創業(小試牛刀)

8月22日

今日8號風球,多了1天假期
但老公就要返工,所以得我自己湊仔仔
我今日訂左少少首飾架,又睇左d耳環,項鍊...都好靚,
各入左少少,同家姐一齊搞下生意仔,不過一邊湊仔一邊上網真係好辛苦
部機又成日hang,搞左成日先至俾晒錢,等收貨即可
成日都無咩陪過仔仔玩,唉.有望d生意可以ok啦,
甘過年quit左份工,到時再決定是否搵過份新工啦.
萬事起頭難,加油呀.一定得.

學識用杯飲水啦

8月20日

亞囝終於學識用杯飲水啦,一飲就成半杯,俾用飲管快好多,(如果肯飲的話)
回想之前學識用飲管時,又係好開心,因為俾用匙又飲快d.
一日一日長大,學得好快.真係大個囝啦.

我又失控啦

8月18日

昨日去左同太嫲飲茶,好多個月無見
佢地做左帛金俾亞婆,甘我去攞順便探下亞嫲
亞囝一見太嫲把遮就要攞,佢一向都好鐘意玩遮
姑姐就靜靜地出左去買把小童用既俾佢,
佢好鐘意,唔放手,個個都錫佢,我都好開心,
我地都坐左成3個鐘,之後要出去買葬禮穿之衣服
不過買唔到,之後再去買左箱奶粉,
可能太熱,又攰,之後唔再行啦,我地坐的士返屋企,再去奶奶家食飯
之前講過最近亞囝成日扭我抱,我手,肩都好痛,亞囝昨日只瞓左約1個鐘
已好攰,甘我即刻整飯俾佢食,點知佢要自己食
我唔俾,佢就一手推開我,D飯就倒瀉左,我就即時火都黎啦
就好大聲鬧佢,甘佢定晒, 奶奶就叫我唔好鬧佢啦
佢係扭眼瞓姐,我都知,不過當時真係控制唔到自己既情緒
之後飲湯佢又係甘,輪到佢老豆發火,結果因為我地2個湊仔意見分岐,
又嘈,不過奶奶叫我地唔好嘈啦,因為佢好唔開心.甘我咪收聲
得返佢自己一個繼續自言自語.返到家成10點,隻豬仔先瞓覺.
到今日下午先知原來谷M COME,所以個人先甘燥.
真係要訓練下EQ先得

亞囝好怕人

8月16日

由於亞婆去世了,姨媽一家來了香港,準備商量如何處理亞婆之身後事
亞囝一多人就瞓唔到,所以我12:30氹左佢瞓,佢瞓到2:30起身,
剛好全部人都在,佢一見多人就喊,只肯要我抱,真係去toilet都唔得
連老公,嫲嫲都唔跟,不停狂喊,最近這幾日都係甘,我都好心力交瘁.
結果出去走廊即時收聲唔喊,始終佢都怕甘多人.
最後等佢地全部走晒,我同亞囝先返入屋,佢至好似平時甘樣咋.
到6點佢地搞掂晒,叫我地落樓下食d野,之後我地去左jusco
晚餐食燒bbq,亞囝可能好多個鐘無瞓,
野都唔多食又扭計,大叫大喊,最後由爸爸抱左出去外面,
佢才安靜瞓覺.其實湊左甘耐,都大致知道佢脾性
佢一處於陌生既室內環境就會不安.明知要平心靜氣氹佢,
不過自己有時因為好多外在因素,結果成日都發左脾氣對佢.
唉...我eq真係好低呀.我都好想溫柔對個仔,又怕對佢好得滯,佢會恃寵而驕
惡得滯,又怕對佢心理有影響.原來做人亞媽好難架.

農曆七月十四

8月14日

今日是農曆七月十四,本來打算早點回家,

因為亞婆去左,怕奶奶會亂諗野,

所以決定食完飯陪多佢一陣才走

今日可能是正日,街上好多人燒元寶

因為小朋友及老人家最易見到DIRTY野

回家唔到10點,我地全家已瞓啦

點知今晚成晚醒, 仲要亞囝又成日喊一兩聲,

到近天光時份,亞囝狂喊收唔到聲,又唔俾我掂佢

抱佢,氹佢,全部唔得,惟有坐係度睇住佢喊

到佢自己收聲啦,見我瞓低佢又喊,我咪起身陪佢囉

終於都停左唔喊,返來我身邊瞓,唉...都唔知是否回家時見到人燒元寶

所以嚇親.七月節真是要小心.

發燒101度 + 亞娑去左啦

8月13日

話說昨日打完針,昨晚亞囝大叫大笑

到今早起身,佢個人熱熱地,同佢探熱成101度

唉...昨日我請左半日假,今日唔知要唔要請假,

即時通知奶奶話佢知亞囝發燒.奶奶即時去買竹庶煲俾囝囝飲

甘我就返工,諗住LUNCH回去同囝囝食藥,

點知12:30奶奶打來公司話我下午一定要請假

因為醫院打來叫奶奶今日下午4點去QE,

甘我即刻快手快腳做埋D野走人,

返到去,個仔都好扭計,因為未退燒,甘奶奶去完醫院後話

原來亞婆情況唔太好,要奶奶決定是否同亞婆做內臟既TEST

要明天覆,甘我地晚上大家商量後都決定唔做,

因為亞婆年紀大, 就算CHECK左是CANCEL都唔會同佢做手術啦

甘我地飯後就回家,因為亞邦感冒未好,我地已經沖好涼,

打算早D瞓,點知8:45分收到亞媽電話,話醫院打來話亞婆剛斷氣,現搶救中

甘由於亞囝發燒中,我無去,亞邦即坐的士接奶奶一同去醫院

大佬及大嫂剛探完亞婆去附近吃飯,仲有表姐同良仔都即趕去醫院

其實可能亞婆心願係想見下大佬,因為佢一向錫大佬,了左心願,咪去囉

因為我地去甘多次,亞婆都無講野,但最後大佬去探佢個次,佢走時又開口同大佬佢地講"走啦"

甘都好既,亞婆都83歲,又唔多郁,又食唔到野要揷喉,好辛苦,

早D去對佢來講係解脫.希望你安息啦亞婆

歲半返健康院

8月12日

今日約左同亞囝返健康院打針同埋做評估

因為講野好少,所以安排左2歲時再返去評估,無所謂啦

有人跟進都好呀

之後仲約左去私家醫生打肺炎針,原來歲半既4合1針係要打膊頭架

之後肺炎針就打大脾,同樣都是打左邊,喊到個傻豬.好可憐

醫生都話我好狼,因為俾個囝一次打甘多支針,

但沒有辦法,因為如果打完針係有反應,會發燒,我寧願佢病一次,

好過病兩次,因為除左亞囝辛苦,奶奶都我都會辛苦

我所有針都是在健康院打,慳左唔少,今次這枝HIV要打2枝

每枝830元,好貴,唉...鬼叫政府唔包咩,依家又甘多菌

遲D仲要打水痘針,其他我就再諗下打唔打先,

因為打針都會痛麻.唔想亞囝成日喊.

相識紀念日

8月10日



今日係我同老公既相識紀念日

我地識左11年啦

諗住係屋企煮餐飯慶祝下

早上我地去左漢寶飲茶,原來比樓下個2間酒樓抵好多

我地點左8樣點心,連茶錢埋單都係80元,d野仲好袋食過其他酒樓

開頭諗住打俾奶奶一齊飲茶,點知佢話我地知亞婆剛入急証,

於是我地諗住等亞婆settle好後就去睇佢,甘今日就唔煮啦

我地一家,奶奶,表姐6點到左QE,亞婆揷左胃喉.

可能有食物到肚影響,佢面色幾好,我地見佢全程合埋眼

但同佢講野都有少少反應,亞囝就係外面等

我地逗留到7點幾就去左明星酒樓食飯,

可能湊仔消耗體力大,我食左成1.5碗飯

奶奶要趕回家煮菜俾老爺食,所以佢食完就走先.

我地就帶埋表姐去港鐵站才坐巴士回家

學習廁所

8月9日

今日去左jusco買左個學習廁所俾亞囝,佢一手拎住左個小型的
不過好易倒到一地都係,到時就煩到嫲嫲啦
最終我買左一個可由下面拉出來清潔的,有蓋的,就算佢成個拎起都唔會倒到一屋都係麻
另外又買左一頂bb浴帽,唔知亞囝用唔用呢.
晚餐我地去左美心快餐食飯,我叫左個兒童餐,內有肉醬意粉,炸薯條,蜜糖雞翼,啫喱糖,
賣26元,都ok,亞囝食左好多粉呢.不過真係幾好食架.

又食pizza

8月8日

今日是奧運開幕,我要叫左pizza當晚餐
不過可能order多,要等2個鐘才有得食
好慘.餓親奶奶及亞囝,屋企得返一個小饅頭,我都將佢分左俾奶奶及亞囝,
其實我自己都好餓,不過無法啦.差唔多都9點才送到,
我地唔駛半個鐘就將d外賣掃晒啦.因為大家都好餓麻.嘻嘻

亞囝歲半啦

8月7日

囝囝今日歲半啦,今日無咩同佢特別慶祝,都是在家吃飯
不過我就叫定爸爸今晚同佢影相,因為過往爸爸都成日唔記得係囝囝每月7號同佢影相留念
今次一早講定,希望留個美好回憶

又食buffut啦

8月7日

今日lunch食buffut
去左紅磡海逸酒店食,我地有8折,每位都要198元,好貴呀
今次去我食得特別開心,因為lily同我一齊坐,我無甘悶,
仲食多左,我都食左3轉,再加豆花,楊枝甘露,仲有水果呢
今次真係多謝廖生甘客氣,不過都要多謝馬生大手筆,廖生又要慷慨先得
我仲攞左紅'早'雪耳煲雞湯,同燒牛仔骨俾老闆,佢都食得好開心.
可能d人會覺我我擦鞋,不過都要老闆受先得架.
我只是平常心對待老人家.好心有好報的.

又打風啦

8月6日

今日凌晨4:45,老公手提嚮,都知唔慌好野
原來宣佈5:45會掛8號風球,老公要即時起身返工
我好唔鐘意打風,因為老公要返工,好鬼危險
我同亞囝瞓到成9點先起身
下午又瞓,我就2點起身,即煮茄汁腸仔意粉佢食,
仲夠時間俾我食左蝦子麵,佢先3點起身.剛剛好.
個囝好鐘意食,不過可能佢牙仔少,要慢慢食,都食左成40分鐘
不過無所謂,最緊要佢鐘意食.
至於晚餐,我地去左大家樂,不過7:30已經賣晒d扖餐.
於是我地去左大快活食,我就亞囝叫左白菜草菇牛柳飯.
有菜,肉,飯.亞囝都可以將肉食左,d飯同菜全部吐出來,
真係叻得佢,俾佢激死.
甘細過就'簡'飲擇食.真係要教下先得.

又去shopping

8月3日

話說昨晚公司俾左個surpise我地,
就是每個人都會上台,公司頒獎給我們
感謝我地幫忙.不過原來裡面有料架,
就是支票一張,我有2000元,做滿一年有1000
公司最長個個做左38年,有3萬8,好開心,
佢個信封好靚架,好有紀念價值.我會好好保存.
我用左個d錢去買左一個單人電飯煲($398)俾亞囝,
再買左套hi-fi($998)俾奶奶,算是對奶奶一點心意.
我發覺自己真是一個洗錢專家.
d錢放唔得耐架,為左亞囝著想,真係要慳d啦

公司五十週年

8月2日

係公司五十週年
好開心可以參加.我一早買左衫出席,媽咪則買左件小外套俾我,我又問大嫂攞左d晚裝手袋
好靚架.公司d同事仲夾份請左2個化妝師去海景嘉福酒店,我同另一個同事坐的士約5點到場
公司d同事都未化妝,6點就開始酒會,8點入席.點知一去到,我地想入去新娘房等化妝
d同事就話好迫,唔好入,甘我地咪係出面做住receiption工作先,點知等到6點才化完一個出來
6:30我咪嘈囉,簡直離譜.公司分配好工作,d人未化妝就唔出來做野,我都未化妝架,
就要面對甘多客,將心比己.於是有個同部門既同事咪入去講囉.出來話下個出來就叫我入去
我6:40入出,7:10就己set頭化妝出來.都唔知d人係入面甘耐做咩
不過一入到去,又俾人串.問我是否發脾氣,話知唔知係佢地來先,我夠知佢地黎先
不過我心諗到底是佢地麻煩多要求,定係化妝師手腳慢.佢地6個人,到6:30才化左3個,
由4:30開始化,會唔會耐左d呢.公司講明酒會6:00開始,是否preperr6點先幫所有人搞好晒呢.
又要匿埋唔出來,野又無人做.個個為自己,都唔知係咩人.
好在我出聲嘈.原來化最遲個d人無時間set頭,抵死.
否則個我一定是我.d人對我單單打打,無所謂啦.
又唔係佢地出糧俾我.我個晚同lily影相都好開心.
問心我唔覺得個妝化得我靚,好過無咋.
最開心係識到lily. 成晚碧姐同lily幫我影左好多相.好多謝佢地.
走個時都11點幾了.回到家都差唔多12點.
好攰.要早d瞓,但落妝同拆頭髮用左好多時間,d感冒又開始發作啦.
真係要小心小心

小病變大病

7月30日-7月31日



今日起身已有少許傷風,流鼻水

都諗緊睇醫生還是配藥食

結果捱到放工去睇醫生

好彩只是小傷風,甘我食一次藥就去上網搵資料,

爸爸就同bb瞓先

點知到11點到,我覺得好唔舒服,個鼻塞晒,

個人好攰兼成身都痛,一探熱都有100.4度(發燒)

根住就發冷,不停震,即去瞓覺,我打地鋪,因為唔想傳俾個囝

到7月31日早上起身,成身仲好痛,抖氣又辛苦,

仲見頭暈同想嘔,一探熱100.9度(比昨晚仲高)

亞囝當時又喊緊,老公又氹唔掂囝囝,佢不停喊,我抱佢又見暈同作嘔

結果我即時瞓返上床,個囝坐係床邊喊,我即刻叫佢call奶奶來湊bb,

因為囝囝連奶都唔食,不停喊,個刻我心好痛,自己好想抱個囝,但都做唔到,

好內疚.原來亞媽病,個仔真係會好慘架

結果奶奶來氹左亞囝食奶,並帶左上佢家

亞邦就等醫生開門,佢同我去睇醫生,再送我返奶奶家才返工

我就係奶奶家瞓左一日,退左燒,好好多啦

今次之後,真係要小心身體,因為唔只自己,人地都會好擔心架