囝囝要做小手術

好心痛呀!

囝囝早前12月26日因為右眼上面有粒眼瘡穿左,去左睇吳天柱醫生,

醫生話要即時用剪刀剪穿再放膿,成個過程無麻醉,仲由我負責捉實囝囝,佢都喊左超過半個鐘.

做完無幾耐,同一隻眼下面開始腫,之前醫生講過話會有此情況.

甘我地唔理佢,點知越來越腫,2月9日之後發現有膿頭,有少少綠色液體流出,

我話不如去睇醫生,一個人話去睇專科,另一個話去睇多次吳天柱,又另一個話生眼挑針,飲多d涼茶會好,結果一拖再拖,到個囝隻眼流左幾次膿,又有血水流出來,一時腫一時又消腫,先至話不如去睇專科.好啦.甘終於預約左2月25日下午3點去睇嘉賓大廈既歐陽兆民醫生,佢一摸就話囝囝有好多粒眼瘡,要開兩刀,一刀入面,一刀出面,幫佢放清d膿,因為食藥都唔會清,眼瘡係無預防無斷尾,2歲以下係會成日都生,因為脂肪線塞左,只有勤d用熟暖水清潔,緩和一下,等佢唔好塞,我今次負責按住囝囝對腳,一個姑娘按頭,另一個按上身,醫生好快手打左支麻醉針,好多血噴出來,跟住即快手反起隻眼清入面粒瘡,後到出面,幾分鐘做完,醫生話如果我怕就唔好望,但我全程都望實,因為我覺得好心痛,如果可以寧願割我好過割囝囝,不過今次只喊了幾聲,做完就瞓左啦,pro即係pro,埋單$1200,唔駛食藥,唔駛覆診,只需要搽藥水及藥膏,lee個醫生好細心及有耐性,佢知我擔心都會體諒同安慰.

不過我好後悔,點解當佢有第一粒眼瘡時我唔去睇專科,如果一開始就睇專科,囝囝可能唔駛受甘多苦,所以日後如果有咩病,我都會同佢睇專科,始終專業麻.好過睇甘多次,浪費時間又要亞囝辛苦,唯有俾心機打工,儲多d錢以備不時之需

第一次去Disneyland

2月9日(年衫三)

今日第一次去disneyland,今日得9度,好在無落雨.不過都好涷

我一日6點20分起身翻熱粥及栗米水,準備帶入去樂園.

好耐無試過甘早起身啦,前一晚因為要煲栗米水,凌晨2點幾先瞓.

真係好攰. 不過我地都好期待今日既來臨,我地一家三口7:50就出門,

亞囝就好眼瞓,我地坐小巴出旺角再轉地鐵,再坐廸士尼地鐵,到樂園都係8:50,

於是在附近影相,我地都係第一次坐廸士尼地鐵,裡面d擺設好靚,當然囝囝都好開心

婆婆,家姐一家就差唔多10點先到.我地己經排隊影左高飛同米奇,不過影米奇時亞囝已經瞓左啦.

今日全日都好多人,只係玩到巴斯光年,亞囝拎住支鎗好開心,另外又睇左獅子王同米奇表演

中午去美心食飯,都幾好味,下午茶去食泰式粉麵,超貴及難食.晚餐因係book唔到位,去食炸雞,都ok.

最尾個煙花好靚.睇完8:30就走啦.

今日全日支出連門票都唔駛$1500,都ok好玩啦.

不過太多人未可以走遍成個樂園.bb亦仲細,好多野無得玩,不過佢睇煙花睇到定型,好開心.

我地今日都影左成500幾張相,我仲同爸爸講話不如明年bb生日又同佢黎玩,不過會住酒店,否則都係玩唔晒所有野,如果能夠閒日去更加好,起碼唔會甘多人.

我地今日只係買左一盒糖,因為亞b拎住唔放,所以先買,盛惠45元,佢鍾意就買啦.

唉!越來越寵囝囝啦.

停餵人奶

好多日無寫blog啦,趁bb瞓左,開工先
bb已經1歲,由於係早產,我選擇餵母乳,可惜做唔到全母乳哺餵,要溝奶粉.
我當時下定決心,有幾多俾幾多,希望能給他到1歲.儘我所能就得,最高峰都係得9安士一日,
越接近1歲,1日只得20ml,無咩奶,不過我都堅持到.最後年初一凌晨泵完奶,初二飲最後一餐人奶,
我lee個少人奶媽媽正式退下來啦.lee一年裡面,有好多人叫我唔好再泵,因為我又唔係全人奶,又花好多時間,我亦曾有一絲絲想放棄,不過最終堅持到底.我真係好想俾最好既給囝囝.今日我可以大聲講"我做到啦"
日後唔再泵奶,可留多d時間俾bb同佢玩.
如果有機會生下一胎,我一定會做足準備工夫,希望可以全母乳哺.

年初一(今日係寶寶生日)

今日係大年初一,亦係我寶貝仔生日,今日除左收到好多利是外,仲有大姨媽送既tomas公仔,好cute.寶寶見到即刻伸手去攞.

另外今日我地先去契婆家拜年,再去太嫲家拜年,之後返嫲嫲家吃晚飯,飯後仲一齊食生日蛋榚.

影左好多相,仲有今日著左婆婆買既唐裝衫,個個都話好可愛,我都覺得好可愛呀.

bb甘快就一歲,祝囝囝身體健康,快高長大,日日都開開心心.

公司團年飯

2月1日晚剛食完公司團年飯,去西貢洪記食海鮮,頭盤係大蝦沙律,然後龍蝦剌身,鮑魚仔生菜底,椒盥瀨尿蝦,豉油皇大蝦,鮑魚雞湯,蒸大石斑,西芹帶子,薑蔥炒龍蝦,生炒糯米飯,楊枝甘露,壽飽,生果
好飽呀.我仲打包左龍蝦俾老公做晚餐,因為佢今晚放學要去接囝囝回家,無飯食呀.
天寒地涷,返到屋企都11點幾,都係早d瞓啦.

半夢半醒

最近因為太涷,囝囝瞓得唔好,成晚醒,要貼近我瞓,
可能有d人氣會暖d啦.佢成晚喊一,兩聲就周身郁,結果我用面貼住佢個額頭先至瞓得好.
不過我就瞓得辛苦啦,腰酸背痛.仲要失眠添.希望涷既日子快d過就好啦