撞瘀左個額頭呀

5月28日

今早亞囝係地下爬時,突然砰一聲,成個頭撞落地.
瘀左一撻,可能佢爬個時失重心,肉痛死我.
佢當然大喊啦.唉.真係睇少眼都唔得.
越大越要牛甘眼睇到實.因為成日爬爬走走,搞東搞西.好危險.
好易整傷,到時佢又辛苦,我又心痛.

大家一家人幫嫲嫲慶祝生日呀(欠左爺爺)

5月25日

昨日奶奶生日,由於要就大家時間,所以改左今日才食飯
不過爺爺都係因為未收工,無黎到.
我地今日去富臨叫餸食飯,d野都幾好味.
我最鍾意係壽包,成個拳頭甘大,每個包心都有一個蛋黃.
我地叫左12個,每日一個,都係賣10元一個,好抵食,又好味
我同仔仔半個2份食,爸爸就食1又1/2個.仲有個打包俾囝囝明天做早餐.
埋單都係1040元,我地打算同大佬各一半,佢又唔收我地錢.
話不如等爺爺生日我地俾啦.好啦.甘我地要儲定錢啦.
因為唔知爺爺六十大壽會唔會大搞,到時要用好多錢架.

同嫲嫲慶祝生日食飯

5月24日

今日係嫲嫲舊曆四月二十日生日,
我地因為要就齊所有人,所以訂左明天去富臨食晚飯
今日係正日,我放工買左個杏仁片蛋糕同亞囝及嫲嫲一齊食,都幾好味
晚飯本來唔同嫲嫲食,因為唔想佢煮.點知爺爺話唔返來食,
甘我又唔想奶奶自己一個人過生日,於是提議去紅磡食bbq
因為想帶奶奶試下d新野麻.埋單成350元,都幾貴,不過最緊要食得開心,
奶奶幫我湊仔,無功都有勞啦.唔好話生日請佢食飯,就算平時請佢食餐好既都應該啦.
祝嫲嫲身體健康.

痴住瞓

5月23日

最近囝囝有個習慣,就係夜晚瞓覺一定要'pa'住係我心口/肚腩先瞓.
唔知係咪佢想搵安全感呢.不過甘樣我都會幾辛苦下.
無得轉身,又俾佢壓住.都咪話唔攰.
佢多數瞓到半夜都會自己坐起身,再'pa'埋黎我度再瞓.
所以我一定會醒,有時一晚會幾次架.
唔知幾時先至唔再痴住瞓呢?

又學古惑啦

5月15日

今日亞囝d表情已經好古靈精怪,成日仲脷,奸笑
點知今晚放工食完飯返屋企,我打算同佢瞓覺之際,
隻豬仔突然伸手挪高我件衫尾,然後'meet'我肚腩,跟住ka ka大笑,
我怕'吱',所以我咪大笑,佢見到又再大笑,如是者俾佢'吱'左好多次先收手瞓覺.
lee隻豬囝都唔知係邊度學返黎既,越來越多古惑招式,就黎俾佢笑c啦

又買新鞋啦 + 可以放手行幾步

5月12日

今日佛誕, 唔駛返工, 我見得閒又同亞囝去jusco買鞋
原本想買黏貼既,不過又係因為亞囝隻腳跟位太多肉,穿唔入,個sales姐姐唔建議我買大一個碼
所以轉左另一個索帶款,我選左灰色+橙邊,好sharp,好靘.
之後我地2母子去左kfc食野,例牌叫左個走醬薯蓉俾囝囝食,
跟住去左亞yan鋪頭企左成個鐘傾計,亞仔仲攰到瞓左.
返屋企後,我同亞囝學行行,我在後扶住,等佢行得穩後就靜靜放手
佢自己可以行左7步,第一次咋,真叻仔.
不過之後佢有d驚,唔肯自己放手行.唔緊要啦.慢慢來.
已經係一個好開始啦

唔多開心既母親節

5月11日

今日係生完亞囝後既第二個母親節
不過今日唔多開心,因為佢c6嘈交,其實好少事,只不過日積月累,所以一發不可收拾.
今晚上左奶奶家食飯,大嫂一家都有到,我成晚黑口黑面,唔想講野,講又有咩用,
唔想勞氣,亦唔想係個仔面前嘈交,不過我既EQ就真係麻麻,因為今日我成日打個仔,
唔多唔少都係因為同C6嘈交唔開心所致,不過亞仔又曳,成日用手玩JJ,跟住就捽眼,
我打佢手掌除左心情唔好外,亦都因為緊張佢,之後沖完涼又唔俾我包片,周圍走,又俾我好大力打PATPAT, 佢先家左2秒黎喊,你話激死未,不過我事後檢討,其實唔應該打佢,佢咩都唔識,佢唔岩咪同佢講道理囉,所以我都要訓練好EQ先.以免傷害個仔.

姨媽生日

5月10日

今日我地提早一日同姨媽慶祝生日,順道一併慶祝母親節

今日我地搞大食會,我負責點pizza,家姐整意粉,裔邦及媽負責釀雞翼,海蜇豬脷,炒菜,炸魚,春卷,蟹柳,蒸雞等等...好豐富,飯後又食啫喱,之後仲食生日蛋糕.我就無出力啦,因為要湊住亞囝,所以出力幫手食啦.今日好開心,亞仔都好開心,我地好耐都無搞大食會啦,通常有人生日才會搞,不過就真係好多功夫,anyway,辛苦晒甘多位啦.

新鞋

5月9日

今日同亞囝去左買鞋,佢d鞋全部唔岩啦
由於佢腳跟多肉,d鞋岩長度,但就腳跟位好緊,d肉'bit'晒出黎
唯有買大一個碼,不過變相隻鞋仲長.
我買左對bob builder學步鞋,89元,ok價啦.
佢都好鐘意.個sales話最多著2個月到就會岩,
到時先再買啦.

15個月大啦

5月7日

今日亞囝15個月大啦, 今日自己玩玩下,講daddy, mummy,
不過唔係叫我地,佢係順口講姐,不過我都好開心,真係日日都有驚喜呀

講bye bye

5月6日

今晚去超市買野,有個女仔撞到亞囝架bb車
人地say sorry,亞囝舉高雙手向人地bye bye,
仲開口講左句bye bye, 都無第一次咋.
之後我叫佢講爸爸,媽媽,佢都跟住講,好叻仔

咬我

5月5日

今晚同亞仔係床度行來行去,佢突然轉身攬住我,跟住我好大聲呀........
奶奶問我咩事,我話佢知亞b咬我右手手臂,我大叫嚇親佢,佢才放口,
俾佢咬到有少少血絲,我都知亞囝出牙癢,無諗過佢會咬我姐
奶奶仲話無人叫我俾佢咬,真吹脹.

太婆生日

5月4日

今日提早同太婆慶祝生日
去左西貢康湖居食飯,因為表舅父在哪兒做厨
爺爺下午自己入去買海鮮,我地4:30PM才坐的士入去
由於太早到,我地去左附近行,今晚好多野食,
BB由下午4:00開始未停過口,不停食,
食完粥,又食豆腐,魚,雞絲翅,栗米芯,壽飽,火龍果,
真係飽得滯,嘔返D豆腐出黎,我都怕佢有事
返家後唔肯瞓,結果飲多5安奶才瞓,大食仔一名
總括今日仔仔都OK乖啦.
P/S: 今晚食飯見到溫碧霞&吳震宇,不過真人唔多靘.

V嘩BBQ

5月3日

今日成日係屋企,同亞囝一齊瞓到天昏地暗
爸爸去左溫書,約我地7:00去JUSCO等,因為佢要買辭典機呀
囝囝無咩耐性等爸爸,佢帶我去左百佳超級廣場行,
亞囝真係好LIKE行超市. 門口擺左D健康NUT COUNTER
嫲嫲好愛吃架.賣野既姨姨俾左3粒提子乾,3粒紅梅乾,我試過後都俾BB食,
佢好LIKE呀.俾佢食晒,我都買左紅梅乾,提子乾,南瓜籽,松子共80元俾嫲嫲食,
甘BB都可以食頭2種麻,臨走前姨姨仲請左10幾粒紅梅俾BB食(用個袋仔俾佢自己拎)
晚餐我地去左以前扖王之王個度食,佢依家開左一家新店"V嘩BBQ"
我地最LIKE BBQ,佢係你ORDER,即燒俾你,所以好新鮮
佢D份量細細地,可以叫多幾款
我地點左烤大蝦,辣油煮花螺,什錦炒烏冬,燒茄子,焗蛋,V嘩什錦串燒,焗菜,燒司華力腸,燒珍肝,燒雞腎,燒雞軟骨,焗奶油甘薯&啤酒, 埋單$321, 都幾貴.
佢仲專登推介我地ORDER甘薯,因為BB可以食,果真無介紹錯,好正.
其次V嘩什錦串燒都好好味,佢唔知係咪用左和牛,入口好鬆軟.
本來我地想食A級蠔,賣晒改食B級,都賣晒.下次一定會再食
因為我好愛BBQ,又唔駛整到甘DIRTY.

行左好耐呀

5月1日

今日放假,我帶亞囝去翔龍灣SUPERMARKET,
打算買明治大仔奶粉俾佢試食,
點知無貨,要去黃埔JUSCO,回家途中經過一家新開BB店,
同亞仔行完後,我俾佢試下自己落地行,佢好犀利,由個度行到返屋企大堂,
沿途仲帶我行捷徑,穿過惠康,佢終於返到大堂就坐係地下,好攰呀.
佢都行左成半個鐘,好叻,屋企無咩直路俾佢行,我彎腰同佢行個30分鐘,
成個人散晒,不過見亞囝甘叻都開心啦
等我多D同佢行行先

羊奶片

4月30日



我早前收到羊奶片sample

一直未俾亞仔食,因怕羶,結果我終於試左少少
幾好味,一包有3種味,有藍梅,紅梅,原味各一粒,
我從未俾亞仔食過糖,這種應是鈣糖之類,
我仲擔心佢唔識食,將一粒糖分4份,每次俾1/4,
佢第一次食時,識用牙仔咬糖,又識啜,好叻仔呀.
不過都幾貴,成$79/小樽,我仲考慮緊俾佢食LEE種定魚肝油.
依家BB又多左一種SNACK 啦