柏宇仲依依不捨添.
今日最失敗係唔記得帶d小食,亞仔一上水就話肚餓,結果捱到出去彩虹,daddy即買左餅俾佢食先,之後返到屋企即食飯,但都已經9點啦.真係好長時間,最衰太遠,否則可以成日去都得啦.

p/s:去一次沙灘,洗衫洗到傻左,d衫好多沙呀.

足球日

7月3日

今日大伯突然話過來睇波,晚上10點來,11點幾走,仲要係我地個網址睇唔到既,好在伯娘有另一個網址,否則白行一次,伯娘仲買左好多零食上來,最開心就係柏宇,佢食完腰果,又食朱古力,再食薯片,幾開心呀.不過驚佢咳咳咋.到時我同佢都辛苦呀.

大食會

7月1日

今日係婆婆家搞左個大食會,當作慶祝daddy及姐夫生日,好多野食呀,柏宇同我都好期待,好在仔仔都無咩咳,我又無肚痛無痾,甘就可以大食特食啦.婆婆同姨媽整左好多野食,有三文魚意粉,豬排飯,炆斎,苦瓜豬肉,炸春卷,咖哩角,蝦丸,魚手指,煎雞翼,海哲,牙帶魚,炆花膠豬腳根鮑魚,煲左花膠湯,仲買左隻手撕雞同腎片.仲有甜品'馬卡龍'同cookie,大人小朋友都食得好開心,只係甘熱天時辛苦晒要煮要洗既婆婆同姨媽,我就無咩貢獻啦,唯有出力食啦.食多d等亞b長多d.
今日仲有樣野好好笑,就係昊昊同柏宇鬥咀,一人一句唔停口,你投訴佢又投訴,佢地又明對方講咩,2個都係管家仔,可惜無錄低佢,甘日後可以俾佢地自己睇返麻.不過柏宇就比之前大膽左好多,唔怕人,又少喊左,都係一個進步黎架.

好辛苦

6月30日

昨晚突好肚痛,去左去唔到大大,谷到前面都腫晒,連企起身都合唔埋對腳,因為d血管發大晒,好辛苦好痛,前又谷後又谷,終於坐左1.5小時廁所,大力谷左出黎,之後就好d,不過血管依然腫晒,好痛.最終痾左4次,清晒個肚就無事啦,不過為左可以明天去大食會,今日都係睇醫生拎定d藥看門口好d.醫生話最大可能係我食錯野,唔係腸胃炎,仲叫我唔好再飲煲奶加蛋,雞蛋要放滾水3分鐘先可以食,否則有菌,甘我諗應係雞蛋出事啦.仲教我如果受得,就食多d雪榚,可以長胎既.我今日都乖乖食左4次止痛藥,希望無事啦.

蕃薯糖水

6月27日

今日daddy好少可話想食糖水,仲話要食蕃薯糖水,買晒材料佢話等佢整,好在無聽佢講咋,佢都未整過,諗住一水滾就將d薑,蕃薯,糖一次落晒.甘就真係佢自己食埋佢啦.結果按佢要求加大量既薑,辣到亞囝食唔到,我就食左2碗,餘下既daddy掃晒.可能少食多滋味啦.
另外我今日開始,每早晚飲一杯滾奶+蛋,仲要瞓多d.有時間就煲埋花膠湯.希望2星期後有進展啦.
另外今日亦做到抽時間同囝囝講故事,佢瞓前都係帶住開心既心情.所以半夜瞓緊都係會笑既.

再次checkb女心臟

6月25日

今日再照超聲波,醫生話b女d心肺功能都無問題,血流量等等都正常,只是現在size只得26週,比我現在陀住28週少左2星期,重約868g(1.9磅)屬細碼b,不過都係係正常範圍之內,但要我係2星期後再回去照多次.因為柏宇都有相同問題,但醫生又搵唔到原因,所以估好大可能係遺傳左我,因為我出世都唔太重,得5磅半,而daddy出世就有7磅2.我同醫生講,我食好多野喎,醫生話如果亞b唔吸收,我食幾多都無用,現可以做既係多d休息,唔好甘緊張.每曰2-3杯奶己夠,雞蛋可以食2隻都ok,甘我唯有係呢2星期儘量休息多d,睇下下次返去照有無好既成績啦.

終於好得七七八八啦

6月23日

今日可以返學啦,我應承整家蛋榚俾柏宇放學食.放學時老師話今日除左無俾生果,連茶點既乳酪都無俾佢食,
餅乾都係幾件,因為怕佢又再咳.所以柏宇放學識同我講話好返呢就有水果有乳酪有餅乾食囉.
另外佢今日同我講,話巴士5d就去接爸爸收工,去食hotdog同汽水,食左2次添,85b就返學,6c就去覆診.
隻豬仔記得佢坐過既巴士係去邊度,去幾次都記得.柏宇真係好可愛呀.

休學2日

6月21-22日

呢2日都因為柏宇咳得勁,所以決定唔返學,唔知食錯咩,食完藥仲咳得勁過之前,心痛呀.所以呢2日都著返片,俾佢有覺好瞓,等佢有足夠休息,好返後再介片.其實小朋友有病,最大責任係大人,因為無好好照顧佢地,所以真係要好小心,均衡飲食好重要架.

父親節

6月20日

今早約左爺爺去飲茶,所以都一早去搵定位,費事成日都要老人家去搵位啦,又好識做叫daddy俾少少錢爺爺買野食,人氹人麻.不過今日柏宇病得好勁,忍唔住要去睇醫生,咳到成日作嘔,不過醫生就話只係少少鼻同喉紅腫.好少事,多d休息及飲水就得.
今日除左早上,連午睡都有尿床.真係要買多少少床墊替換,洗完都乾唔切呀.

水災呀

6月19日

昨晚無叫仔仔去夜尿,近天光5點睇下,佢剛尿濕張大床.仲要揀左無墊既地方尿濕,慘啦.即時鋪墊吸取先,瞓醒先再換啦.不過都預左有排會尿床.佢都係細,要好長時間去適應既.
今日打左去泳會,取消晒餘下3堂,並要求退錢.唔知得唔得呢.寧可自己帶仔仔去玩水好過.

自己覆診

6月18日

好忙碌呀,昨日仔仔覆完,今日到我啦.今日約左10:30AM,我10:25AM去到做晒所有野,坐埋一邊等.點知10:50AM就叫我名入去啦.從來無試過甘快架.醫生按完肚再聽BB心跳,之後話俾我知,個BB SIZE同週數接迎,因為子宮大小差不多.另外上次驗小便有結果,話有少量蛋白尿,不是太嚴重,不過我既腎功能就差D.甘就KEEP住一個月返去一次即可.11點就走得.十分開心.無事無幹就最好啦.

p/s: 今日磅有112.6磅,唔知有幾多係亞b既呢.

有增長

6月17日

今日柏宇返QE覆診跟進高及重,現在90.6CM及11.7KG,醫生話柏宇高度緊緊貼住細碼B,但重量就OVER左細碼,未到中碼,可以改為每1年返去覆一次診.甘都好呀,超碼有進步.
另外柏宇今日都可以成功無整濕床,又可以係痰罐去BOO BOO,係我今日唔夠瞓,個人燥D,我一早叫佢起身去廁所,佢又係去完就唔瞓,於是我忍唔住鬧佢每朝都係甘樣,佢唔瞓我都要瞓架,於是我就自己入房瞓,由佢係廳,轉頭DADDY話佢好似發燒,一探都有99度,佢每次作病前都係甘樣,我都好驚佢病,因為佢有少少咳及鼻水,終於搞左半個鐘,氹左佢上床玩車車,轉頭佢就瞓左啦,甘我又可以一齊瞓啦,一唔夠瞓我就會暈及嘔,真係好唔舒服.結果補返2個幾鐘眠,先至一齊去覆診.其實每次都知小朋友實會扭計,不過真係好多時都忍唔住發左佢脾氣,對佢真係好唔公平.唔知自己幾時先可以做到完全平心靜氣對佢呢.

堅持後的成功

6月16日

昨晚都係無俾片片柏宇,佢都係唔肯去大便,daddy就話不如俾佢用埋先介,我堅持唔放棄,大不了有咩事去醫院.
無人幫到自己,就要靠自己架啦.反正柏宇介唔介到,到頭來都係我去takecare佢,介到我生之後咪輕鬆d囉.佢急就一定忍唔到要去痾架啦.我唔堅持就一定前功盡廢.昨晚都係3:00叫佢尿尿,又係話無,之後我一扎醒就問佢痾唔痾,佢答我唔痾就再提佢唔好癩尿喎,如是者一晚都問左幾次,到7點鐘,我就計過佢有可能會忍得太耐,於是整醒佢一定要佢痾尿,佢c都唔肯係痰罐痾,要去廁所,甘我等左一陣,一定要佢痾左先放佢出去,點知佢痾完話唔瞓,甘我見佢第一次無整濕床仔,又肯去痾,唯有陪佢一齊玩,唔瞓囉.以表示讚賞佢甘叻仔.否則佢成功做到我既要求,但我又當係應份,佢可能會唔開心架,下次就唔會再做架啦.
另外佢今日係第三日無去便便啦,今早食完早餐話肚痛都唔去,之後c要片片,我知佢真係好急啦,都企硬只能揀痰罐/廁所,最後佢坐完痰罐,再坐廁所,又話坐返痰罐,結果痾左一大舊,佢做得到啦,可能我一次過要佢適應係好殘忍,不過想佢進步,唯有做衰人啦.不過之後都唔夠10分鐘,佢話好凍,又肚痛,叫我關冷氣,我就知佢未痾清,佢都即時要求再去痾,痾完唔夠10分鐘,又要第三次要求再痾,今次係好爛既,甘佢痾完後終於話唔痛啦,舒服晒啦.
而我都承諾任佢買一份玩具.大家辛苦後有成果都係值得既.

介夜片

6月14日

本來都唔諗住甘早介,不過柏宇曳豬,今日又呃我話肚痛要片片痾boo boo,之後只痾尿,於是俾我罰今晚無片用,甘我唔想講完唔做,於是不如瞓覺都唔俾片佢,佢話肚痛都唔俾,臨瞓前去完小便,半夜又叫佢去,不過真係好難叫得醒佢,如是者成晚問左3-4次都話唔去,到daddy早上7:30返工時都check過佢無瀨尿,甘我瞓到7:45起身,佢濕晒啦,一睇係濕到成褲成衫都係,甘即係佢好忍得啦.成身濕晒都仲瞓得甘淋,即時同佢沖涼返學,雖然大家都辛苦,不過都要堅持,甘日後生左就會好d架啦.
好在買定床墊,不過一濕,全床都換晒,真係唔乾架.

公公到訪

6月13日

今日公公來探我地,順便去飲茶當慶祝父親節,因為我都唔方便再返娘家啦.
之後去左行街街,柏宇最後仲玩到沖涼後係sofa瞓左添,今晚直情抱左佢去bb床瞓,佢都一覺到天光,甘我都有覺好瞓啦.

第二堂游水

6月12日

今日準時去游水,點知求其搵個教練教柏宇,同我當初要求既唔一樣,不過我費事難為人地就算啦,點知個教練氹唔掂佢,個仔喊足全程,我唯有要求換人,原先既教練又6月份full晒,甘都算,反正仲有3堂,只要都係同一個亞sir教就ok,佢又話個亞sir6月無時間補堂,都唔知甘大間泳會,做野點解甘亂,所以同daddy商量後都係唔再報啦.寧可自己得閒先同個囝去玩水.

老師的提醒

6月11日

今日早上老師見我又韶陪柏宇食早餐後先走,於是出聲同我講,叫我唔好再甘樣.係走就即走,唔好拖拉,俾佢返學就係想佢獨立.否則日後我生左會仲辛苦.甘老師所講都啱.唯有狠心d啦.
到放學時,老師話我走後柏宇都好快收聲唔喊,自己食早餐,唔駛老師餵.仲教我要有自主權,適當合理地俾佢選擇.唔好太就柏宇,唔要同佢講條件.老師仲舉例:如柏宇話想食炸雞翼,甘我唔想俾甘熱氣野佢食,於是就可以將當晚煮左既餸,如有菜,排骨,紅羅白,魚...話佢知可以俾佢揀2樣,甘樣係我決定範圍內,既可唔俾佢食唔健康既野,又俾左選擇佢.甘先叫適當選擇.
我真係要好好記住,要拎返個主導權,唔好俾柏宇牽住鼻子走.仲要時刻提醒自己要有耐性,唔好成日發脾氣,否則日後b女出世,我忟時又會無啦啦發左個囝脾氣,甘就對佢唔公平啦.

3歲4個月(40個月大)

6月7日

今日柏宇3歲4個月,之前講過佢每月7號都好扭計,不過今日ok喎,不過今日我去接放學前,去廁所有少少血流出黎,都幾驚下.即時打俾婆婆尋求慰問.又打俾daddy叫佢買外賣回來,甘樣煮少d.怕b女會早產.都係日後少d勞動,坐多d.否則後果自付呀.

第一堂正式去學游水

6月6日

昨日唔得閒,改左今日去游水,我應承左要全程陪住佢,結果企足一堂,腳都軟埋.不過佢都有進步,喊左一陣唔肯落水姐.之後亞sir同佢出去游左幾次都ok,佢仲一齊做"boo"水動作添.依家係頭頂淋佢水都唔怕啦.不過今日都幾凍,柏宇因為之前喊過,又唔多郁,所以成個鐘頭不停震.唯有氹佢郁多d,怕佢冷親.今日daddy都有係看台睇住柏宇游水,佢之後仲話會買件泳衣陪個仔去玩水添.如果成事就好啦,我都好期待一齊去玩水.甘樣柏宇一定會好開心姐.

好開心既生日

6月5日

今日係我32歲生日,又大一歲,今年好特別,因為陀住b女一齊慶祝,我地一家,婆婆一家同姨媽一家去左天水圍bbq,好開心,我都恨左好耐啦.今次要食返夠本先.否則有排都無得bbq啦.不過今晚好特別,因為除左我地之外,無任何人bbq,好似我地包場甘,所以理所當然我地就成為d蚊既唯一食物啦,可能黃昏關係,我同柏宇避無可避,我咬左2x粒,柏宇都咬左10粒.無陰公.不過今晚都玩得好開心,好難得一家人一齊去玩啦.睇怕生完之後都有排唔得閒啦.

p/s:柏宇一係唔唱,一唱就不停唱happy birthday,仲要happy birthday to俾每一個人,俾佢笑c.

收貨

5月31日

之前係大陸訂左d貨,今日終於收到啦,有2大箱.共17間既貨,有部份係大嫂既.我拆貨拆到想嘔,太多啦.拆足3個鐘先分好晒d野,不過d b女裙好cute呀,我訂左8件,節返港幣都係48元,平靚正呀.仲買左好衫,鞋,襪...今次有成27kg重,簡直越買越瘋狂,越買越窮.我地連膠柜都買左2大個,不過都係必須用既.要係生b女前執好晒d野,隨時迎接佢出世.

再同嫲嫲食生日飯

5月30日

今日由daddy親自出馬叫嫲嫲食生日晚飯,因為我叫嫲嫲實推三推四,我地揀左樓下酒樓,今晚d野好差,係唔太貴囉,叫左8樣野都係500有找.不過真係以後會少d幫襯.因為真係唔掂呀.今晚仲叫左叔叔一齊食飯,講真,有仔女同你慶祝生日,有咪食囉,唔好成日推黎推去,唔通無人記得你生日好咩.真係唔明d老人家諗咩.

第一次落水

5月29日

今日約左去史丹福試游水堂,由於我大肚,唔建議我上親子班,所以只好揀學前班,甘我頭半小時係池邊睇,之後要我離開,因為甘樣小朋友會依賴,我一走,柏宇喊到拆天,但游泳教練都還可以氹到佢,柏宇今日學左點踢腳,唔用鼻改為用口去噴水,同埋由慢慢用水淋佢個頭到成桶水淋佢個頭都唔驚.其實佢識唔識游水都唔係問題,主要我想佢獨立d大膽d同埋身體好d.甘一個鐘完左啦,佢見到我又喊,因為佢唔想我離開佢.之後不停話唔游啦.甘我問佢哥哥同佢玩開唔開心,佢話唔開心,原因其實係見唔到我,但佢係玩得開心既.之後問佢如果媽咪都陪住佢,仲游唔游,佢話游,於是我咪再報多5堂,不過條件係要我留係泳池邊睇住佢,等佢可以安心d.其實$140/1個鐘都算幾貴,仲要係1對2-4.甘樣會分薄晒d時間,不過佢肯學已係成功踏出第一步啦.
下午返到去,完全超級肚餓,食晒一碗飯都唔飽,由於太早起身,又無瞓晏覺,夜晚同佢換完片,佢講完媽咪陪我一齊瞓之後,我去掉片片洗手,都唔駛一分鐘,入房佢都已經瞓著左啦.真係破晒紀錄.游水消緊佢d精力,早睡早起甘都好呀.

嫲嫲生日

5月28日

今日清下電腦既資料先記得嫲嫲今日係新曆生日,即時買定蛋榚接柏宇放學去嫲嫲家切,原來今晚爺爺打算同嫲嫲食飯慶祝,唉,我同柏宇做左電燈胆添.由於daddy今晚唔得閒,所以我地再約過幾日再同嫲嫲食過啦.

有心既姑姑

5月26日

今日姑姑約左我去飲茶,話提早幫我慶祝生日,佢年年都甘有心,我好開心,我地飲完茶仲一齊去接柏宇放學,姑姑仲請柏宇食麥當勞,開心c佢啦.其實有心就得啦,我都唔想佢甘破費呀.

學校親子旅行

5月25日

今日係柏宇學校親子旅行,daddy請假一齊去,我同daddy今早6點就起身整壽司,煎薯餅+腸仔雜丸,準備帶去做午餐,另外昨日已煲左2公升既山楂水帶去飲,我諗都夠架啦.我地出發前仲去埋m記食早餐添,十分開心.
9點半集合,10點左右己到香港動植物公園,由羅老師及吳老師帶領我地去行左猩猩區,睇左好多唔同品種既猩猩,不過柏宇每個地方都話臭,成日拉住我要走,所以佢根本都睇唔到d咩,之後吳老師出手幫忙,拖住柏宇去行左一陣睇猩猩,甘佢都幾聽話,好快11:30am就食午餐,我地同梓源一家一齊分享食物,梓源daddy仲買左支青娃泡泡槍同紙飛機俾柏宇,真係唔好意思添.柏宇食得最多都係壽司,之後同梓源玩泡泡槍,成班小朋友圍埋一齊追泡泡,好熱鬧,果真係小朋友既恩物.玩完就差唔多集合回程,走之前當然要食返杯雪榚先啦.由daddy去買請返梓源一家食.柏宇食飽飽就拖住羅老師上車啦.其他小朋友都攰到要覺覺豬,柏宇仲不停咀講野,真係幾好精力.
不過佢都係敵唔過睡魔,4點就攰到自己上床瞓左啦.總括今日都玩得好開心,因為我地好耐無試過一家出去玩啦.

前功盡廢

5月21日

今晚柏宇食埋最後一次抗生素,就完晒成個療程,點知佢最後一次藥入口即吐出來,白費晒之前既心機,我同daddy都好嬲,因為佢甘樣等於晒左之前食既藥,會好易又病過,到時又要去睇醫生,又食藥無得返學,我又無得休息.一個病,3個辛苦,妹妹無得休息又點會長肉呀.真係俾柏宇激c左.結果俾daddy鬧到佢狂喊,之後勒令佢上床自己瞓,仲要delete埋電腦巴士,等佢無得再玩,當作懲罰,等佢自己知道唔聽話既後果.

靜脈曲張

5月19日

延遲左2星期既產檢,今日準時去到,之前已有少少唔舒服,於是等今日一次過同醫生講,醫生今日check左妹妹心跳沒問題,我就同醫生講我最近下半身有多處疼疼地,之後變成一條條蛇仔甘突晒d血管出才黎,連下陰都有甘既情況,坐同企都痛,醫生話係靜脈曲張,無藥食無得醫,我咩可以改善,即使日後生完都重要一段長時間先會消腫,因為子宮大左,壓住左d血管,所以下半身既血回流得差d,咪型成血管塞塞地囉.醫生仲話我依家先5個半月已經係甘,遲下個子宮再大d,情況會再差d,有可能到時輕輕掂到d血管都會爆.叫我自己到時留意係子宮出血還是整損左d血管.如果分唔到既就入院啦.另外仲要我抽多一之血同驗24小時既小便,因為上一胎個腎有事,佢驚我今之都係甘,所以就做多少少幫我check左先,甘我覺得有人免費check住,麻煩少少都無所謂啦.
仲有,之前既約期覆診紙都只係打住覆診紙,今次竟然將我列入高危妊娠,唔駛甘早判我死刑呀.唉,估唔到陀呢胎仲麻煩過上一胎,真係唔會再諗生第三胎啦

退燒啦

5月18日

昨晚成晚check住佢,出左成身汗,終於退燒啦,雖然成晚不停咳,不過都叫做大家有覺好瞓啦.
我都好耐無試過瞓到甘晏,但係佢瞓到,食野都ok,我諗都會好快好返既.今日羅老師打俾我問下柏宇既情況,原來下星期二去親子旅行,上次10月份因為發燒無得去,希望今次柏宇快d好返,甘就可以去得成啦.

一早又去睇醫生

5月17日

昨晚12點幾先瞓,今早6點幾起身,呢幾日都持續日頭退燒,夜晚發燒,甘唔係辦法,於是今日一早去排隊睇醫生,醫生話佢由輕微感冒未好,加上有新既菌入左肚,所以咪唔退燒囉,唉...無言,佢都唔食野,唔瞓覺,咪無抵抗力囉,甘食極藥都唔會好啦,於是我要求醫生開d藥會眼瞓d,等佢瞓下休息下,我都可以抖下啦.仲開左d開胃藥俾佢,等佢有胃口食野,甘就快d好啦.不過最緊要都係柏宇合作,否則無人幫到佢架.

細舅父幫忙

5月15日

今日叫左細舅父出來幫手大清潔,之後去左食火鍋,可能冷氣太勁,柏宇又發燒啦,今次仲病得嚴重左,都係無小心照顧好柏宇,搞到佢病左甘耐都未好返,佢辛苦時我都瞓得唔好,快d好返啦,咪一齊辛苦咋.

柏宇又發燒

5月14日

今日仔仔又有少少燒,醫生話佢作感冒,只係好輕微,唔駛擔心,手足口病就好返晒啦.甘我都安心d,可能佢抵抗力差,咪成日病囉,希望快d好返啦,不過都決定唔俾佢返學住,因為學校既預防衛生要做到19號,所以都係休多一星期好d.費事返去又俾其他人傳染.

大抽根

5月10日

今日一起身已2邊盤骨位抽住痛,行又唔係,坐又唔係,結果都去唔到買餸,到夜晚沖涼,照鏡見到2邊大脾內側有幾處好似瘀左甘樣,仔細睇係好多微絲血管爆左,唔知點解會甘既呢.係咪就係因為甘樣所以影響抽根呢.

母親節

5月9日

今日係母親節,嫲嫲近中午打俾我地話過黎,甘我咪順便一齊去午餐囉,本來想返去同婆婆飲茶,不過我同柏宇都未完全好返,都係唔好去街啦.只係象徵式每人俾200元婆婆及嫲嫲買野食咋.無收入唯有慳d洗啦.
之後行左一陣商場,睇下有無咩for b女,結果無收獲,今晚去邊食都費,又無位,結果都係買左車仔麵回去食.經濟實惠.我仲教柏宇向我講母親節快樂,問佢愛唔愛媽咪,佢都識答愛.有個錫自己既囝都真係好開心架.早幾日我唔開心,佢仲識拎紙巾幫我抺眼淚,果刻真係好warm架,有呢個囝真好.抵我甘錫佢既.

最後雖然係電話講過,不過都想講多次:媽咪,我愛你呀!母親節快樂!

咀唇都起水泡(3歲3個月)

5月7日(39個月)

今早柏宇話我知,個咀咀好痛,原來咀唇都生左2個水泡,所以刷牙都要小心d.醫生話左等佢下星期返學前再去睇多次,証實無事先可返學.甘見佢甘痛,我都俾左少少雪榚佢食,呢個星期佢食既野都係凍晒先俾佢.費事佢痛上加痛啦.

小休一天

5月6日

昨晚超辛苦,因為食左藥都唔退燒,成日check住都係101度,又瞓唔到覺,半夜仲要起身去作嘔,真係好辛苦.
我幾驚傳俾柏宇,甘就大家一齊辛苦啦.所以今日晚餐都唔煮.叫外賣算啦.最近日日午餐都係食菜心肉絲通粉,好在個囝鐘意食,唔嫌悶,甘我都無甘頭痛.
到去左一次大大,可能痾左d菌出身黎,就退左燒啦.雖然仲係無咩力,成身都痛,不過無燒都叫做精神d.柏宇又好生性,知我病無扭計.甘我又無甘操勞啦.所以真係要好好照顧自己,一有病,小朋友就會受影響架啦.

到我發燒啦

5月5日

唔知係咪個囝好返好多,我就鬆一口氣,所以一放鬆即病,今日中午己覺成身痛,又好攰,下午已頂唔順要午睡,我2:30pm瞓,柏宇係我身邊玩,到4:00pm仲未瞓,結果要迫佢一齊瞓先得,真係睇少眼都唔得,到5點我瞓醒去探熱,唉.101度,真係中左招,我仲諗係咪手足口病呢,係就大件事啦,傳返俾個囝甘點算呀.即時通舍daddy放工回來後我就去睇醫生,好在醫生話只係普通感冒,不過要食3日藥,始終孕婦比較好得慢d.唯有乖乖聽話啦.

手足口病(第3日)

5月4日

昨日中午開始已沒發燒,今日食埋最後一日藥就等佢自己d水泡好返即可.總算安心d.
都係留係屋企抖下唔好去街安全d.

手足口病(第2日)

5月3日

昨晚平安無事,無再燒,甘我就安心瞓得淋啦,點知攰得滯,8點幾扎醒CHECK下,佢又燒返102.2度,唉,太過掉以輕心啦.即時又貼退熱貼,點知佢見我醒左,佢又唔瞓啦,甘就俾佢早D食少少野食藥啦,之後叫DADDY睇住佢,我去買D餸菜及蛋,睇下佢想食咩就煮咩啦.好在食左藥之後到傍晚都無再返燒,不過都唔好甘大意,留意佢好D,費事又瞓得太淋.今日中午仲幾好胃口,食晒一個烏冬,係食藥有D扭計,不過佢唔舒服扭計都正常既,千祈要俾D耐性,唔好鬧佢,氹佢多D,等佢舒服D,我都要儘量食多D瞓多D,因為我一病就無人照顧柏宇架啦,而且我仲陀住小B呢,更加要多D休息及營養,唔可以病架.

手足口病(第一天)

5月2日

昨晚成晚KEEP住同柏宇探熱,都KEEP住成102度,好熱.小朋友一病親真係做亞媽既都唔會瞓得淋,
我一早7點幾起左身諗住去紅磡排隊等開門,點知個囝唔見我,又喊,仲要我抱住佢瞓,成8點先瞓返,我即起身要出門啦,咪晏左好多人架啦,叫DADDY等陣帶佢來,咪唔駛等甘耐囉,醫生睇完話佢係手足口病,喉嚨有2個白點,話快則燒3日,慢則一星期,會燒下退下,可能會嘔添,佢想食咩就俾佢食,總之唔係凍野,熱氣野,朱古力就得,因為佢地喉嚨會好似火燒甘,唔想食野架,所以要儘量就下佢地啦.
甘佢食完第一次藥退左燒,之反不停瞓,都瞓左4個鐘,又燒返,又係102.2度,好在中午食左一碗通粉,之後食藥又瞓多4個鐘,又退左燒,成10點先食左4啖白粥,因為佢話個口好痛,唔想食野,不停要水飲,我都知佢好辛苦,所以都好就佢,今晚仲專登俾佢用盤沖涼,玩下水降溫.到成12點先再食左半隻蛋白,又食左半個飽,甘就瞓啦.
今晚都係要較定鬧鐘CHECK溫度先.

同太嫲慶祝生日

5月1日

今年提早左同太嫲食飯慶祝,因為要就假期麻.今晚我地四姐弟,婆婆,姑姑,太嫲共13人剛好一圍,去左富臨食,可能仲有一星期係母親節,所以多數食套餐,即使散叫都比平時貴左30%,不過我地都食得好開心,仲ORDER左一打大壽包,好好味,柏宇就一早瞓左覺,因為佢今日太攰啦.不過我地留左壽包俾佢做DINNER,點知返到屋企,佢食食下作嘔,又話好凍要著衫,甘我即刻同佢沖涼,之後一探,101.X度,發燒啦,甘夜唯有用住退熱貼先啦,明早一早去睇醫生啦.

小B照超聲波結構

4月30日

今日都好忙,先去NODDY度揀書,因為D書卷到期啦.之後趕唔切返屋企就直接去左QE照結構啦,
醫生好細心,一路照一路話我知係咩器官,有無問題,是否正常等等,最後仲話我個胎所有野都同現階段20週既SIZE好吻合,甘我都唔駛擔心佢過輕,仲話9成係虎女,好開心呀.因為婆婆同嫲嫲都鐘意女,甘生一個好字都好完滿啦.不過我知DADDY鐘意仔多D,但女都無問題,佢都一樣會甘錫既.我都要教柏宇多D錫妹妹先.

試整曲奇

4月29日

昨日用佩紅俾我既曲奇食譜試整,好難食,因為我加左可可粉,好苦.
今日PROMISE柏宇再整牛油曲奇接佢放學,於是同DADDY一齊送佢返學後,就出去買材料,返來即開工,好忙.因為怕唔夠時間呀.好在最終趕得切,仲整左3X塊拎去學校請老師校長嬸嬸食添,個個都話好香好脆,柏宇仲食得好開心添呀.之後仲整左D好大塊既心型曲奇,上面寫左名,留返SAT食飯時送俾各位媽媽既.

終於畢業啦

4月27日

今日終於讀完ERB既課餘托管導師証書課程,昨日佩紅整左曲奇及杞子桂花榚俾我地食,於是我昨晚都整左個大芝士蛋榚,今日每人一件.唔知佢地係俾面定真既,個個都話好味.
終於可以鬆一口氣啦,明天開始可以自己湊返個仔啦,慢慢教返佢先.

3歲2個月(38個月)

4月7日

今日係柏宇3歲2個月(38個月),我發覺佢每逢7號都特別扭計,唔知係咪我自己心多呢.定係真有其事,總之就俾佢激c,成日不停喊,不停扭,點氹都唔得,不過剛放左甘多日假,今日第一日返學,我諗大部份小朋友都會扭計掛.
真係想keep住高eq對佢都唔得架.依家我上完堂,都會儘量活學活用,了解下佢既需求,幫佢自己試下解決問題,唔好甘依賴.等佢獨立d.

兒童節

4月4日

今日係兒童節,我叫daddy暫停一日唔溫書,同柏宇一齊去行街買玩具,柏宇好想買部玩具汽水機,但行過好多地方都無,所以daddy最後買左架港鐵俾佢,叫做有禮物收啦.不過佢依然念念不忘,我唯有下次上網買野時一齊買俾佢啦.今日行文具店都好驚險,因為突然有隻老鼠周店跑,嚇到我即走,又驚佢咬到亞囝,依家d老鼠都好似唔怕人甘,真係幾恐怖.

復活蛋設計比賽冠軍

4月1日

今日我要返全日學,所以交俾嫲嫲湊放學,我見到柏宇贏左今次既復活蛋設計比賽冠軍,有一張証書,仲有2隻magic egg,係每日淋水會開花既蛋,好開心.唔係因為得獎,呢次係我地一家三口都有份參與既,不過柏宇仲細,可以參與既野係好少,但過程我地係好開心既,好期待下次既親子活動.可以增進一家人既感情.

15週摸到bb個頭啦

3月27日

今日要返學校開會,仲要幫全校既復活蛋俾分,本來可以幫手做義工,不過校長及老師話我有左bb,唔係太方便,驚d小朋友會撞到我,所以無野俾到我做.甘都無辦法啦.我同老師講.唯有真係佢地無人幫手時,先搵我做後備啦.
另外今日返左婆婆家食雞酒,可以去風架.我今早瞓殲feel到左邊bb頭仔頂起左,因為size問題,好肯定唔係頭仔就係patpat仔.因為頂起左都有成個網球甘大架.我仲以為自己發夢添.因為今日剛好15週咋.會唔會快左d呢.

忙碌夜

3月25日

今日我地怱怱食完晚飯,就準備開工一齊整復活蛋,因為柏宇最遲明天早上就要交回學校比賽,爸爸用左彩色紙條整左一個花籃,用膠蛋殼整左隻兔仔,我就幫手將5隻發泡膠蛋貼彩紙及裝飾,柏宇就幫手將d碎紙放入籃,及幫我揀顏色整蛋蛋,總之三個分工合作,都做左成3個鐘意,柏宇見到都話好靚,好開心.我諗今晚實會好好瞓姐.

2個覆診

3月22日

終於等到今日去產檢見醫生啦.聽到bb既心跳,都放心d,仲約埋下月尾照結構.到時應知係仔定女.
另外今日中午就接柏宇放學,因為今日去照心臟超聲波,佢今日好叻仔,玩彈波波時,中左2件小禮物,仲可免費玩多次,1蚊真超值.去到醫院都好叻仔,乖乖俾醫生check,係最後有少少驚,結果順行照完無事,心既小孔己埋口,唔駛再覆診,醫生仲請柏宇食餅餅添.可能真係攰得滯,差不多落車已呆晒,問佢媽咪抱好無,佢好完之後,轉頭己係我膊頭瞓左啦.甘都好既,即係佢都習慣學校生活啦.

p/s: 今日設醫院check有104.5lbs

嘟嘟28

3月21日

今日終於可以帶柏宇去公園玩啦,仲第一次同佢去食壽司,我叫左一碗烏冬,佢食晒,又叫左2碟炸蝦壽司,共6件,佢唔食d蝦,一個人都食左4件.又幾何見佢食甘多野架.我就只食左一碗燉蛋,一件壽司加佢唔食既蝦.佢仲食得多過我,不過呢個係我最想見到既.2個鐘後,我肚餓要買飽食,佢又要食,食完仲要食餅,嘩,唔通佢係企鵝,儲定d野食過冬.由於d烏冬同蛋都甘滑,我為左氹佢食,改左佢地叫嘟嘟1號同埋嘟嘟2號,不過柏宇係都要叫烏冬做嘟嘟28,甘佢鐘意又食得開心就由佢啦.今晚我教柏宇睇書畫蘋果,佢都不知幾開心,以後每晚教佢畫一樣,增進母子感情先.

三兄弟有交流

3月20日

今日都係返左屯門,柏宇仲拎左3架巴士,話一人玩一架,佢都幾大方,佢地三兄弟係地下鬥快推車,玩到卡卡笑,我地見到佢地有交流都好開心.雖然難免會有爭吵,不過係小朋友既成長中必經既.三個之中,柏宇最曳,成日出手推人,又叫人行開,好無禮貌.教極都係甘,真係要強化佢既禮儀先得.

狠狠地打

3月19日

今日放學柏宇話要上嫲嫲度,我剛去完買麵同生果,仲要拎被,真係唔多想去,不過見佢要求,就下佢啦
上到去原來爺爺都係度,柏宇玩玩下掉晒d玩具,甘我就話掉左就唔要架啦.之後收埋佢既.佢就大發脾氣,仲用腳踢我,我嬲得滯就打佢大脾,點知爺爺又肉赤,叫我唔好打,個衰仔平時都唔會甘過份,可能見有人幫佢,佢不停踢我,甘我忍唔住再打佢大脾,仲趕左佢出街,佢一出門口就即要走返入來,甘佢唔走就我走啦,再對住佢桟我動胎氣.佢見我出左去,佢就隔住鐵閘狂喊,話要媽咪,我都唔理佢,其實呢件事如果發生係自己屋企,佢俾我鬧幾句,之後唔理佢,就會無事,係因為有其他人係度,佢先至會甘癲,我亦先至忍唔住把火,因為我好憎教仔時有人爭佢,甘樣係會寵壞佢,我要佢知咩係啱同錯,唔係次次打完人講sorry就當無事.不過老人家一見個孫喊就會唔捨得.真係有d頭痛.後來嫲嫲叫佢出來道歉,佢仲因為掛住喊賴濕晒條褲添.真係無佢收,你估打佢我唔肉痛架.不過有時錫要係心錫,錯就真係要紏正佢架.

整損下巴

3月15日

今日放學老師話柏宇係操場玩時同另一個同學撞倒,跌親整損下巴,仲喊住同老師講添,不過只係擦損少少,無咩事.係學校實會發生架啦,等佢學下點樣保護自己囉.

又黎攤位遊戲

3月14日

今日daddy都係去左溫書,甘我唔想星期日都困柏宇係屋企,於是決定同去出街食野去公園玩.
點知公園仲未維修完,所以我地食完野去左海心公園玩左成個鐘,走時見到隔離球場有攤位遊戲,柏宇話想去睇下,因為佢想要汽球,可惜人地己經派完啦.結果我都同佢玩左成個鐘,拎左一d小文具,一連2日甘玩,都幾攰架.
不過見佢甘開心,都值得既.今日柏宇叫我做寶寶媽咪,好開心呀.

好耐無玩既攤位遊戲

3月13日

今日daddy去溫書,我就帶柏宇返婆婆度,甘啱佢樓下有攤位遊戲玩,我地以前細個成日玩架.但柏宇好似未玩過,
於是我同婆婆就帶佢地3個小朋友去玩,嘩...排好長龍,我地排左1個鐘先玩到2個遊戲,不過都係我玩既多,因為小朋友都係志在份禮物既姐.今次既主辦單位都好大方下,份份禮物都好大份,我地玩左2個攤位,已經攞左7份禮物,其中5份都係好大份既.3個小朋友都唔願再排啦,因為要趕返去拆禮物玩呀.今次真係辛苦晒我同婆婆呀.又要抱住佢地,又要拎甘多份大大份禮物.你地3隻小鬼如果日後唔好好錫婆婆/嫲嫲,就真係要打pat pat呀.
我自己都係第一次同柏宇去玩攤位遊戲,我湊一個都甘辛苦,真係難為婆婆以前湊住我地甘多個去玩呀.
係度要講句:婆婆,你好偉大呀.總之日後我有好日子過,一定唔會少左婆婆個份既.
唔知婆婆睇完會唁會覺得好肉麻呢...*~*

匿係屋企

3月12日

今日柏宇學校教師培訓日,所以放假一天,我地匿係屋企成日,連餸都係daddy放工買返黎,認真好鬼歎.
不過唔知呢d日子可以維持幾耐呢.

同婆婆去街街

3月11日

今日約左婆婆去尖沙咀行街飲茶.過d清閒既生活.仲去左sogo supermarket shopping
買左唔少零食,好快就要各自返屋企湊仔.有少少唔捨得添.唔緊要,過2日再見啦.

成功係學校去尿尿啦

3月9日

老師今日放學同我講,話柏宇今日好叻,因為佢無整濕褲仔,仲去左3次尿尿.
甘我都放心d,因為成日忍,對身體唔好架.我地又唔知佢邊度唔舒服,佢依家肯去,起碼係一個好開始.
慢慢再俾佢適應去埋大便,甘我就安心啦.

第一次家長日

3月8日

終於到啦,今日約左4:45-5:00pm見家長,去了解柏宇N1返學呢半年既進度.
上手家長見遲左,所以我要成5點才有得見,羅老師知我有左bb,佢都專登去拎張高椅俾我坐,我地仲傾左成40分鐘,真係唔好意思.總括老師俾柏宇既評價都好中肯.讚多過彈.只係要訓練柏宇要多d講野去表達自己既要求,感受及情緒.同埋認生字要加強訓練.其他大致上都ok.係比較細膽d,不過絕對係一個遵守紀錄既好學生.
期待下學期會有改善啦.

3歲又一個月(37個月)

3月7日

今日柏宇3歲又一個月(37個月).越來越古靈精怪.不過都有可愛既一面.
好快就有bb陪柏宇玩啦,唔知到時可唔可以做到平衡,唔好忽略左柏宇呢.
因為佢都幾自我中心,要人人以佢為主架.

好味既湯

3月6日

今日輪到我去婆婆度,今日婆婆煲左節瓜瑤柱豬骨湯,每人得一碗咋,果真好好味,手慢d都無呀.
夜晚daddy就入來食飯,今日剛剛好陀住小b3個月,個人定左,野都食多左,食完飯,仲叫碗粉,再食埋炸兩,好滿足.係衰在回程時個司機開車太差,搞到我一落車就嘔返出來.嘥晒.

多個人時間過得快d架

3月5日

今日婆婆出來探我,約埋奶奶去飲茶.之後我同婆婆回家打機及傾計,平時得我一個人,好悶,今日多左婆婆陪我,時間就過得好快,好似黎左無耐,轉頭就要走,不過都仲有時間陪我食埋lunch,可能有人陪,我仲食左好多添.
期待婆婆下次再出來.

扮野最叻

3月4日

今早柏宇返學時玩口水,我就問邊個小朋決玩口水呀.起初佢即時用手遮住個咀,之後我再問多次邊個玩口水呀.佢竟然扮傻係度將個頭左擰右擰,之後話"邊個邊個邊個",呢個豬仔都唔知係邊度學埋d古惑野,十足daddy一樣.
真係無佢乎.

決心戒片

3月1日

今早開始唔俾著片返學,只可以瞓覺才著.柏宇都好合作,不過就成日都唔去廁所,放學行去買野,點知我野就買唔到,俾佢買左套玩具,又俾佢打劫成功.不過我講明要用10個貼紙換禮物架.所以佢要乖乖坐廁所.否則無得獎貼紙.
另外今早返學校食早餐,老師只安排柏宇坐在飯枱,等左成7分鐘都無俾佢食,仲有幾分鐘就收早餐,結果我提老師才知柏宇未食早餐,就馬上俾佢食,唉,走左一個老師真係搞到好煩.好在我一向習慣係唔會即時走,否則個囝今早就要餓住個肚上堂啦.我都要教定柏宇自己出聲同老師講,因為唔夠人手,老師真係理唔到甘多小朋友架.幾大都要保障左自己先啦.

好無聊既daddy

2月28日

今日joyce姐姐&邦哥哥來拜年,約左一齊食lunch,之後大家傾緊佢地新屋裝修既野,daddy就話想即時入去佢新屋睇下,結果我地食完lunch就坐車入屯門,之後去睇完就坐車返屋企,你話我地係咪好無聊呀.
今晚我地應承左同柏宇去高山劇場睇元宵花燈,我地9點幾先去,都好多人呀.柏宇直情想伸手去摸d花燈,我地仲買左爆谷一路行一路食,果真係有其母必有其子,一樣甘為食.

柏宇大豐收

2月27日

由於就我既關係,今年美玲姨婆改左來我附近食飯拜年,甘當然仲有婆婆,細舅父,姑姑啦,多人d開心d,原來之前美玲姨婆去左日本旅行,買左好多野俾幾個小朋友,除左餅乾,糖果,朱古力,仲有thomas車車同thomas錶,開心到原來想瞓既柏宇,都玩到癲晒.成晚要痴住嘉盈姐姐玩,又要坐威姨公既車,唔捨得走,當晚半夜就即時喊,好在好快就無事,否則都唔駛瞓啦.

暈得好勁

2月26日

今早送左柏宇返學,之後買完餸,買埋新既內衣準備走時,已覺得有少少暈,甘我即時行快2步返屋企,點知除左加深左暈既感覺,仲不停標汗,耳鳴,前面既野全部多左一層霧,胸口對落既位置仲不停跳,抖氣好辛苦,於是我唯有企埋一邊不停深呼吸,等無甘辛苦先再行返去,可能我昨晚瞓得唔好,又加上我買得太多餸,2隻手都拎滿晒.所以先會甘辛苦,返到屋企第一時間上床休息,咩都唔理,瞓左1.5小時就好d,不過仲有少少星星囉,以後出街真係唔好拎太重,費事自己危險.

再整麵粉公仔

2月25日

昨日老師沒有幫我帶柏宇去整麵粉公仔,加上老師知我有左bb,唔想我甘操勞,於是今日唔駛我幫手做義工,甘我就放學同柏宇去整多次麵粉公仔,今次本來想整黃色狗仔,結果整左隻黃色鴨仔,柏宇都好鐘意,我仲同佢去印左個福字,之後拎返屋企貼係門口,甘咪可以日日都見到囉.佢今日玩得好開心,無得做義工,但可以陪到柏宇玩,我覺得好值得呀.

義工

2月24日

今日下午收到學校電話,以為柏宇有事,原來係吳老師想搵我幫手今日做攤位義工,因為有個家長有事,要搵人代.
甘我都ok既,係要麻煩老師幫忙帶柏宇去整個麵粉公仔.因為我昨日應承左佢架.甘老師無問題,我都ok,因為我都想為柏宇,為學校做d野.遲下生左就未必會有時間可以幫到手架啦.好好珍惜時間呀.

攤位遊戲

2月23日

今日學校一連三日,係放學時間有攤位遊戲玩,共有6款,我只同柏宇玩左整大吉同埋整麵粉公仔,真係好難整架.
整左好耐先完成,本來整隻狗,點知個個見到都話似兔仔.呢個媽咪真係無咩天份呀.不過柏宇就好鐘意,愛不釋手.可惜d麵粉太濕,一路行一路溶,柏宇唔捨得掉,於是我答應明日再同佢整多一隻.日後可以買d泥膠俾佢試下玩.等佢接觸多d唔同既野.

初九返學啦

2月22日

今日柏宇放完年假返學,都好乖,無扭計,老師都讚佢叻,今日學校為左俾小朋友有新年氣氛,可以唔駛著校服返學,我幫柏宇著左件紅色衫,今日仲有捐利是活動,我地都各捐左一封.當係支持下學校啦.

初八大出血

2月21日

今日係最後一日假期,我地一家四口去左行街,daddy就買左鞋及褲,我就買左樽即食燕窩,打算同柏宇一齊食,睇下係咪可以開胃d,都好貴,成600蚊食一個月,不過daddy話如果食得好,叫我keep住食喎.甘我都想柏宇食多d野既.試下無妨.我地今晚去左潮樓食飯,叫左3個餸,結果有2個餸要打包,因為成5點幾先去食左撈麵,太飽啦.
留返明晚再食,唔好晒野.

初七人日生日快樂

2月20日

今日一早叫左奶奶來幫手睇住柏宇,因為我要返醫院抽血,昨晚專登好夜先俾柏宇瞓,甘今日佢咪會好晏先起身,奶奶就唔駛點理佢啦.不過今早約左9點,最後要聽講座,搞到10:45am先走得,仲要成朝無食野,真係嘔到傻.
醫生本來排左4月12日覆診,但睇返之前一胎既case,最後提早左3月22日就要返去,20週既超聲波就要另外搵醫生跟進,唔知到時有無得照呢,如果無得照,我都唔會俾錢出去照啦,慳d麻.反正仔女都係自己生既.無咩所謂啦.

p/s:今晚係樓下食左餐好美味既韓燒,佢d牛肋骨十分好味,不過好貴,只有2條牛肋骨+1碟豬肉+1個石頭鍋飯+6個餐前小食+2碗羅白牛肉湯,都要$198及加一收費.柏宇食左2件壽司卷就攰到瞓左啦.呢個套餐剛好夠食咋.
不過有機會我一家要去再食,因為真係好好味架.

初三去大嫂家

2月16日

今早頂唔順,去左搵醫生睇,因為病得好辛苦,好在亞囝睇開既醫生有開,食左藥好左d,於是去左大嫂家拜年,
今日好凍,得9度,佢地新界仲凍,真係著幾多都唔掂呀.今日仲拎左好多點心及零食入去,因為我只鐘意買,唔鐘意食,以後買之前真係要三思,唔食唔好買,慳返d錢好過.我發覺柏宇成日跟柏言講野,即使唔明白意思,佢都學得好快,所綻daddy話柏宇好聰明囉,今晚我地食完飯又係坐的士返家.好似每逢過年都係以的士作為主要既交通工具.如果有得揀,我寧可將d的士錢食左佢好過啦.

初二全家病

2月15日

今日返左去同公公婆婆拜年,晚上去左黃金海岸食dinner buffut.不過今晚有d可惜,因為daddy佢唔多舒服,佢話好似有少少發燒,而我就頭痛,喉痛,不停留鼻水,成個人都無晒精神,柏宇就只有少少咳,不過由於我同daddy都唔舒服,唔係幾食到野,連帶柏宇都食少左,無人陪佢食麻.成晚最開心係d小朋友出去台到跳舞,3個豆丁直情想拆左人地個台,玩到唔願走,我地唔想柏宇無得玩,所以唔舒服都同daddy輪流帶佢出去跳舞,等佢同表哥表弟一齊開心下,交流下.最後玩到散場就坐的士返九龍,真係好豪呀.不過唔舒服,都係早d返去好d.希望快d好返啦.

年初一

2月14日

今日一早去左契婆家拜年,之後去左太嫲家拜年,今日天氣都ok,無咩落雨,只係有少少凍,今日都專登著左一早買左既連衣裙,再襯紫色襪褲,本來著平底鞋,不過亞邦話唔好睇,唯有著左對早前買落有少少踭既boot啦,仲以為今年無得著添,因為有左bb,唔好著有踭鞋麻.甘依家老公批准,我無有怕啦.佢仲讚我今日靚添,連太嫲都話我平日唔打扮,今日著得好靚,甘多人讚,甘即係真係靚啦.夜晚係奶奶屋企食完飯,老公仲親自幫我除鞋著鞋添,諗極都唔明點解甘好服侍,終於忍唔住問佢,佢竟然話驚我辛苦喎,吓,我第一胎夠辛苦囉,又唔見有d甘既待遇.平時都係自己著架啦,真係唔明d男人諗咩架.唔通今日靚得滯,佢嚇到傻左?

祝各位新年快樂,身體健康,心想事成.日日都笑口常開.

行花市

2月12日

今日係年廿九,我地去左維園行花市,吹左半個鐘頭風等巴士,真係好凍呀.不過daddy想帶柏宇去行下街,就無所謂啦,去行一陣,本來以為甘凍會無咩人,點知係好多人架,不過多人得黎係暖和左既,我地今晚只係買左一條老虎頸巾俾柏宇,仲買左一餅雞蛋仔及一支檸茶,我相信全晚最好生意一定係小食,因為甘凍既天氣,個個都會買野食架.今晚只係臨走時有少少雨粉,都叫做幾好天氣啦.

2母子去快活

2月10日

今日本來打算自己去幫DADDY買衫,後來想瞓晏瞓,於是就等埋柏宇放學,換左衫就一齊先去,順便食埋晚飯,又可以懶下唔駛煮啦.今晚我地2個去左和民食,印象中係第一次2母子去呢度食飯,我地叫左一碗拉麵,一碗烏冬,都食唔晒.最後仲俾柏宇自己叫左個朱古力雪榚,佢一路食一路話唔好味,甘我整古佢話不如媽咪食左佢啦,佢又唔俾.
結果佢飽到一路食一路痾BOO BOO,仲要唔認痾左,好在我個鼻靈敏姐.之後行左一陣就返屋企啦.甘樣出一出去都用左3個鐘,真係好龜速呀.不過我都好ENJOY同柏宇2個甘自由甘行街街食野,無左DADDY係度說教,個氣氛都舒服D既.

小b無事

2月9日

從上次流血後,終於等到今日返去照陰超,就知道小b仲係咪到,原來等待真係好難捱架.
甘多日係唯有嘔同暈,去俾我意識小b仲生存緊.今日一照,見到有心跳,當堂定晒.醫生仲話我用最後經期去計都算準確,今日係8週3日,甘即係話小b既增長正常啦,只要過左3個月,就會穩架啦,所以我自己都要小心過埋呢個月先得,因為生埋呢胎我收工架啦.得閒我會瞓多d食多d,唔好要身邊既人擔心.

P/S: 昨晚出外打邊爐,第一次俾柏宇一齊參與,佢好開心甘成日去'畢'個鍋入面既野食,我就俾條生既菜佢自己去碌,之後自己'畢'返來食,同佢講全部係佢自己煮既,自己食返會好味D.到佢食飽左,就不停'畢'俾我,一等我食完佢就即'畢',十分開心,到最尾佢一次過'畢'左好多俾我,甘我放入口咬爛都要時間架,佢就話"媽咪,你快D食啦,唔好含住呀"個衰仔真係平日聽埋聽埋我話佢既說話,倒返轉用來話我,一時唔偷雞就做保長.都唔知好嬲定好笑.

柏宇3歲生日快樂(36個月大)

2月7日

今日天氣十分差,狂風大雨,今日我地要去嫲嫲家團年,當埋幫柏宇慶祝生日,我地一早訂左個一磅什果蛋榚,
仲寫埋pakyu happy birthday,由於不太方便,所以今次無整糖水啦.到下午時份,大伯佢地一家話唔來食飯了,因為大伯唔舒服,甘只有我地一家,爺爺嫲嫲,三叔,表姑媽,今晚好多餸,但柏宇只食2啖飯就話飽啦,
好在都飲左半碗湯,到食生日蛋榚時,佢就好開心甘跳高拍手,話好開心,仲話要食蛋榚及士多啤梨,真係俾佢激c,食飯就話飽,但又可以食得落蛋榚,結果佢自己食左2件蛋榚呀.走時仲識逐個say goodbye,又叫人地等埋佢,氹到個個都好開心.晚上回家同佢講,話daddy mammy祝佢生日快樂,身體健康,日日都開開心心,點知佢又識同人講返出來,話我生日快樂,我身體健康,俾佢笑c.希望佢大個囝,唔好成日扭計,聽教聽話啦.

預祝柏宇生日及團年飯

2月6日

今日約左婆婆一家,姨媽一家,舅父一家,太嫲,姑姑一齊去左竹園食晚飯,當係預祝柏宇生日及團年飯,本來我plan好左係屋企搞大食會,自己整蛋榚,但因為小b陀得唔太穩,所以決定出去食算啦,生日蛋榚日後可以再整俾柏宇都得.今晚終於將喜訊告知眾人,雖然食物麻麻,但大家都係盡興既.
daddy今日仲專登去買左2架迷你巴士俾柏宇做生日禮物添,佢就成日車不離手,好在仲肯借俾表哥玩,都算係甘架啦.

pizza

2月2日

今晚突然心血來潮,去左嫲嫲家,一齊叫左pizza食,柏宇可能好少食,自己食晒一件大批,仲要食多少少,又食左1/3碗飯,結果一邊食一邊痾,d大便仲要多到漏出條片,好誇張.真係唔知飽,不過間中食一次,又真係幾好味既.我自己都食左2件半呀,今晚實唔會餓醒姐.
另外今晚叫左柏宇幫手包利是,等佢一齊參與,分享過年既喜悅.

太耐無返學,又扭過

2月1日

休左6日後,首日返學,又黎發脾氣,唔著校服,唔洗面,一味扭計,結果想坐的士返去食早餐都唔得,唯有買個飽抱住佢食囉.真係放親長假都唔掂.

超開心既一日

1月31日

今日daddy同柏宇去左公園玩,由於我唔太方便,我只係企埋一邊睇,佢2囝爺玩左一陣,daddy話帶柏宇去買雪榚,個衰仔就甘同daddy跑左去小食部,仲同我揮手say goodbye,之後2個坐埋一邊食雪榚,仲買左個兒童足球一齊踢,柏宇係超級開心架.我就坐埋一邊休息.不過,睇住佢地玩得甘開心,我都好開心,因為男仔始終痴daddy好過痴mummy,甘我又可以多返d私人時間呢.

唱國語歌

1月29日

今日柏宇無返學,佢晚上飯後突然唱左首歌,我都唔知佢唱咩,到最後一句,佢指住耳仔講左國語,我先知原來佢唱緊國語歌,最後一句係拍拍手手摸摸耳,一路做一路唱,問佢係咪老師教,佢話係,叫佢唱多次又唔肯.不過甘細個唱國語又真係幾得意既.

決定呢個星期唔返學

1月26日

今早柏宇咳得好勁,於是決定呢個星期唔返學,係屋企休息,甘我亦唔駛又上又落帶佢返學,佢瞓我又瞓,一齊休息.嫲嫲今日陪柏宇睇完醫生,仲陪我地買埋餸,送埋我地返屋企佢先走,今日都瞓左4個鐘晏覺,晚餐就daddy買返來一齊食,希望唔好太過操勞啦.

宮外孕???

1月25日

今日帶左個囝返學,就去左qe睇急症,由早上10點到達,等到11點幾先入到去,仲要等婦科醫生,因為實在太多急症啦,結果1點先check完,首先第一個女醫生話做陰道檢查睇唔到個胎,於是叫左個高級既醫生再做多次,都係check唔到,於是要我即時入院,去婦產科再做,問佢先講話可能係宮外孕,再問佢就話,如果係要即時開刀做手術,個刻覺得好無助,唔知點算,結果我好快決定左即入院,都唔敢同屋企人講,怕佢地擔心,上到房又做多次陰道檢查,之後就一路吊住鹽水,一路推左我去病床,都唔知要等到幾時先可以做超聲波,終於4點等到啦,今次有2個醫生,我已講明上來已做左陰道檢查,點知佢話都要做多一次,做做下又係話睇得唔清楚,要搵個高級既黎睇,好在個醫生剛好係門口,否則又要再做多次,因為都幾痛架,結果係話因為得6週,個胎囊得4mm,好細,但就確定係子宮裡面,唔係宮外孕.不過搵唔到原因點解會流血.佢問我留唔留一晚觀察,我就唔留啦,我想返去陪柏宇,4:30做晒所有檢查,6點先通知我走得,成日都未食過野,好在5:30有晚餐,醫生嬸嬸都俾左份我,今晚有白烚菜心,洋葱豬柳,我差不多食晒,醫生建議多瞓床,無藥俾我食,只係要2星期後再入院check下個胎仲係咪到,其間如果大量出血或有組織流出,即返去睇急症,唉,一齊隨緣啦.如果個bb唔想跟我地既,甘佢要走,我都留佢唔到架,所以我同daddy講左,如果呢胎保唔住,我唔會再生,只會日後照顧好柏宇就得啦.反正我己有一個小朋友,唔好強求.

又見紅啦

1月24日

今日中午同柏宇去公園玩時,大嫂打電話叫我地入去打邊爐,到左晚上9點,打算去埋廁所就走,點知又見紅,今次仲係比上次多,於是決定明天一早去睇急証,希望個胎無事啦.

老友探望

1月23日

今日joyce黎探我地,因為佢記得柏宇生日,專登買左份禮物俾佢,係一個thomas既鉛筆刨,點知柏宇當左佢係車車甘推,希望係佢識用之前未爛啦.

見紅

1月22日

今日見有少少紅,不過唔多,所以無理會,只係食完西藥,去唔到廁所姐,都要飲多d水先得.

驗孕

1月20日

今日見有d傷風,去左睇家庭醫生,順便驗孕,真係有左個多月,第一個即時話俾婆婆知,點知婆婆既反應係唔好玩啦,講笑咋,可能真係好突然,佢先有甘既反應,之後話俾daddy知,佢就好開心,話俾嫲嫲知,佢既反應係:吓,又有左,我即時話,第二胎姐,咩又有左姐.之後嫲嫲話,如果生女就話姐,又生仔既,唉,不過佢地個家族都旺生仔架啦.我亞媽同奶奶都想係女,我就無咩所謂,生埋呢胎就夠啦.柏宇又可以多個伴呢.

辭工唔做啦

1月19日

今日我同個日本太太講左唔做啦.因為都好辛苦,太趕啦,個囝又要甘早起身,我今早都係坐的士返學,
大家都唔駛趕得甘急,點知我辭完職,佢就即時同佢先生講,佢先生就即時同佢秘書講,佢秘書就即時打俾我問點解,好搞笑.我又要再解釋多一次.唔通我英文真係甘差咩.

貴既好味d

1月18日

因為之前懶行,去左超市買豆腐黎滾魚湯,d豆腐滾完都仲好滑架,連平時唔食既柏宇都爭住食,不過價錢就貴幾倍.成7元/舊.都幾貴,但今次無嘥野,成舊俾我同柏宇瓜分晒啦.甘都值得啦.
都要諗下下次仲買唔買好呢?

好耐無去公園

1月17日

今日我地邊度都唔去,因為要去超市入貨,之後又要去公園玩,老帥話去多d公園可以刺激柏宇既前庭覺,甘樣對平衡都好d,之後仲要去同佢剪頭髮.今次好抵,佢收我30元咋,甘就過左一日啦.

最後一堂playgroup

1月16日

今早同d朋友飲完茶,去返最後一堂pg,我地今日一早到左,行街見到有一套做家務既玩具,就買左俾柏宇,
一來可以教佢做家務,二來d刷有唔同既質地,可以刺激下佢d感覺.柏宇好鐘意套玩具,去邊都要拎住,
今日柏宇叫做幾定,肯坐低聽故事,最開心就係唱abc 歌,唱得好大聲添.
之後我地約左daddy去行街買cd機,之前婆婆俾我地個部壞左啦.柏宇無得聽歌歌,
原來平野都係差d,返去就壞左啦,daddy仲要專登出返去換貨,唉,下次真係唔好貪平啦.免得因小失大.

想食埋個魚頭

1月15日

今晚煎蒼魚,我同柏宇食一半,留一半俾daddy,點知柏宇唔夠食,想食埋個魚頭及魚尾,唔睇住佢,就差d咬爛條魚尾啦.平時蒸魚就唔食,一見係香口野就搶住食.
到daddy返來食飯,食剩既餱,又俾我地2個大食豬分埋囉.真係一d都唔嘥野.

煎釀三寶及紙包骨

1月14日

今日搞搞新煮意,整左煎釀三寶及紙包骨,用個新炸鍋去炸,點知炸半斤紙包骨(8舊),半條茄瓜,半個青椒,半件豆腐,都炸左2個鐘,超級超級慢,有d火火地添.因為我仲要趕去接仔呀.
好趕甘去接完囝囝就放低d野食俾嫲嫲,因為我同佢既份量一樣,佢個份炸左2個鐘,我諗我個份都要差唔多時間,
結果當晚8點先有飯食.daddy既評論:紙包骨賣相ok.味道淡左d,好滯.煎釀三寶既青椒好好味,好甜,茄瓜就炸得over左,d皮好"un",豆腐ok,囝囝就好鐘意食豆腐啦.我自己就最愛食茄子.
總括我係唔會係柏宇生日會整既,因為太花時間啦.

m記早餐

1月13日

嫲嫲昨日話應承左今早同柏宇去m記食早餐,所以今日都要好早起身,點知去到嫲嫲自己又唔食,我唔理佢,叫左杯奶茶及漢堡飽俾佢,我同柏字就食芝士通心粉.飲熱朱古力.我覺得大家一齊食先開心,否則我寧可唔去.
結果嫲嫲仲將我地食唔晒既野全掃光添,因為佢係一個唔浪費既人.

"我好開心呀"

1月11日

今日柏宇終於肯俾daddy,mammy一齊陪佢瞓,佢瞓中間,仲話好掛住我地,之後面叺向枕頭,兩隻手各攬住我地條頸,話好開心呀,可以同daddy,mammy一齊瞓.我同daddy聽到都好開心呀.呢個豬仔真係氹c人呀

好甜既晚餐

1月3日

今晚整左粟米腸仔帶子意粉,木瓜魚湯,俾湯柏宇飲,佢話唔要,氹佢聞下先啦.話唔聞,好辛苦氹佢飲左一啖,佢話好味,要再添飲,俾佢激c.之後食意粉,我話媽咪專登加粟米炒架.因為知道柏宇鐘意食,佢即時义左粒帶子,話佢專登夾俾我食架.之後仲夾多件腸仔餵我食添,我同佢講多謝,佢笑得好開心,之後不停夾野俾我,真係人細鬼大,古靈精怪,呢餐飯我食得好心甜呀.

wing叔叔生日

1月2日

今日去左大埔同wing叔叔慶祝生日,往年都係daddy自己去,因為佢地去既地方唔啱小朋友去,所以我就同柏宇係屋企,但今次佢地係屋企bbq,所以3年來第一次見面,佢地都未見過柏宇架.
wing叔叔有2個女,大女好大方架,有野都分俾柏宇.柏宇今日唔知點解成日跌,戶內及戶外都跌幾次.
唔知係咪多小朋友,所以食得特別多野呢.柏宇中午在家食完lunch,去到人地家又食一個飽,晚飯又食左半碗飯+蛋,果真同姐姐食會食得開心d,成晚又玩到癲晒.最後仲玩到嘔,又要主動去攬住姐姐,好鬼sweet,最後差不多12點才走,柏宇攰到係車瞓左啦.由於玩得太癲,半夜發左2次惡夢,不停叫唔好,好在氹左一陣就瞓返,甘我都有覺好瞓.

新既一年,新既一天

1月1日

今日同左婆婆,細舅父,姨媽一家去長州,一去到就食魚蛋粉,我同柏宇夾份食左2碗添.之後去左海灘吹肥皂泡,好在婆婆一早準備,否則小朋友就無得玩啦.差不多到晚飯時間,我地見到有蛋撻出爐,即時買左3個,點知好味得滯,轉頭想再買都無晒囉.總括今日玩得好開心,間中去離島吸下新鮮空氣都唔錯架.

除夕夜

12月31日

唔講都唔記得今日係除夕,今日kelvin & mandy一齊去食飯,之後來我地家一齊倒數睇煙花.好耐無試過甘熱鬧啦.柏宇都睇到嘩嘩聲.甘就又過一年啦,時間真係過得好快.