同我say bye bye

11月27日

今早一路行返學一路要我唱歌俾佢聽,我抱住佢唱歌,真係索晒氣架.
返到去,自己行入課室,唔喊,仲主動同我say bye bye,之後坐低食早餐,我好開心同安慰,
因為佢習慣左學校既生活啦.無再扭話唔返學唔著校服,入課室前亦無扭要巾仔及紙巾,又唔駛我抱入房.
臨走前仲回應返飛吻俾我添.真係一路打字都一路笑.


今早早餐: 熱牛奶,果醬麥飽
午餐:免治牛肉粟米粒紅椒粒炒蛋,木瓜瘦肉雪耳湯,紅米飯+火龍果
茶點:雞蓉芝士薯蓉,清水

愛心早餐

11月26日

昨晚接左公司電話,叫我今日唔駛返啦.無所謂啦,甘今早就同柏宇係家食愛心早餐
今早整左火腿蛋三文治+維他奶,柏宇食得好開心
之後柏宇話要著片片,我話唔好啦,醜怪呀.之後佢話肚痛,甘我問佢係咪想去便便,佢話係,
之後真係痾左好多呀.原來佢唔係扭計,真係有需要既.不過佢都好叻,識同我講佢肚痛要著片.
但今日就遲大到啦.返到學校放低佢就走啦,
放學老師話佢今日好叻,獎左個大熊仔貼紙俾佢,因為佢今早喊左一陣好快收聲,
而且成日都無扭過要紙巾.好大進步.我聽到都好開心.
佢又開始慢慢適應緊啦.加油!

今日午餐: 魚肉蒸豆腐,瘦肉草菇煮節瓜,白飯+提子
茶點: 熱牛奶,蒸蛋榚

提早收工接放學

11月25日

昨晚同老闆講左今日開始要收3:30pm,甘我可以準時接走囝囝,又可以早d買餸煮飯,唔駛晚晚搞到甘夜瞓.
今日柏宇都仲有喊,不過無甘勁啦.放學接佢時都幾開心.不過之前喊得勁,所以又開始咳啦.
唯有食返上次剩低既藥水啦.
今晚daddy唔返來食,我整左囝囝最愛既冬菇粟米雞肉飯,佢食左1.5碗呀.仲話要食,不過佢既肚仔已經好脹啦.
真係唔知飽架.

今日早餐: 什菜牛肉湯什菜粉
午餐: 椰菜絲甘荀絲芽菜瘦肉蛋絲炒上海粗麵,粟米生菜雞絲粥+木瓜
茶點: 芝士醬三文治,熱牛奶

一齊正常

11月24日

自從昨晚俾晒手巾及紙巾柏宇,佢就無再扭計啦.
今早喊係因為佢唔捨得我,之後老師都話佢好快無事啦.
今日按校長要求,我拎左一卷廁紙及6條手巾仔放係學校,
等校長得閒時就同柏宇做test,為期一個月,睇下佢有咩問題,今日暫時就唔覺佢扭得太緊要.
甘唯有大家一齊努力住先啦.
我今日都同公司老闆更改以後要提早半小時收工,因為放4點,返到去接柏宇都5點,仲要買餸煮飯,
越整越夜,變左亞囝又要夜瞓,又要早起身,寧願搵少d,早d搞掂屋企,早d瞓好過啦.

今日早餐:白菜雞絲菠菜麵
午餐:南瓜煮瘦肉,牛肉蕃茄洋葱湯,紅米飯+梨
茶點:朱古力蛋榚,熱牛奶

第一日返pt

11月23日

今日第一日返part-time,由於要一個鐘車程,我7:45am就要叫柏宇起身,8:20am出門,8:45am返到去食早餐,
我要趕9點鐘既車,本來今早好地地,點知返到去又喊,已經俾左1條手巾1張紙巾佢,都仲要扭多條,唔俾就喊,
我唔理佢,去放好晒d書包,佢就係大堂越喊越大聲,結果我忍唔住大聲鬧佢,話唔去湊佢啦,送佢去寄宿啦.之後就趕住返工,放工又趕去接佢,本想約校長傾下柏宇既問題,但校長忙星期六既開放日,要到12月2日才有時間同我傾.點知放學時見到我,問我情況,見我都好無助,於是佢都即時抽時間同我傾下囝囝既問題.
我覺得柏宇好似成個人都變左甘,講任何野都say no,永唔會聽你講,而且又改左唔要手巾要紙巾,唔俾就喊,不停重覆又重覆甘要求,務求你俾佢為止,無論我好言相向對佢講道理,或係大聲鬧佢唔理佢,佢都自言自語.真係除左瞓覺之外,佢就全天候疲勞轟炸緊我,又不停挑戰我地,校長都覺得佢係學校同屋企係有好大分別,
學校係好乖好聽話,唔會扭要紙巾,手巾都唔係成日要拎住,但一離開學校就會好扭計,不停要求多多.
總結只知柏宇係要人成日留意佢,鐘意人讚佢,佢自專心係好強,樣樣都要話事.為人好固執,好記仇.
暫時校長建議試下俾紙巾佢,去test下佢會否好似手巾甘,滿足左佢之後就唔要呢.定還是佢只係心癮,
另外都帶少量紙巾及手巾回校俾校長去test柏宇係唔同環境見到熟識既手巾及紙巾,會否同樣反應,
再試下從中搵下問題所有.另外校長話佢唔排除係語言及IQ俾別人高,所以成日鐘意挑戰人,不過要等5歲才可去TEST是否資優生.呢種小朋友,下下要同佢鬥智鬥力,大家要打持久戰,邊個捱得耐最後就會贏.
叫我暫時忍耐下,儘量唔好鬧佢,要心平氣和同佢講道理,睇下幫唔幫到佢.亦希望可以改善同柏宇既關係.
唔知要同柏宇鬥智鬥力到幾時呢?

今日午餐: 節瓜甘荀炆雞排,菠菜煮瘦肉,白飯+蘋果
茶點:喳咋,餅乾

超級對抗

11月22日

今早起身,亞囝已扭計要紙巾,又喊,我氹佢講道理足足50分鐘,真係好攰,又唔夠瞓,又俾佢轟炸我.
今日去左德福睇熊仔裝飾,點知去到又發脾氣叫走,話唔影相,總之我話去東,佢就去西,
全部say no.唔會聽你講野既,c未,俾佢激到吐血.
成日為左紙巾手巾喊好耐.你唔俾咩,佢除左喊,仲好似念經甘不停講,不停重覆去哦你煩你,
務求令你滿足佢,無論我講咩,佢都唔理,自顧自講,佢要係咬牙切齒甘講,真係好學唔學,學晒我之前對佢既語氣表情聲線,問你服未,真係困佢係床都唔驚,喊左一陣就唔喊,又不停去重覆要求點點點......
點有小朋友甘固執架.我都無佢辦法啦.聽日又要求救校長啦.好想快d解決問題呀.大家都好過呀.
佢又唔駛成日喊,發脾氣去表達自己,我地又唔駛甘勞氣.

再返playgroup

11月21日

好耐無返playgroup啦,今日同柏宇返去玩下,無返3個月,都仲係甘曳曳豬周圍走,唔肯坐定,影響埋其他小朋友.一如以往唱唱跳跳,好快過左45分鐘落堂啦.之後去左買校服,因為老師話柏宇日日都整濕2條褲,甘我地之前買得3套,根本乾唔切,學校借俾柏宇既又太大條啦.一路行一路跌.所以都係買多2條替換.
今晚daddy心血來潮,話去附近既8度海逸酒店食buffut,估唔到即晚訂都有位,仲可以由6點食到10點半,每位都係$298,不過野食唔太多,有魚生壽司,即煮湯粉,牛腩,燒牛肉,熱食10款,中西湯各1款,燒味,凍海鮮(長腳蟹,螺,生蠔,蝦),雪榚,日式麵飽,什果刨冰,朱古力噴泉,蛋榚,生果,凍小食,沙律,咖哩及迷你甜品.
味道ok,最好係佢refill野食係好密,亞囝都食左好多蛋榚同麵飽,因為真係好好味,我最尾好飽都仲要食多個飽,實在太軟熟啦.我地食左2個鐘,9點就走啦.真係好少buffut可以食4.5小時架.
下次有機會同家人來食多次先.不過記得自備小朋友既餐具,佢無得提供架.

同校長詳談,獲益良多

11月20日

今早返學前,本來可以同柏字去食麥記早餐,但佢又為左紙巾係大堂喊左20分鐘,
氹同鬧都無用,最後只可以買個飽一路行一路食.返到學校,校長都就以上事件同我傾左半個鐘,
因為佢都覺得柏宇有點倚賴手巾仔及紙巾.以佢讀過兒童心理學黎講,佢話柏宇有可能將手巾當做玩具,
叫我試下每日俾佢自己揀5條,講明當日只係有5條可用,如果跌左或整污穢,都無架啦.
跟住叫我將佢玩手巾仔既時候拍低,俾佢日後分析研究下.睇下佢係有戀物癖還是佢覺得巾仔得意想研究.
同埋睇下俾左佢之後,佢既脾氣有無改善.
結果係佢一拎到d手巾,就同我講好多flower花花,好靚星星,有紅色red,藍色green,有yellow,跟住將條巾仔整成一個晴天雨天公仔甘樣,放係鼻邊聞.之後去邊都拎住個埋手巾,成晚都無咩發脾氣,都叫做ok既.

今日午餐:瘦肉蒸雞蛋,蕃茄豆腐煮魚肉,白飯+提子
茶點:熱牛奶,果醬麥飽

好多野食呀

11月19日

今日返學都仲有少少喊,放學就買左豆花俾佢食.
今晚我地打邊爐,甘凍第一次係屋企打,柏宇一見到甘多野,就做左個好誇張既表情話"好多野食呀"
佢今晚亦真係食左成碗滿既腸同丸,好勁.
由於食完都成10點,仲要洗碗沖涼,個囝又係唔俾daddy陪佢瞓,要等埋我.
所以又搞到佢成11回幾先有得瞓,仲要半夜又扭計話唔瞓覺,
天氣凍左,一晚我都醒好多次,睇下個囝有無冷親,都真係瞓得唔淋架.
所以早上咪都唔多願起身囉.

今日午餐: 椰菜花小甘荀雞翼,節瓜蛋絲煮瘦肉,白飯+梨
茶點: 菜心瘦肉湯通心粉

喊足45分鐘

11月18日

今日好早起身返學食早餐,放學買左佢要求既燒賣及腸仔食,
之後又因為要扭紙巾,我唔俾佢,佢就喊足45分鐘.同佢沖涼時,喊到咕咕都縮埋左,
涼完涼都唔收聲,就困左佢係bb床,關埋燈,我企係房門口同佢講條件.
要佢妥協唔拎手巾仔,唔拎紙巾才放佢出來.
出來之後佢叫我走,話唔要我,於是我同佢講,叫佢以後叫巾仔煮飯俾佢食,同佢沖涼,帶佢返學.
媽咪就走啦.佢一聽完即又喊住叫我唔好走,佢唔要巾仔啦.甘我就再同佢講道理,
同埋要佢將巾仔放床邊,唔准拎住,如果佢掛住巾仔,可以去摸下佢,
之後佢就扑係張枱瞓左啦.
有時真係俾佢激到我好嬲,想唔發脾氣都唔得,因為佢真係好無理喊唔停.
點氹點鬧都係唔理人既.完全無佢辦法.
佢喊又會咳,而且講左後果佢知,佢都係不停喊,唔通條巾仔真係甘重要?

今日早餐: 生菜牛肉粥+餅乾,
午餐: 紫椰菜,白椰菜蛋絲燴雞柳,蓮藕紅綠豆排骨湯,紅米飯+蘋果,
茶點:熱牛奶+甜粟米

豆漿豆花

11月17日

今早答應柏宇,如果放學乖,就會買豆漿或豆花俾佢,
點知佢隻貪心豬兩樣都要,甘我就俾豆漿佢放學飲,
豆花就留返做飯後甜品,唔知係咪將d豆花翻蒸出左水,
我食完即肚痾左2次.不過亞囝就無事.
下次都係即食好d.

今日午餐: 冬菇馬蹄蒸豬肉,烚西蘭花,紅米飯+木瓜
茶點: 熱牛奶+蒸蛋榚

返婆婆家

11月16日

今日送左囝囝返學,就執晒d唔啱既冬天衫俾婆婆送俾人,
因為實在無地方啦.不如送俾d要幫助既人啦.
甘又可以順便探下婆婆.婆婆仲買定晒d餸俾我拎走,驚我趕唔切.
真係辛苦晒您啦,婆婆,下次唔好啦,留返多個錢傍身啦.

今日午餐: 茄汁蕃茄雞絲青豆燴意粉,甘荀薯仔椰菜蕃茄牛尾湯+火龍果
茶點: 蘋果南北杏蜜棗水+甜餐飽

流好多血

11月15日

今日中午我煮麥皮時,突然聽到柏宇打爛野,之後佢叫我,原來佢打爛左個相架,佢諗住執返佢時,俾d玻璃割損左手第2隻手指,流左好多血,我當時都分唔清佢到底有幾多隻手指損左,因為幾隻手指都有血.
甘即刻同佢沖水,check左無碎片,才同佢貼膠布,仲教佢以後唔好搞啦.
佢都好叻仔,無喊過,只係好驚,俾個教訓佢等佢下次記得再搞玻璃就會整損流血好痛架啦.

轉新醫生

11月15日

今日見柏字d鼻水係綠色既,即時同佢去睇屋企附近既醫生,
個醫生雖然講野串d,不過佢又講中晒亞囝既病情,仲話好多醫生都斷錯証,
唔會有甘多氣管炎,佢話柏宇都只係鼻發脹,積左好多鼻水,只要流返晒出來即可,
仲話會越流越多,越綠,越臭,返到去真係不停流出來,望就望呢個醫生夾柏宇啦.
甘就唔駛下下甘凍去紅磡排長龍等啦.慳時間仲慳錢添

又病啦

11月13日

今日放學老師話柏宇有鼻水,少少咳,我仲book左今日去打流感針,都要取消啦.
校長今日同我講,話佢發現柏宇最近成日要人攞紙巾俾佢,原來係除左佢要搵安全感外,
主因係佢想引人注意,想人多d留意佢,可能佢平時玩開既玩具玩厭左,又或者佢好寂寞,先至有甘既情況.
校長唔講我真係唔知,甘我問校長係咪即係代表我地平時好少理佢,所以佢先至甘樣.
校長就話唔一定,不過如果日後佢想要甘樣野,唔好成日甘快滿足佢,佢要求幾次才俾佢一次.
甘慢慢去改善佢囉.

今日早餐:熱牛奶,果醬三文治
午餐:雞絲鮮冬菇椰菜絲炒蛋絲,大豆芽菜蕃茄煮瘦肉,紅米飯+蘋果
茶點: 南瓜蓉,牛肉粥,餅乾

要求食麥當勞早餐

11月12日

今日柏宇要求食麥當勞早餐,之後就返學,點知都係扭,今日校長仲親自出馬抱佢,都係不停喊,
唯有等佢見唔到我,冷靜下啦.

今日午餐:粟米燴豬排,甘荀蕃茄椰菜瘦肉湯,小餐飽+梨
茶點: 熱牛奶,粟米片

喊足一日

11月11日

今日放學時老師話柏宇除左午睡之外,其他時間全程喊,未收過聲,仲有不停要紙巾,真係俾佢激c.
不過佢真係太耐無返學,老師都話要重新再適應過先得,唉.辛苦老師啦.

今日午餐:西蘭花魚塊,南瓜栗子炆瘦肉,白飯+提子
茶點: 熱牛奶,雞蛋全麥三文治

繼續扭計

11月10日

昨晚應承今早去麥當勞食早餐,食完乖乖返學,點知又係狂喊,
今日仲要得1個老師,我送左佢入課室,佢又出返來,老師都理唔到甘多小朋友.
我想走都唔得,於是校長出來幫手去抱住柏宇,甘我就即刻走啦.

今日午餐:粉絲魚肉煮紹菜,甘荀粟米煮牛肉,白飯+木瓜
茶點: 腐竹雞蛋糖水+餅乾

重新返學

11月9日

無返學甘耐,都預左柏宇會唔慣,會扭計.
今日專登買天維他奶氹佢,放學老師話佢只係開頭狂喊,之後就無事啦.
等佢再重新適應下啦.過渡期姐.

今日午餐: 甘荀絲蛋絲煮牛肉,合掌瓜瘦肉生薏米蜜棗生薑湯,紅米飯+火龍果
茶點:雪梨水+提子麥飽

結婚紀念

11月8日

今日係結婚5週年,不過我諗daddy唔記得左,因為佢自己約左朋友去街,唔返來食飯.
不過無所謂啦,我同囝囝係屋企食一樣開心.
今晚就好搞笑,煮左餐肉通粉,我已食左一碗,亞囝仲係食左細半碗,甘當我食第2碗時,發現有d好似蟻既物體,
我仲諗係咪d味粉既蔥咋,點知再睇真d,有超過1x隻,即時唔俾囝食,去煮公仔麵,點知又咸又淋,大家都唔想食,
最終烚左2隻蛋,每人一隻,食完飲湯就算啦.呢餐飯食足2個鐘,唔知以為我地食緊法國菜呀.

買平貨

11月7日

今日柏宇33個月大啦.(2歲9個月)
今日返左屯門,去左行街街買冬季衫俾柏宇.依家小朋友既衫真係好靚,特別係女仔既衫,造形同大人既無分別,
雖則靚,但無左童真.今日買左幾件衫,平均都係30元/件,都幾抵,柏宇d衫多數都係領口太大,所以要買過d貼身既俾佢,以免成日冷親.好好保重身體,亦順便保重亞媽既荷包.

搶埋我支珍寶珠

11月6日

今日見柏宇好返好多,都無食藥啦.
下午佢瞓醒,甘就獎佢食埋粒迷你士多啤梨味珍寶珠,我就食朱古力味珍寶珠,
食到尾,佢連我剩返少少既都要搶埋去食,俾佢激c,可能佢太耐無得食,所以忘左形呀.

警察拉架

11月5日

今晚沖涼時,柏宇玩啫啫,跟住自己話,唔好玩啫啫,警察會拉架.
我問佢邊個教架,佢話係老師喎,唔知真定假呢?
跟住我問佢,甘曳曳豬會唔會俾警察拉,佢話唔會,甘唔怪得柏宇曳曳豬啦.

舒服好多

11月4日

柏宇昨晚都可以一覺到天光,差不多好返啦,甘我都安心d.

好耐無試過一覺瞓到天光

11月3日

昨晚聞左氣,仲叫DADDY買左部放濕機,柏宇終於可以一覺瞓到天光,仲要係無咳既.都係一個好大既進步.
今日成日都咳得好少,亦無之前咳到個頭紅晒既情況.只係仲有好多鼻水姐,唯有勤D同佢抺清D鼻涕啦.
今日柏宇同我講,柏宇好靚仔,大個仔都好靚仔.果真係貪靚豬仔.

排隊用左半日

11月2日

今日下午3:45PM去到診所,要排2X人,唉,今早己打左10次電話去掛號,都係BUSY無人聽,
姑娘叫我去行下先,差唔多要等2個鐘,甘我同柏宇行左個多小時,我攰到行路宦可以瞓得著,
5點返去問,都仲有12個先到,結果要6點先到我地睇,醫生話柏宇既氣管已好左6成,不過佢既鼻水越來越勁.
今次都要聞氣,又係聞聞下瞓著左,甘就由佢瞓啦.醫生話佢既情況唔係好嚴重,唔駛成日聞氣.甘我都放心D.
不過又再轉左鼻水藥.因為D鼻水係綠色既,即係發炎啦.我諗佢會好快好返架啦.

好殘忍

11月1日

昨日睇完醫生,又低燒過,仲係有咳,不過無甘勁.
今日中午瞓醒就有d扭計,我氹完佢唔聽咪鬧囉,佢就想喊啦,
我就話唔准佢喊,因為一喊就會入風,就會咳同嘔,到時又要睇醫生食藥,係佢辛苦咋,無人幫到佢架.
如是者佢最後都忍唔住,放低晒d手巾,入左厨房,雙手揞住個咀,係度飲泣,但又唔敢喊出聲,因為驚俾我鬧.
結果又係俾我喝返佢出來,佢就忍唔住係我面前大喊啦.但問心,我都知自己好殘忍,唔俾佢喊都係想佢唔好咳得甘勁,個刻見到佢甘樣,我自己都想喊呀.唯有等佢喊完,無甘唔開心,再同佢講道理啦.
診所姑娘今日都有打來問柏宇情況.我話佢知幾好.
點知話口未完,佢臨瞓時又係咳到嘔,仲連咳2x下,我真係無野可以幫到佢.
個刻我都想病既係自己,佢半夜直頭咳到坐左起身瞓覺呀.我等佢瞓左先扶佢瞓低咋.
柏宇快d好返啦,見到都肉赤呀.

去覆診

10月31日

今日下午要再去覆診,因為燒下退下,雖唔係高燒,不過柏宇咳到嘔,個頭又咳到紅晒,又話個心口好痛.今日2點35分去到排隊,3點開門,睇完都4點啦.醫生話柏宇咳到條氣管收窄左,所以d痰咳唔到上黎,個頭咪會紅囉.仲要柏宇聞氣,係幫佢舒緩氣管,等佢擴張返,可以咳得起d痰,唔駛唔上唔落甘辛苦.只需聞8分鐘就得啦.
柏宇聞氣唔驚,但就驚部機d聲,佢聞聞下都舒服到瞓著左啦.希望真係幫到佢啦.
之後我地去左夢幻世界玩,又係俾柏宇夾糖,玩左一陣,食埋飯就走啦.不過柏宇就無食,全程瞓,可能佢好難得可以條氣管甘舒服,於是就狂瞓囉.

無得去旅行

10月30日

今日係柏宇學校搞既第一次親子旅行日,由於昨晚柏宇翻燒,仲要成晚都唔退燒,所以無得去啦.
daddy請左假都要一齊留係屋企.唔緊要啦,我地今日就將預備去旅行食既野食晒佢啦
早餐整左火腿蛋三文治,餘下既腸仔及什丸,我就整左喇唦什丸米線.清晒,亞囝既晚餐我就另外煲蕃茄薯仔湯去煮通粉.大家都食得飽飽.好在柏宇中午退左燒,否則佢又食得少,只飲水,好易干燒架,唉.肉痛c我,越來越瘦.

休息一天

10月29日

今日一早7點幾出門去紅磡排隊睇醫生,我8:15am去到,8:30先開門,我都要排第6個,
睇完返到家都10點啦.唉...成日都要去排隊等都唔係辦法,冬天咪要係門口吹風囉.
今日醫生話柏宇只係普通感冒,甘我都安心d,不過就話最好留家休息,唔好吹水啦.
甘即係明天無得去學校旅行囉.不過我都買定晒d野食先.如果柏宇情況ok,就去啦.

daddy第一次送柏宇返學

10月28日

今日daddy返晏,於是一齊送柏宇返學,等daddy可以睇下柏宇幾叻仔,可以自己去洗手抺手,入課室食早餐,
不過今日既早餐同我之前睇既餐單唔同,放學問老師先知佢地既餐單同網上既唔一樣,叫文書姐姐send過一份俾我就得啦.今日我整定芝士腸+杯仔蛋榚接囝囝放學去嫲嫲度食tea.放學己覺得柏宇又d熱,老師話佢今日有鼻水添.返到屋企探熱,真係發燒呀.唉.佢本身氣管未好,仲有咳,所以好易再受傳染.希望好似上次甘快d退燒啦.

今日早餐: 粟米雞肉粥+餅乾,午餐: 紫椰菜,白椰菜蛋絲燴雞柳,蓮藕紅綠豆排骨湯,紅米飯+蘋果,茶點:熱牛奶+甜粟米

一齊正常

10月27日

放左甘多日假,今日柏宇返學都無扭計.一齊正常.
午餐: 冬菇馬蹄蒸豬肉,烚西蘭花,紅米飯+木瓜,茶點: 熱牛奶+蒸蛋榚